ၼႂ်းတိုဝ်ႉတၢင်း ပီမႂ်ႇတႆး 2115 ၼီႈၼႆႉသေ ယူႇတီႈၶွမ်ႊမတီႊၶိုင်ပဵၼ်ပၢင်ပွႆး တီႈထုင်ႉပုင်ႇဝူဝ်း ၸႄႈဝဵင်းၵျွၵ်ႉမႄး ၸတ်း ႁဵတ်း ပၢင်တွၼ်ႈသူး လုၵ်ႈႁဵၼ်း ၸိူဝ်းဢွင်ႇပူၼ်ႉၸၼ်ႉသိပ်း ၸၼ်ႉ B.A, M.A လႄႈ ၸိူဝ်းမုင်ႉႁေႃႁိူၼ်း မီးလုၵ်ႈလၢင်း ၼမ် ၸိူဝ်းၼၼ်ႉ  ဝႃႈၼႆ။

ဝၼ်းတီႈ 15/12/2020 ယၢမ်းၵၢင်ၼႂ် 9 မူင်း ထိုင် 3 မူင်းဝၢႆးဝၼ်း ယူႇတီႈ ၸဝ်ႈၶူးဢၵ်ႉၵ ၺႃႇၼ မိူင်းသူႈ ယဝ်ႉၸၼ်ႉ  M.A Linguistics လႄႈ ၸဝ်းၶူး လၢဝ်ၶိူဝ်း (ဝိလႃႇသ) ၸၼ်ႉလိၵ်ႈ ယဝ်ႉပူၼ်ႉၸၼ်ႉ B.A MCU Psychology Thailand ယၢမ်း လဵဝ်တိုၵ်ႉၶိုၼ်ႈ ႁဵၼ်းဝႆႉၸၼ်ႉ  M.A တီႈမိူင်းသီႇႁူဝ် ၽူႈၵွၼ်းၵျွင်းလူင်ပုင်ႇဝူဝ်း ႁူမ်ႈၵၼ် ၶွမ်ႊမတီႊဝတ်ႉ/ ၼႂ်းဝၢၼ်ႈ သူၼ် ၸတ်းႁဵတ်းပၢင်ပွႆးႁူမ်ၸူမ်းႁပ်ႉတွၼ်ႈပီမႂ်ႇတႆးလႄႈ လူႇတၢၼ်းၶဝ်ႈမႂ်ႇ ၼႂ်းဝၼ်းလိူၼ်ၸဵင်မႂ်ႇၼိုင်ႈၶမ်ႈ တီႈဝတ်ႉ ပုင်ႇဝူဝ်း ၸႄႈဝဵင်းၵျွၵ်ႉမႄး ၸိုင်ႈ တႆးပွတ်းႁွင်ႇ ၼႆယဝ်ႉ။

ၸဝ်းၶူး လၢဝ်ၶိူဝ်း (ဝိလႃႇသ) ၸၼ်ႉလိၵ်ႈ ယဝ်ႉပူၼ်ႉၸၼ်ႉ  B.A MCU Psychology Thailand ယၢမ်းလဵဝ်တိုၵ်ႉၶိုၼ်း ႁဵၼ်းဝႆႉၸၼ်ႉ  M.A တီႈမိူင်းသီႇႁူဝ် ၽူႈၵွၼ်းၵျွင်းလူင်ပုင်ႇဝူဝ်း ထုင်ႉပုင်ႇဝူဝ်း ဝဵင်းၵျွၵ်းမႄး လၢတ်ႈဝႃႈ – “တီႈဝတ်ႉပုင်ႇ ဝူဝ်းႁဝ်းၸဝ်ႈၶဝ် ၸတ်းႁဵတ်းပၢင်ပွႆးပီမႂ်ႇတႆးၼႆႉ တေလႆႈဝႃႈ ပဵၼ်ပွၵ်ႈၵမ်းႁႅၵ်ႈ။ ယဝ်ႉၵေႃႈ ၼင်ႇႁိုဝ် ပၢႆးပၺ်ႇၺႃႇႁဝ်း ပေႃးတေ ၶိုၼ်ႈယႂ်ႇမႂ်ႇသုင် လုၵ်ႈဢွၼ်ႇ ဢၼ်ႁဵၼ်းလိၵ်ႈယူႇၸိူဝ်းၼႆႉၵေႃႈလီ ဢၼ်ယဝ်ႉၵႂႃႇ ၸိူဝ်းၼၼ်ႉၵေႃႈလီ ၼင်ႇႁိုဝ် ပေႃးတေပဵၼ် ႁႅင်းၸႂ် ပုၼ်ႈတႃႇလုၵ်ႈဢွၼ်ႇ ဢၼ်တေၶိုၼ်ႈမႃးၼႆႉသေ ၸင်ႇလႆႈၸတ်းႁဵတ်းပၢင်တွၼ်ႈသူး လုၵ်ႈႁဵၼ်း ပႃး”- ဝႃႈၼႆ။

တီႈပၢင်ၵႅဝ်ႈၼၼ်ႉ လႆႈတွၼ်ႈသူးပၼ် လုၵ်ႈဢွၼ်ႇ ဢၼ်ဢွင်ႇပူၼ်ႉၸၼ်ႉသိပ်း တင်းမူတ်းမီး 27 ၵေႃႉ၊ ၸၼ်ႉ B.A 12 ၵေႃႉလႄႈ ၸၼ်ႉ M.A 2 ၵေႃႉ ႁူမ်ႈၵၼ် တင်း မူတ်း မီး 41 ၵေႃႉ။ လိူဝ်ၼၼ်ႉ လႆႈတွၼ်ႈသူး ယုၵ်ႉယွင်ႈၵမ်ႉထႅမ်ပၼ် မုင်ႉ ႁေႃ ႁိူၼ်း ၸိူဝ်းမီးလုၵ်ႈ  4 ၵေႃႉ ၶိုၼ်ႈၼိူဝ် ၸိူဝ်းၼႆႉထႅင်ႈ ဝႃႈၼႆ။

“ယဝ်ႉၵေႃႈ ႁဝ်းၸဝ်ႈၶဝ် လႆႈတွၼ်ႈသူး ၵမ်ႉၸွႆႈပၼ်ထႅင်ႈ မုင်ႉႁေႃႁိူၼ်း ၸိူဝ်းမီး လုၵ်ႈလၢင်းၼမ် 4 ၵေႃႉ ၶိုၼ်ႈၼိူဝ် တင်း မူတ်းလႆႈၸွႆႈၵႂႃႇ 8 လင်ၶႃးႁိူၼ်း။ လႆႈၸွႆႈထႅမ်ပၼ် ၶဝ်ႈသၢၼ်၊ ၼမ်ႉမၼ်း၊ ၵိူဝ်ၽွင်ဝၢၼ်၊ သပျႃႇ ၶိူင်ႈၸႂ်ႉ ၼႂ်းႁိူၼ်း ယေး ၸိူဝ်းၼႆႉ” –  ၸဝ်းၶူး လၢဝ်ၶိူဝ်း (ဝိလႃႇသ) သိုပ်ႇလၢတ်ႈၼႄၼင်ႇၼႆ။

ၼႂ်းမုင်ႉႁေႃႁိူၼ်း ဢၼ်လႆႈတွၼ်ႈသူး ၸွႆႈၵမ်ႉထႅမ်ပၼ်ၵႂႃႇၼၼ်ႉသမ်ႉ ပေႃးမီးလုၵ်ႈဢွၼ်ႇၼမ်သုတ်း 10 ၵေႃႉ ၼိုင်ႈႁိူၼ်း၊ 5 ၵေႃႉ ၼိုင်ႈႁိူၼ်းလႄႈ 4 ၵေႃႉ ၼိုင်ႈႁိူၼ်း။ လိူဝ်ၼၼ်ႉ ၵၼ်ႇတေႃး ပႃးၵူၼ်းထဝ်ႈ မွၵ်ႈ 90 ၵေႃႉ ၼႆယဝ်ႉ။

တီႈပၢင်ၵႅဝ်ႈၼၼ်ႉ မီးပၢင်ဢုပ်ႇ/ တၢၼ်ႈၶႆႈၼႄ လွင်ႈဝၼ်းပီမႂ်ႇတႆး၊ လွင်ႈၽွမ်ႉႁူမ်ႈ လွင်ႈႁၵ်ႉသႃထိင်းသိမ်း တူၼ်ႈမႆႉ ၸဵမ်ၸိူဝ်းၼႆႉ။ ယဝ်ႉၵေႃႈ ယူႇတီႈ လုမ်းၵပ်းသၢၼ် RCSS လႄႈ ၽူႈတႅၼ်းသၽႃး ၸႄႈမိူင်းမၢႆ 1 ၵျွၵ်ႉမႄး ၸိူဝ်းၼႆႉၵေႃႈ မႃးမွၵ်ႇလၢတ်ႈၶေႃႈၵႂၢမ်း တွၼ်ႈသူးလုၵ်ႈႁဵၼ်းၵႂႃႇ ၼႆယဝ်ႉ။

မိူဝ်ႈၶမ်ႈဝၼ်းတီႈ 14/12/2020 ယူႇတီႈၵူၼ်းမိူင်းထုင်ႉပုင်ႇဝူဝ်းလႄႈ သင်ႇၶၸဝ်ႈ ႁူမ်ႈၵၼ် ပႂ်ႉႁပ်ႉၸဵင် တီႈဝတ်ႉပုင်ႇဝူဝ်း ၵႂႃႇ လီငၢမ်း ဝႃႈၼႆ။