ၽူႈၸၢႆးဢႃယု 30 ပီ ၵေႃႉၼိုင်ႈ ၵၼ်ႉၸၼ် ဢွၼ်ႇယိင်းဢႃယု 6 ၶူပ်ႇသေ ၶႃႈႁႅမ်တၢႆပႃး ယၢမ်းလဵဝ် ယူႇတီႈ SSPP တီႉၺွပ်းဝႆႉတူဝ် ၽူႈၸၢႆးၵေႃႉၼၼ်ႉယဝ်ႉ ၸၢင်ႈမီးတူတ်ႈတၢမ်ႇၼၵ်းၼႃဝႃႈၼႆ။
မိူဝ်ႈဝၼ်းတီႈ 9/12/2020 ယၢမ်းၵၢင်ၶမ်ႈၼၼ်ႉ ၽူႈၸၢႆး ဢႃယု 30 ပီ ၵေႃႉၼိုင်ႈ ၵၼ်ႉၸၼ် ဢွၼ်ႇယိင်း ဢႃယု 6 ၶူပ်ႇသေ ၶႃႈႁႅမ်တၢႆပႅတ်ႈလုၵ်ႈဢွၼ်ႇၵေႃႉၼၼ်ႉ တီႈၼႂ်းႁူၺ်ႈႁိမ်းဝၢၼ်ႈ ဢိူင်ႇဝၢၼ်ႈၼွင် ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉ မႄး ၸိုင်ႈတႆးပွတ်းႁွင်ႇ ၼႆယဝ်ႉ။
ၸဝ်ႈႁၢၼ် တၢၼ်းဢွင်ႇ ၽူႈၶၢၼ်ပၢၵ်ႇ SSPP လၢတ်ႈဝႃႈ -“ၸႂ်ႈၶႃႈဢေႃႈ ႁဝ်းၶႃႈ ၵုမ်းတူဝ်မၼ်းၸၢႆးဝႆႉယဝ်ႉ ၽူႈၸၢႆးၵေႃႉ ၼၼ်ႉ။ ယၢမ်းလဵဝ် ပဵၼ်ၽွင်းပီမႂ်ႇလႄႈ လုမ်းတြႃးႁဝ်းၶႃႈ ပႆႇတႅပ်းတတ်း။ ပေႃးဝၢႆးပီမႂ်ႇၼႆႉယဝ်ႉ ၸွမ်းၼင်ႇ မူႇပိူင်ႁဝ်းၶႃႈ မီးၼၼ်ႉသေ တေပၼ်တၢမ်ႇမၼ်းၸၢႆးၵႂႃႇ ၼၵ်းၼႃၶႃႈယဝ်ႉ”- ဝႃႈၼႆ။
မိူဝ်ႈဝၼ်းတီႈ 9 ယၢမ်းၵၢင်ၶမ်ႈ ဢွၼ်ႇယိင်း ဢႃယု 6 ၶူပ်ႇ ႁၢႆၵႂႃႇ ။ ယူႇတီႈပေႃႈမႄႈပီႈၼွင်ႉ ၵူၼ်းဝၢၼ်ႈ လႆႈဢွၼ်ၵၼ်ၵႂႃႇ သွၵ်ႈႁႃတူဝ်လုၵ်ႈဢွၼ်ႇယိင်းၼၼ်ႉ ထိုင်မႃးဝၼ်းတီႈ 11 ယၢမ်းဝၢႆးဝၼ်း ၸင်ႇတေထူပ်းႁၼ် တူဝ်တၢႆ ။
တီႈတူဝ်တၢႆ ဢွၼ်ႇယိင်းၼၼ်ႉ ၸွမ်းတူဝ်မၼ်းၼၢင်းသိၵ်ႇယွၵ်း၊ မီးႁွႆးထုၵ်ႇပေႃႉမၢတ်ႇၸဵပ်းဝႆႉ ၸွမ်းတူဝ်ၸဵမ် ၸိူဝ်းၼႆႉ။
“လွင်ႈၼႆႉတႄႉ ယူႇတီႈ SSPP တိုၼ်းဢွၵ်ႇၶေႃႈသင်ႇႁႂ်ႈၺွပ်းတူဝ်ၵူၼ်းႁၢႆႉၼၼ်ႉ ႁႂ်ႈလႆႈၶႃႈယဝ်ႉ။ ယဝ်ႉၵေႃႈ ႁဝ်းၶႃႈ တေ ပိုၼ်ၽၢဝ်ၼႄ ၾၢႆႇၼႃႈၵူၼ်းမိူင်းႁဝ်းသေ တေပၼ်တူတ်ႈတၢမ်ႇမၼ်းၸၢႆးၵႂႃႇ” – ၸဝ်ႈႁၢၼ်တၢၼ်းဢွင်ႇ သိုပ်ႇလၢတ်ႈၼႄ ၼင်ႇၼႆ။
ထိုင်မႃး ဝၼ်းတီႈ 12/12/2020 ယၢမ်းၵၢင်ဝၼ်းၼၼ်ႉ ယူႇတီႈၽူႈမီးပုၼ်ႈၽွၼ်း SSPP ၸင်ႇလႆႈၵုမ်းလႆႈတူဝ် ၽူႈၸၢႆးၵေႃႉ ၼၼ်ႉဝႃႈၼႆ။
