ၵူၼ်းဝၢၼ်ႈၺွင်ႇၵဝ်ႈတူၼ်ႈ ၸႄႈဝဵင်း သီႇပေႃႉ ၵေႃႉၼိုင်ႈ ၸုတ်ႇၽဝ်ၶိုၼ်းရူတ်ႉၶိူင်ႈ ၸဝ်ႈၵဝ်ႇလႄႈ ၵူၼ်းႁိူၼ်း ၸဝ်ႈၵဝ်ႇၶိုၼ်း 3 လမ်း မႅၼ်ႈၶၼ်ငိုၼ်း ၼိုင်ႈလၢၼ်ႉပၢႆ ဝႃႈၼႆ။
ဝၼ်းတီႈ 13/12/2020 ယၢမ်းၵၢင်ဝၼ်း 11:45 မူင်းၼၼ်ႉ ၸၢႆးၶမ်းလူႇ ၵူၼ်းဝၢၼ်ႈၺွင်ႇၵဝ်ႈတူၼ်ႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ မဝ်းလဝ်ႈသေ ဢဝ်ၼမ်ႉမၼ်းထတ်ႈသီႇ ၶိုၼ်းၸုတ်ႇၽဝ်ရူတ်ႉၶိူင်ႈၸဝ်ႈၵဝ်ႇၶိုၼ်း တီႈၼႂ်းဝၢင်း ႁိူၼ်း မၼ်း ၸၢႆး 3 လမ်း။ လူႉသုမ်းတင်းမူတ်းတႃႇၶၼ်ငိုၼ်း 1,300,000 ပျႃး ။
ၸၢႆးလၢဝ် ၵူၼ်းသီႇပေႃႉ လၢတ်ႈဝႃႈ -“ၸဝ်ႈၶွင်မၼ်း ၸုတ်ႇႁင်းၵူၺ်းၶႃႈ ဢေႃႈၼႆႉ။ မဝ်းလဝ်ႈသေ ၸုတ်ႇၽဝ် ၼႆၶႃႈဝႃႇ။ လွင်ႈတုမ်ႉတိူဝ်ႉၵူၼ်းႁိူၼ်းယေးမၢတ်ႇၸဵပ်းတႄႉ ဢမ်ႇမီးၶႃႈ”- ဝႃႈၼႆ။
ရူတ်ႉၶိူင်ႈ 3 လမ်း ဢၼ်ၾႆးမႆႈၵႂႃႇၼၼ်ႉ ပဵၼ်ရူတ်ႉသႅၼ်း KENBO လမ်းၼိုင်ႈ၊ Luogia 110 လမ်းၼိုင်ႈလႄႈ Yamaha 82 Japan လမ်းၼိုင်ႈ ၼႆယဝ်ႉ။ ယၢမ်းလဵဝ် တူဝ်ၸၢႆးၶမ်းလူႇ ၵေႃႉၸုတ်ႇၽဝ် ရူတ်ႉၶိူင်ႈၸဝ်ႈၵဝ်ႇၼၼ်ႉ ၸဝ်ႈၼႃႈတီႈလႆႈတီႉၺွပ်းဢဝ်လိူင်ႈၸွႆးတြႃးဝႆႉလူၺ်ႈမၢႆမီႈမတ်ႉတႃ 435 လွင်ႈၸုတ်ႇၽဝ်ၶူဝ်းၶွင် ၼၼ်ႉယဝ်ႉဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ