ၸုမ်းမိူင်းလႃး ၼႃႈလိၼ်ၶိုၵ်ႉတွၼ်းမၢႆ 4 ၵမ်ႉထႅမ်လူႇတၢၼ်း ငိုၼ်းတွင်း တႃႇၵႅတ်ႇၵင်ႈတၢင်းပဵၼ်ၶူဝ်ႊဝိတ်ႉ 19 ပၼ်တီႈ NRPC ငိုၼ်း မၢၼ်ႈတႃႇၼိုင်ႈႁဵင်သႅၼ်ပျႃး ဝႃႈၼႆ။
ဝၼ်းတီႈ 10/12/2020 ယၢမ်းၵၢင်ၼႂ် 9:30 မူင်း ယူႇတီႈဢူးၵျေႃႇၵျေႃႇ တူဝ်တႅၼ်းၸုမ်းမိူင်းလႃး ၼႃႈလိၼ်ၶိုၵ်ႉတွၼ်းမၢႆ 4 (NDAA) ဢွၼ်ႁူဝ်သေ ၵမ်ႉထႅမ်လူႇတၢၼ်း ငိုၼ်းတွင်း တႃႇၸႂ်ႉၸၢႆႇၵႅတ်ႇၵင်ႈတၢင်းပဵၼ်ၶူဝ်ႊဝိတ်ႉ 19 တီႈလုမ်းသုၼ်ၵၢင် ငမ်းယဵၼ်လႄႈ မႄးလီၼႂ်းၸိူဝ်ႉၸၢတ်ႈ NRPC တႃႈၵုင်ႈ ၼႆယဝ်ႉ။
ၼႂ်းႁွင်ႈၵၢၼ်ပိုၼ်ၽၢဝ်ႇ NDAA ဢွၵ်ႇဝႆႉဝႃႈ – “ယူႇတီႈၸုမ်းမိူင်းလႃး ၼႃႈလိၼ် ၶိုၵ်ႉ တွၼ်းမၢႆ 4 လႆႈၸွႆႈငိုၼ်းၵမ်ႉထႅမ် လူႇ တၢၼ်းပၼ်လုမ်း NRPC တႃႇၼိုင်ႈႁဵင်သႅၼ်ပျႃး၊ ယဝ်ႉၵေႃႈ တီႈတိူင်းသိုၵ်းသၢမ်ၸဵင်ႇထႅင်ႈ ၼိုင်ႈႁဵင်သႅၼ်ပျႃး တင်းမူတ်း သွင်ႁဵင်သႅၼ်ပျႃး”- ဝႃႈၼႆ။
ပၢင်မွပ်ႈငိုၼ်းၵမ်ႉၸွႆႈလူႇတၢၼ်း တီႈလုမ်း NRPC တႃႈၵုင်ႈၼၼ်ႉတႄႉ ယူႇတီႈ Dr. တိၼ်ႇမဵဝ်းဝိၼ်း ႁူဝ်ပဝ်ႈၶွမ်ႊမတီႊ၊ ဢူးတဵင်းသေႃႇ ၵႅမ်ႁူဝ်ပဝ်ႈ၊ ၵႅမ်ၸွမ်သိုၵ်းလူင် ၶိၼ်ႇသေႃႇဢူး (လိုဝ်ႈၵၢၼ်) ၽူႈၼမ်းၼႂ်းလႄႈ Dr. ထုၼ်းမိၼ်ႉ ၽူႈၵွၼ်း ႁွင်ႈၵၢၼ်ပၢႆးယူႇလီ တိူင်းတႃႈၵုင်ႈ ၸိူဝ်းၼႆႉ ႁပ်ႉတွၼ်ႈသေ ၶိုၼ်းယိုၼ်ႈဝႂ်ယုၵ်ႉယွင်ႈ မွပ်ႈပၼ်ၶိုၼ်း ။ လိူဝ်ၼၼ်ႉ တီႈတိူင်းသိုၵ်းသၢမ်ၸဵင်ႇၵေႃႈ ပၼ်ဝႂ်ယုၵ်ႉယွင်ႈသေ ငိၼ်းၸူမ်းၶွပ်ႈၸႂ် ထိုင် ၼႆယဝ်ႉ။
မိူဝ်ႈဝၼ်းတီႈ 20/10/2020 ၼၼ်ႉၵေႃႈ ယူႇတီႈၸုမ်းဝႃႉ UWSA ၸွႆႈၵမ်ႉထႅမ် လူႇတၢၼ်းတႃႇၵႅတ်ႈၵင်ႈတၢင်းပဵၼ်ၶူဝ်ႊ ဝိတ်ႉ 19 တႃႇ ငိုၼ်းသွင်ႁဵင်သႅၼ်ပျႃး မိူၼ်ၵၼ် သိုဝ်ႇၶၢဝ်ႇ 7day ႁၢႆးငၢၼ်းဝႆႉၼင်ႇၼႆ။
ၸုမ်းမိူင်းလႃး NDAA ၼႃႈလိၼ်ၶိုၵ်းတွၼ်းမၢႆ 4 တင်း ၸုမ်းဝႃႉ UWSA ၼႃႈလိၼ် ၶိုၵ်းတွၼ်း မၢႆ 2 ၼႆႉ ပဵၼ်ၸုမ်းယိပ်း ၵွင်ႈၵၢင်ႇ ဢၼ်လူင်းလၢႆးမိုဝ်း ၵိုတ်းတိုၵ်းၸၼ်ႉမိူင်းႁူမ်ႈတုမ်ဝႆႉ။ ၵူၺ်းၵႃႈ ၵိုတ်းတိုၵ်းပတ်းပိုၼ်ႉတူဝ်ႈမိူင်း NCA တႄႉ ပႆႇလႆႈလူင်း ။
