ဝၼ်းမိူဝ်ႈၼႆႉ တီႈဝဵင်းတႃႈၶီႈလဵၵ်း ၵူတ်ႇထတ်းႁၼ်ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 ထႅင်ႈ 6 ၵေႃႉ၊ တႃႇ 4 ၵေႃႉပဵၼ်ၵူၼ်းႁိူၼ်းလဵဝ် ပႃးလုၵ်ႈဢွၼ်ႇ ဢႃႇယု 5 ၶူပ်ႇ ၵေႃႉၼိုင်ႈလႄႈ ထဝ်ႈယိင်း ဢႃယု 60 ပီ ၵေႃႉၼိုင်ႈ။
ဝၼ်းတီႈ 10/12/2020 ယၢမ်းၵၢင်ၼႂ် ထိုင် ဝၢႆးဝၼ်း ၶွမ်ႊမတီႊၵူတ်ႇထတ်းယူတ်းယႃၵႅတ်ႇၵင်ႈ တၢင်းပဵၼ်ၶူဝ်ႊဝိတ်ႉ 19 ဝဵင်းတႃႈၶီႈလဵၵ်း ၵူတ်ႇထတ်းထူပ်းႁၼ် ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 ထႅင်ႈ 6 ၵေႃႉ ၼႂ်းၼၼ်ႉ ပႃးလုၵ်ႈဢွၼ်ႇ ဢႃႇယု 5 ၶူပ်ႇ ၵေႃႉၼိုင်ႈလႄႈ ထဝ်ႈယိင်း ဢႃႇယု 60 ပီ ၵေႃႉၼိုင်ႈ။
Dr. ပႃႉၸူဝ်းတႅတ်ႉ ၵႅမ်ၽူႈၸီႉသင်ႇႁွင်ႈၵၢၼ်ပၢႆးယူႇလီ မိူင်းတႆးပွတ်းဢွၵ်ႇလၢတ်ႈဝႃႈ – “တႄႇဢဝ် ၵၢင်ၼႂ် မႃးထိုင်ဝၢႆးဝၼ်းၼႆႉ တီႈတႃႈၶီႈလဵၵ်း ၵူတ်ႇႁၼ် ၵူၼ်းတိတ်းၸပ်း ၶူဝ်ႊဝိတ်ႉ ထႅင်ႈ 6 ၵေႃႉ။ တီႈၵဵတ်ႉလၢၼ်ႇ/မၢၵ်ႇယၢင်း 4 ၵေႃႉ (ပဵၼ်ၵူၼ်းႁိူၼ်းလဵဝ်ၵၼ်) ယဝ်ႉၵေႃႈ တီႈၵုမ်းၵၵ်းတူဝ် ႁႅင်းၵၢၼ် ဢၼ်လုၵ်ႉတၢင်းမိူင်းထႆး ပွၵ်ႈမႃးၼၼ်ႉၵေႃႈ ၵူတ်ႇထတ်း ႁူပ်ႉႁၼ် ထႅင်ႈ 2 ၵေႃႉ”- ဝႃႈၼႆ။
ၼႂ်းၵူၼ်းၸပ်းတၢင်းပဵၼ်ၶူဝ်ႊဝိတ်ႉၼၼ်ႉ လုၵ်ႈဢွၼ်ႇ ဢႃႇယု 5 ၶူပ်ႇ ၵေႃႉၼိုင်ႈလႄႈ ထဝ်ႈယိင်းဢႃယု 60 ပီ ၵေႃႉၼိုင်ႈ ၼၼ်ႉ ပဵၼ်ၵူၼ်းႁိူၼ်းလဵဝ်ၵၼ် ဝႃႈၼႆ။
Dr. ပႃႉၸူဝ်းတႅတ်ႉ သိုပ်ႇလၢတ်ႈထႅင်ႈဝႃႈ “ၼႂ်းလုၵ်ႈဢွၼ်ႇ ဢႃႇယု 5 ၶူပ်ႇ တင်း ၵူၼ်းထဝ်ႈ 60 ပီၼၼ်ႉ ပဵၼ်ၵူၼ်းႁိူၼ်းလဵဝ်ၵၼ် ပဵၼ်ၵူၼ်းဝၢၼ်ႈမၢၵ်ႇယၢင်း။ ၵူၼ်းပဵၼ် ဢၼ်ၵူတ်ႇထတ်းႁၼ်မိူဝ်ႈၼႆႉ ၵမ်ႈၼမ် ယွၼ်ႉဢမ်ႇႁူႉသႅဝ်ဢၢႆသင်ၼၼ်ႉၶႃႈယဝ်ႉ” – ၼႄၼင်ႇၼႆ။
တႄႇဢဝ် ဝၼ်းတီႈ 25/11/2020 တေႃႇထိုင်ယၢမ်းလဵဝ်ၼႆႉ ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 တီႈတႃႈၶီႈလဵၵ်း မီး 90 ပၢႆ။ ၼႂ်းၼၼ်ႉ ယႃၶႅၼ်းၵႂႃႇယဝ်ႉ 22 ၵေႃႉ။ ၵိုတ်းထႅင်ႈ 70 ပၢႆၼၼ်ႉ တိုၵ်ႉသိုပ်ႇယူတ်းယႃတူဝ်ဝႆႉတီႈႁူင်း ယႃလူင်ဝဵင်းတႃႈၶီႈလဵၵ်းယူႇ။
ယၢမ်းလဵဝ် ၼႂ်းမိူင်းတႆး ၵူၼ်းတိတ်းၸပ်းၶူဝ်ႊဝိတ်ႉ 19 တင်းမူတ်းမီး 641 ၵေႃႉ၊ လူႉ တၢႆ 3 ၵေႃႉ၊ ယႃၶႅၼ်းသေ လႆႈလူင်းႁူင်းယႃ 432 ၵေႃႉၼႆ ၶွမ်ႊမတီႊၵမ်ၵၢၼ်ၶူဝ်ႊဝိတ်ႉ ၸုမ်းလူင်ပွင်ၸိုင်ႈမိူင်းတႆး ပိုၼ်ၽၢဝ်ႇဝႆႉၼင်ႇၼႆ။
ၼႂ်းမိူင်းႁူမ်ႈတုမ် ပတ်းပိုၼ်ႉတႄႉ ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 တင်းမူတ်း မီး 103,166 ၵေႃႉ၊ ယူတ်းယႃ 19,277 ၵေႃႉ၊ ယႃၶႅၼ်း 81,715 ၵေႃႉလႄႈ လူႉတၢႆ 2,174 ၵေႃႉ ႁွင်ႈၵၢၼ်ပၢႆးယူႇလီ မိူင်းႁူမ်ႈတုမ် ပိုၼ်ၽၢဝ်ႇ ဢွၵ်ႇဝႆႉၼင်ႇၼႆ။
