ႁွင်ႈၵၢၼ်ၾၢႆႇၵဵပ်းၶွၼ်ႇ မိူင်းထႆး တီႈလၢၼ်ႇလႅၼ်လိၼ်မႄႈသၢႆ-တႃႈၶီႈလဵၵ်း ၵူတ်ႇထတ်းတီႉလႆႈၸၢႆးၵူၼ်းမိူင်းမၢၼ်ႈၵေႃႉၼိုင်ႈ ဢဝ်ငိုၼ်းထႆး 23 လၢၼ်ႉဝၢတ်ႇသႂ်ႇၵွင်ႇၶဝ်ႈမုၼ်း ဢၢၼ်းၶၢမ်ႈလႅၼ်လိၼ်ဢဝ်ၶဝ်ႈမိူင်းမၢၼ်ႈ။

ဝၼ်းတီႈ 23/06/2026 တီႈလၢၼ်ႇလႅၼ်လိၼ် မၢၼ်ႈ-တႆး မႄႈသၢႆ- တႃႈၶီႈလဵၵ်း ၼၼ်ႉ ႁွင်ႈၵၢၼ်ၾၢႆႇၵဵပ်းၶွၼ်ႇ လူင်ပွင်ၸိုင်ႈထႆး ၵူတ်ႇထတ်းရူတ်ႉၵႃးဢၼ်မီးပၢႆႉထပဵၼ်း(နံပတ်ပြား)မိူင်းမၢၼ်ႈ လမ်းၼိုင်ႈ လုၵ်ႉတၢင်းၾင်ႇမႄႈသၢႆသေ ဢၢၼ်းတေၶၢမ်ႈၶူဝ်မိူဝ်းတၢင်းၾင်ႇတႃႈၶီႈလဵၵ်း။ တိုၵ်ႉၶဝ်ႈထႅဝ်ပႂ်ႉၶၢမ်ႈၶူဝ် လႅၼ်လိၼ်မၢႆ 1။

ၵူၼ်းၶပ်းရူတ်ႉပဵၼ်ၸၢႆးၸၢဝ်းမၢၼ်ႈ ဢႃယု 31 ပီ – သိုဝ်ႇၶၢဝ်ႇထႆး တႅမ်ႈတၢင်ႇပိုၼ်ၽၢဝ်ႇဝႆႉၼင်ႇၼႆ။ မၼ်းၸၢႆးပဵၼ်ၽႂ် ဢၢၼ်းဢဝ်ငိုၼ်းထႆးၶၢမ်ႈလႅၼ်လိၼ်ၵႂႃႇမိူင်းတႆးႁဵတ်းသင်ၼႆတႄႉ ၽႂ်ၵေႃႈပႆႇႁူႉလွင်ႈတၢင်းမၼ်းလီလီ။

ၾၢႆႇတၢင်း ၸဝ်ႈၼႃႈတီႈ ၵူတ်ႇထတ်းၵူၼ်းၶဝ်ႈမိူင်း မိူင်းထႆးသမ်ႉပေႃးတွၵ်ႇပၼ်မၢႆဢွၵ်ႇမိူင်းယဝ်ႉ။ ၽွင်းၸဝ်ႈၼႃႈတီႈၾၢႆႇၵဵပ်းၶွၼ်ႇမႃးၵူတ်ႇထတ်းတူၺ်းၶူဝ်းၶွင်ၼႂ်းရူတ်ႉ ႁၼ်မႅၼ်ႈ တိူၵ်ႈယႂ်ႇဢၼ်ၼိုင်ႈ – သႂ်ႇဝႆႉၶဝ်ႈမုၼ်းၶဝ်ႈပွင်း မၼ်းဢႃႇလူးၶူဝ်ႈ ပႃႁႅင်ႈပဵၼ်သဵၼ်ႈ ၸိူဝ်းၼႆႉ။

ပဵၼ်ငိုၼ်းထႆးၶႅပ်း 1000 မတ်ႉ 1 လၢၼ်ႉ တႃႇ 23 မတ်ႉ လႄႈ ငိုၼ်းယွႆႈမၼ်းထႅင်ႈၵမ်ႈၽွင်ႈ တင်းမူတ်းမီးၵႃႈၶၼ် 23 လၢၼ်ႉပၢႆ 23000 ဝၢတ်ႇ။ၾၢႆႇၵဵပ်းၶွၼ်ႇမိူင်းထႆး တီႉၺွပ်းမၼ်းၸၢႆး ဢဝ်လိူင်ႈလူၺ်ႈတၢင်းၽိတ်း “ဢမ်ႇလႆႈၶႂၢင်ႉၾၢႆႇၵဵပ်းၶွၼ်ႇထႆးသေလၵ်ႉဢဝ်ငိုၼ်းထႆးဢွၵ်ႇၼွၵ်ႈမိူင်းထႆး” ၼႆသေတေဢဝ်လိူင်ႈပၼ်တူတ်ႈတၢမ်ႇၵႂႃႇၸွမ်းၼင်ႇပၵ်းပိူင်မၢႆမီႈၸိုင်ႈမိူင်းထႆးၵႂႃႇဝႃႈၼႆ။

ၸွမ်းၼင်ႇပၵ်းပိူင်မၢႆမီႈၸိုင်ႈမိူင်းထႆး တႄႉ ၵူၼ်းၼိုင်ႈၵေႃႉၼႆႉ ပႃးငိုၼ်းထႆးၸပ်းတူဝ်ဢွၵ်ႇၼွၵ်ႈမိူင်းလႆႈဢမ်ႇပူၼ်ႉလိူဝ် 5 မိုၼ်ႇဝၢတ်ႇ။

သင်ဝႃႈပူၼ်ႉလိူဝ်ၼင်ႇမၢႆမီႈတမ်းဝၢင်းဝႆႉၼၼ်ႉသေ ဢမ်ႇၸႅင်ႈၾၢႆႇၵဵပ်းၶွၼ်ႇထႆး သေလႄႈလၵ်ႉဢဝ်ငိုၼ်းထႆးဢွၵ်ႇၸိုင် တူတ်ႈတၢမ်ႇမၼ်းမီးဝႆႉဝႃႈ – ငိုၼ်းၸိူဝ်းၼၼ်ႉတေထုၵ်ႇယိုတ်းဢဝ်ပဵၼ်ငိုၼ်းၽႅၼ်ႇလိၼ်ၸိုင်ႈထႆး။ ၵူၼ်းလၵ်ႉဢဝ်ငိုၼ်းဢွၵ်ႇၼၼ်ႉ တေလႆႈပၼ်ငိုၼ်းတူတ်ႈတၢမ်ႇ 4 ပုၼ်ႈ(ၵႃႈၶၼ်ငိုၼ်းဢၼ်ၺႃးတီႉၺွပ်း) ။ တေလႆႈၺႃးတူတ်ႈတၢမ်ႇၶွၵ်ႈထိုင် 10 ပီ ၸဵမ်ၸိူဝ်းၼႆႉ။