ၽွင်းသိုၵ်း RCSS တင်း ၸုမ်းဢူၺ်းလီသိုၵ်း ပွတ်းႁွင်ႇ ယိုဝ်းၵၼ် ၼႂ်းဢိူင်ႇၼမ်ႉတွင်ႈၵူင်း ၸႄႈဝဵင်းၼမ်ႉတူႈ မိူင်းတႆးပွတ်းႁွင်ႇၼၼ်ႉ ၾၢႆႇသိုၵ်းလူင်ပွင်ၸိုင်ႈမၢၼ်ႈၶိုၼ်ႈလူမ်ႇၵၢင် တေႃႇပၢင်တိုၵ်းပေႃးယဵၼ်ၵႂႃႇ။

ဝၼ်းတီႈ 9/12/2020 ယၢမ်းၵၢင်ၼႂ် မွၵ်ႈ 8 မူင်းၶိုင်ႈ သိုၵ်းလူင်ပွင်ၸိုင်ႈမၢၼ်ႈ ဢဵၼ်ႁႅင်း 2 တပ်ႉၵွင် တပ်ႉၶမယ 324 ၼမ်ႉတူႈ တင်း တပ်ႉၶလယ 256 (ငဝ်ႈတပ်ႉပၵ်းယေႇၸၵျူဝ်ႇ) ဢၼ်ယူႇတႂ်ႈတပ်ႉၸုမ်းလူင် တပ်ႉမ 101  ၶိုၼ်ႈလူမ်ႇၶၢင်ႈ ၽွင်းသိုၵ်း RCSS တင်း ၸုမ်းဢူၺ်းလီ ပွတ်းႁွင်ႇ ယိုဝ်းၵၼ် ၼႂ်းဝၢၼ်ႈၼႃးၵေး။ ငႃးသိုၵ်းမၢၼ်ႈ သၢႆၼိုင်ႈ ၶိုၼ်ႈတၢင်း ပၢင်ၵုတ်ႇ၊ သၢႆၼိုင်ႈၶိုၼ်ႈတၢင်းမၢၼ်ႈၸၢမ်သေယိုဝ်း။  

ၵဵဝ်ႇၵပ်းလွင်ႈၼႆႉ ၾၢႆႇၸုမ်းဢူၺ်းလီ လၢတ်ႈဝႃႈ သိုၵ်းမၢၼ်ႈ ၶိုၼ်ႈယိုဝ်းၸွႆႈ ၾၢႆႇတပ်ႉ RCSS တေႃႇပၢင်တိုၵ်းပေႃးယဵၼ်။

ၽူႈၶၢၼ်ပၢၵ်ႇ RCSS ၸဝ်ႈႁၢၼ်ၶမ်းၸၢမ်ႇလၢတ်ႈဝႃႈ  –  “ပေႃး ပဵၼ်ပၢင်တိုၵ်း​​ၵေႃႈ   သိုၵ်းမၢၼ်ႈ​​ၵေႃႈ သၢၼ်ႈ ​​သေတူင်ႉၼိုင်  ​​တေပဵၼ်ၸိူင်ႉၼၼ်ၵူၺ်း” – ဝႃႈၼႆ။

ၵူၼ်းပိုၼ်ႉတီႈ မၢၼ်ႈၸၢမ်ၵေႃႈလၢတ်ႈဝႃႈ – “မိူဝ်ႈလဵဝ် ပဵၼ်ဝႆႉယူႇ 3 ၾၢႆႇၶႃႈဢေႃႈ။ သိုၵ်းမၢၼ်ႈငႃးၼိုင်ႈ၊ သိုၵ်းဢူၺ်းလီ ပွတ်းႁွင်ႇ SSPP တင်း TNLA ငႃးၼိုင်ႈ။ သိုၵ်း RCSS ငႃးၼိုင်ႈၶႃႈ။ သိုၵ်းမၢၼ်ႈၵေႃႈ မႃးတူင်ႉၼိုင်ယူႇ ႁိမ်းႁွမ်းၼႆႉ ယူႇ ယင်းပႆႇထွၼ် ၊ မိူဝ်ႈၼႆႉၵေႃႈ ၾၢႆႇသိုၵ်းမၢၼ်ႈ ၶဝ်ႈၵူတ်ႇထတ်းၼႂ်းပိုၼ်ႉတီႈဝႃႇ ဢမ်ႇႁၼ်သိုၵ်းတင်း သွင်ၾၢႆႇ ယိုဝ်းသိုၵ်းမၢၼ်ႈသေၾၢႆႇၶႃႈ – ဝႃႈၼႆ။

ၾၢႆႇ SSPP ပိုၼ်ၽၢဝ်ႇဝႃႈ မိူဝ်ႈဝၼ်းတီႈ 5/12/2020 ၼၼ်ႉ တပ်ႉ RCSS ႁႅင်းသိုၵ်း 60 ပၢႆ ၶိုၼ်ႈလေႃႇတပ်ႉၸူဝ်ႈၶၢဝ်း SSPP ဢၼ်မီးတီႈလွႆလမ် ၾၢႆႇတူၵ်းဝၢၼ်ႈတႃႈၽႃလၢႆး 2 လၵ်း။ ပၢင်တိုၵ်းဝၼ်းတီႈ 9/12/2020 ၼႆႉ သမ်ႉၾၢႆႇ RCSS ပိုၼ်ၽၢဝ်ႇဝႃႈ သိုၵ်း TNLA တင်း သိုၵ်း SSPP ႁူမ်ႈၵၼ် လေႃႇတိုၵ်း သိုၵ်း RCSS ဢၼ်တူင်ႉၼိုင် ယူႇတၢင်းဝၢၼ်ႈ ၼႃးၵႄး။

ဢၼ်ၵူၼ်းမိူင်းၺႃးၸၢၵ်ႇသိုၵ်းသွင်ၾၢႆႇ ယိုဝ်းၵၼ်သေလႆႈပၢႆႈတႄႉ ပဵၼ် ၵူၼ်းဝၢၼ်ႈ ၵုၼ်ၵျွင်း၊ ၼႃးၵႅင်း၊ ပဵင်းလူင်၊ ၼႃးၵႄး ႁူဝ်ၵူၼ်း 250 ပၢႆ လႆႈပၢႆ ယၢၼ်ႁိူၼ်းယေးတီႈယူႇ။ ၸဝ်ႈမုၼ် ၸဝ်ႈၸၢင်း ၸဝ်ႈသၢင်ႈ တီႈၵျွၵ်းၼႃးၵႄးၵေႃႈ လႆႈပႃးၵၼ်ပႆႈလူင်းဝၢၼ်ႈၸၢမ် ၼင်ႇၵဝ်ႇ။