ၼၢင်းယိင်း ဢႃယု 38 ပီ ၵူၼ်းသီႇပေႃႉ ၵေႃႉၼိုင်ႈ လူႉတၢႆတီႈႁူင်းယႃလႃႈသဵဝ်ႈ ယွၼ်ႉတၢင်းပဵၼ်ၶူဝ်ႊဝိတ်ႉ 19 ဝႃႈၼႆ။
မိူဝ်ႈၼႆႉ ဝၼ်းတီႈ 10/12/2020 ယၢမ်းၵၢင်ၼႂ်ၸဝ်ႉ 1 မူင်း ၼၢင်းယိင်း ၵူၼ်းသီႇပေႃႉၵေႃႉၼိုင်ႈ ပဵၼ်တၢင်းပဵၼ်သႆႈတိင်ႇၸဵပ်းသေမႃး ယူတ်းယႃတူဝ်ဝႆႉတီႈႁူင်းယႃလူင် ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉ လူႉတၢႆ ဝၢႆးလင်ၵူတ်ႇထတ်းထူပ်းႁၼ်တိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 လႆႈ 3 ဝၼ်း ။
ၵူၼ်းသီႇပေႃႉ ဢၼ်ၸွႆႈထႅမ်ၼႂ်းတူင်ႇဝူင်းၵူၼ်းၵေႃႉၼိုင်ႈ လၢတ်ႈဝႃႈ – “မိူဝ်ႈၼႆႉ ၵၢင်ၼႂ် မွၵ်ႈ 1 မူင်းၼႆႉ မၼ်းၼၢင်း လႆႈလူႉသဵင်ႈၵႂႃႇတီႈႁူင်းယႃလႃႈသဵဝ်ႈ ၶႃႈဢေႃႈ။ ပူၼ်ႉၶၢပ်ႈတူဝ် ၽဝ်မိူဝ်ႈၼႆႉၵမ်းလဵဝ်ၶႃႈ ”- ဝႃႈၼႆ။
ၼၢင်းယိင်း ဢႃယု 38 ပီ ဢၼ်လႆႈလူႉတၢႆၵႂႃႇတီႈႁူင်းယႃလႃႈသဵဝ်ႈၼၼ်ႉ ပဵၼ်ၵူၼ်းဝၢၼ်ႈတႃႈၽႃလၢႆး ဢိူင်ႇသူၼ်လူင် ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ မၼ်းၼၢင်းၼႆႉဢမ်ႇမီးပိုၼ်းဢွၵ်ႇတၢင်းၼွၵ်ႈမိူင်း ၊ ဢမ်ႇယၢမ်ႈႁူပ်ႉထူပ်းယူႇၸမ်တင်းၵူၼ်းမီးၸိူဝ်ႉမႅင်းတၢင်းပဵၼ်၊ မၼ်းၼၢင်းပဵၼ်သႆႈတိင်ႇၸဵပ်းလႄႈ ၶဝ်ႈယူတ်းယႃတူဝ်တီႈႁူင်းယႃသီႇပေႃႉ မိူဝ်ႈဝၼ်းတီႈ 2/12/2020 ။ ထိုင်မႃး ဝၼ်းတီႈ 6 လႆႈသူင်ႇယူတ်းယႃတူဝ်တီႈႁူင်းယႃ လႃႈသဵဝ်ႈ ၊ ဝၢႆးၼၼ်ႉဝၼ်းၼိုင်ႈ ၵူတ်ႇထတ်းထူပ်းႁၼ်မႅင်းၶူဝ်ႊဝိတ်ႉ 19 ၊ ယူတ်းယႃတူဝ်လႆႈ 3 ဝၼ်း ထိုင်မႃးၼႂ်ၼႆႉမွၵ်ႈ 1 မူင်းၵေႃႈလႆႈလူႉသဵင်ႈၵႂႃႇ ဝႃႈၼႆ။
ၼၢင်းယိင်းၵေႃႉၼႆႉ ပဵၼ်ၵူၼ်းပဵၼ်ၶူဝ်ႊဝိတ်ႉ-19 ၵေႃႉထူၼ်ႈ 4 ၼႂ်းဝဵင်းသီႇပေႃႉ – လႆႈႁူႉၼင်ႇၼႆ။
တေႃႇထိုင်ဝၼ်းတီႈ 9/12/2020 ၼႆႉ ၼႂ်းမိူင်းတႆး ပတ်းပိုၼ်ႉ မီးၵူၼ်းတိတ်းၸပ်းၶူဝ်ႊဝိတ်ႉ 19 တင်းမူတ်းမီး 641 ၵေႃႉ၊ လူႉတၢႆ 2 ၵေႃႉ၊ လႆႈၶႂၢင်ႉလူင်းႁူင်းယႃ 432 ၵေႃႉ လႆႈႁူႉၶေႃႈမုလ်းမႃးတီႈၸုမ်းလူင်ပွင်ၸိုင်ႈၸႄႈမိူင်းတႆးၼင်ႇၼႆ။
