သိုၵ်းဢူၺ်းလီပွတ်းႁွင်ႇလႄႈ တပ်ႉသိုၵ်း RCSS/SSA ပိုတ်းယိုဝ်းၵၼ်တီႈၼႂ်းၸႄႈဝဵင်းၼမ်ႉတူႈ ၵူၼ်းဝၢၼ်ႈ 141 ၵေႃႉ ပၢႆႈၽေးသိုၵ်း မႃးသွၼ်ႈဝႆႉတီႈ ဝတ်ႉမၢၼ်ႈ ၸၢမ် ။
မိူဝ်ႈၼႆႉ ဝၼ်းတီႈ 9/12/2020 ယၢမ်းၵၢင်ၼႂ် 8 မူင်းၶိုင်ႈ ၶွင်ႇသီႇဢဝ်ၶိုၼ်း ၸိုင်ႈတႆး/ တပ်ႉသိုၵ်းၸိုင်ႈတႆး RCSS /SSA တင်း ၸုမ်းဢူၺ်းလီ ပွတ်းႁွင်ႇ ပဵၼ်ပၢင်တိုၵ်းၵၼ် တီႈၼႂ်းဝၢၼ်ႈၼႃးၵေး ဢိူင်ႇ ၼမ်ႉတွင်ႇၵူင်း ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ ႁဵတ်းႁႂ်ႈ ၵူၼ်းဝၢၼ်ႈၼႃးၵႅင်း၊ ဝၢၼ်ႈၵုၼ်းၵျွင်း၊ ဝၢၼ်ႈပဵင်းလူင်လႄႈ ဝၢၼ်ႈၼႃးၵေး လႆႈပၢႆႈၽေးသိုၵ်း 141 ၵေႃႉ ၼႆယဝ်ႉ။
ၸၢႆးၸၢမ်ႇ ၵူၼ်းပိုၼ်ႉတီႈ မၢၼ်ႈၸၢမ် လၢတ်ႈဝႃႈ – “ၵူၼ်းဝၢၼ်ႈပၢႆႈမႃးၼႆႉ ယွၼ်ႉ မၼ်းၸမ်ပၢင်တိုၵ်း ဢၼ်ၶဝ်ပဵၼ်ၵၼ် မိူဝ်ႈၼႆႉႁႅင်းၼႃႇလႄႈ ဢွၼ်ၵၼ်ပၢႆႈမႃး တီႈဝတ်ႉမၢၼ်ႈၸၢမ် ၊ ယၢမ်းလဵဝ်တႄႉ သဵင်ၵွင်ႈယဵၼ် ဝႆႉယူႇ ။ ယွၼ်ႉတပ်ႉပွင်းၸူႉ ထွႆဢွၵ်ႇဝႆႉလႄႈ ပၢင်တိုၵ်းၸင်ႇတေယဵၼ်လူင်းၶႃႈ၊ လႆႈငိၼ်းဝႃႈ တင်းတပ်ႉပွင်းၸူႉ မီးလွင်ႈမၢတ်ႇ ၸဵပ်းၸွမ်း”- ဝႃႈၼႆ။
ၵူၼ်းပၢႆႈၽေး ဢၼ်ပၢႆႈမႃးသွၼ်ႈဝႆႉတီႈဝတ်ႉမၢၼ်ႈၸၢမ်ၼႆႉသမ်ႉ ဝၢၼ်ႈၼႃးၵႅင်း လင်ႁိူၼ်း 22 လင်၊ ၸၢႆး 28 ၵေႃႉ၊ ယိင်း 42 ၵေႃႉ ႁူမ်ႈ 70 ၵေႃႉ၊ ဝၢၼ်ႈၵုၼ်းၵျွင်း လင်ႁိူၼ်း 12 လင်၊ ၸၢႆး 9 ၵေႃႉ၊ ယိင်း 24 ၵေႃႉ ႁူမ်ႈ 33 ၵေႃႉ၊ ဝၢၼ်ႈပဵင်းလူင် လင် ႁိူၼ်း 9 လင်၊ ၸၢႆး 9 ၵေႃႉ၊ ယိင်း 14 ၵေႃႉ ႁူမ်ႈ 23 ၵေႃႉလႄႈ ဝၢၼ်ႈၼႃးၵေး လင်ႁိူၼ်း 5 လင်၊ ၸၢႆး 5 ၵေႃႉ၊ ယိင်း 10 ၵေႃႉ ႁူမ်ႈ 15 ၵေႃႉ။ တင်းမူတ်းႁူမ်ႈၵၼ် တေမီး 141 ၵေႃႉ ၼႆယဝ်ႉ။
ယၢမ်းဝၢႆးဝၼ်းၼႆႉ လႆႈငိၼ်းသဵင်ၵွင်ႈတႅၵ်ႇတၢင်းပွတ်းမိူင်းမု ဢၼ်မီးၼႂ်းထုင်ႉမၢၼ်ႈၸၢမ်ၼၼ်ႉ ၵူၺ်းၼင်ႇၵဝ်ႇဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ