ၼႃႈလိၼ်ၽွင်းငမ်းတူဝ်ၵဝ်ႇဝႃႉ တႄႇၸႂ်ႉၶိူင်ႈၵူတ်ႇထတ်းၸိူဝ်ႉမႅင်းၶူဝ်ႊဝိတ်ႉ 19  ဢၼ်ပဵၼ် တပ်ႉသိုၵ်းဝႃႉ ၶိုင်ႁႃဝႆႉႁင်းၵူၺ်း ၵႃႈၶၼ်တူၵ်းမႅၼ်ႈ ငိုၼ်းၶႄႇ 3,140,000 ယႂမ်ၼၼ်ႉသေတေတႄႇၵူတ်ႇထတ်းပၼ် ၵူၼ်းၼႂ်းပိုၼ်ႉတီႈၵႂႃႇ ဝႃႈၼႆ။

ဝၼ်းတီႈ 6/12/2020 ယၢမ်းၵၢင်ၼႂ် ယူႇတီႈၸုမ်းၶႂၢႆႇၶႃပႄလႅင် ဝဵင်းမူင်းလိင်ႇ ၸႄႈတွၼ်ႈၽူဢေႇ (ဖူအဲယ်ခရိုင်) ၸႄႈမိူင်း ယုၼ်ႊၼၢၼ်ႊ ၸိုင်ႈမိူင်းၶႄႇ ၵမ်ႉထႅမ်ၸွႆႈမႃး ၶိူင်ႈၵူတ်ႇထတ်းတၢင်းပဵၼ်ၶူဝ်ႊဝိတ်ႉ 19 ၼိုင်ႈၶိူင်ႈ တေတူၵ်းမႅၼ်ႈငိုၼ်း ၶႄႇ 3,140,000 ယႂမ် တူၵ်းမႅၼ်ႈငိုၼ်းမၢၼ်ႈ 640,000,000 ပၢႆ တႄႇၵူတ်ႇထတ်းပၼ်ၵူၼ်းမိူင်းၼႂ်းပိုၼ်ႉတီႈၽွင်းငမ်းတူဝ် ၵဝ်ႇဝႃႉ ( ၸွမ်းၼင်ႇပိူင်ငဝ်ႈပိုင်းမိူင်း 2008 ပၼ်ဝႆႉ) တီႈငဝ်ႈငုၼ်း UWSA ၸႄႈဝဵင်းပၢင်သၢင်း ၸိုင်ႈတႆးပွတ်းဢွၵ်ႇၶူင်း ၼႆယဝ်ႉ။

ၶိူင်ႈၵူတ်ႇထတ်းၸိူဝ်ႉမႅင်းၶူဝ်ႊဝိတ်ႉ 19 ၼႆႉ ၵူတ်ႇထတ်းၼိုင်ႈၵမ်း ႁိုင်လႆႈထိုင် 3 ၸူဝ်ႈမူင်း ၊ ၵူတ်ႇထတ်းလႆႈ 92 ၵမ်း။ တွၼ်ႈတႃႇ တေၵူတ်ႇထတ်းၸိူဝ်ႉမႅင်းၼႆႉ ယူႇတီႈၸုမ်းၶႂၢႆႇၶႃပႄလႅင် မိူင်းယုၼ်ႊၼၢၼ်ႊ ၾိုၵ်းပၼ် ၾၢႆႇပၢႆးယူႇလီ ဝႃႉ လီငၢမ်းယဝ်ႉဝႃႈၼႆ။

ၵွၼ်ႇၶိူင်ႈၸၢၵ်ႈၵူတ်ႇထတ်းၸိူဝ်ႉမႅင်းၶူဝ်ႊဝိတ်ႉ 19 ပႆႇမႃးၼႆႉ ယူႇတီႈဝႃႉသေ လႆႈဢဝ်ၼမ်ႉမုၵ်ႈ တီႈၵူင်ၶေႃး တင်းၶူးၼင် သူင်ႇပၼ်တၢင်းမိူင်းၶႄႇၵူတ်ႇထတ်းပၼ်။ ယွၼ်ႉဝႃႈ ယူႇၸမ်တိတ်းၸပ်းတၢင်းမိူင်းၶႄႇလႄႈ တေႃႇထိုင်ယၢမ်းလဵဝ် ၼႂ်း ၼႃႈလိၼ်ၽွင်းငမ်းတူဝ်ၵဝ်ႇဝႃႉ ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 ပႆႇမီးသေၵေႃႉ ပိုၼ်ၽၢဝ်ႇဝႆႉဝႃႈၼႆ။

ၼႂ်းၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၼႂ်းမိူင်းႁူမ်ႈတုမ် ၼႆႉ တပ်ႉသိုၵ်းဝႃႉ UWSA မီးဢဵၼ်ႁႅင်းယႂ်ႇ သေပိူၼ်ႈ။ ယဝ်ႉၵေႃႈ ပဵၼ်ၽူႈၼမ်း ၸုမ်းဢုပ်ႇဢူဝ်းၵၢၼ်မိူင်း FPNCC ၼႂ်းၸုမ်းဢူၺ်းလီ 7 ပွတ်းႁွင်ႇၵေႃႈၸႂ်ႈ ၼႆယဝ်ႉ။