ၼႂ်းဝူင်ႈၼႆႉ ၵူၼ်းမိူင်းတႆး ပွတ်းဢွၵ်ႇၶူင်း ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 ပုင်ႈ ၶိုၼ်ႈတူပ်ႉၼႅပ်ႇ ယၢမ်းလဵဝ် မီးထိုင် 104 ၵေႃႉယဝ်ႉ ဝႃႈၼႆ။
ၼႂ်းၶၢဝ်းတၢင်း 2 ဝူင်ႈမႃး တေႃႇထိုင်ဝၼ်းတီႈ 7/12/2020 ၼႆႉ ၼႂ်းၸိုင်ႈတႆးပွတ်း ဢွၵ်ႇၶူင်း ၵူၼ်းတိတ်းၸပ်းၸိူဝ်ႉမႅင်းၶူဝ်ႊ ဝိတ်ႉ 19 တင်းမူတ်းမီးၵႂႃႇ 104 ၵေႃႉ။ ၼႂ်း ၼၼ်ႉပဵၼ် တႃႈၶီႈလဵၵ်း 75 ၵေႃႉ၊ မိူင်းတူၼ် 7 ၵေႃႉ၊ မိူင်းယွင်း 7 ၵေႃႉ၊ မိူင်းပဵင်း 3 ၵေႃႉ၊ မိူင်းယၢင်း 3 ၵေႃႉ၊ မိူင်းသၢတ်ႇ 2 ၵေႃႉ ။
Dr. ပႃႉၸူဝ်းတႅတ်ႉ ၵႅမ်ၽူႈၸီႉသင်ႇႁွင်ႈၵၢၼ်ပၢႆးယူႇလီ ပွတ်းဢွၵ်ႇၶူင်း လၢတ်ႈဝႃႈ – “ ၼႂ်းၵူၼ်း ပဵၼ် 104 ၵေႃႉၼၼ်ႉ လႆႈ ၶႂၢင်ႉလူင်းႁူင်းယႃၵႂႃႇယဝ်ႉ 18 ၵေႃႉ။ ၼင်ႇႁိုဝ် တၢင်းပဵၼ်ပေႃး တေဢမ်ႇၽႄႈလၢမ်းႁၢဝ်ႈႁႅင်းၼၼ်ႉ သင်ပဵၼ်လႆႈ ၶႂ်ႈႁႂ်ႈ ၵူၼ်းမိူင်း ႁဝ်းၶႃႈ ႁဵတ်းၸွမ်း ၶေႃႈၸီႉသင်ႇ ပၢႆးယူႇလီမေႃယႃၶဝ်သင်ႇဝႆႉၼၼ်ႉ ႁႂ်ႈဢွၼ်ၵၼ် ယူႇၼႂ်းႁိူၼ်းယေး တႃႇၶၢဝ်း တၢင်း 2 ဝူင်းၼႆ တၢင်းပဵၼ်ၼႆႉ တိုၼ်းဝႃႈလူတ်းယွမ်း လူင်းၵႂႃႇယဝ်ႉ” – ဝႃႈၼႆ။
ယၢမ်းလဵဝ် ယွၼ်ႉၵူၼ်းမိူင်း ဢမ်ႇၸွမ်းၶေႃႈ ၼႄႉၼမ်း ဢၼ်မေႃယႃ ၸီႉသင်ႇ၊ ဢွၼ်ၵၼ် ၵႂႃႇဝဵင်းတႂ်ႈ ဝဵင်းၼိူဝ် ဢမ်ႇဝႄႈတီႈၵူၼ်းၶွၼ်ႈၵိုၼ်း ၸိူဝ်းၼႆႉ ႁဵတ်းႁႂ်ႈၵုမ်းၵမ် တၢင်းပဵၼ် ၶူဝ်ႊဝိတ်ႉယၢပ်ႇ ၶူးမေႃယႃ ၼၼ်ႉ သိုပ်ႇလၢတ်ႈထႅင်ႈၼင်ႇၼႆ။
“တႃႇတေၵူတ်ႇထတ်းၵူၼ်းပဵၼ်ၼႆႉ ပဵၼ်ဢၼ်ယၢပ်ႇၽိုတ်ႇဝႆႉတႄႉၶႃႈဢေႃႈ။ ဢၼ် တေပဵၼ်မႃးတႄႉ ႁၢၼ်ႉ KTV ၸွမ်း ႁူင်းႁႅမ်း ႁွင်ႈၼူတ်ႈ ၸိူဝ်းၼႆႉ။ ၽႂ်တိတ်း ဢမ်ႇတိတ်း တၢင်းပဵၼ် ဢမ်ႇႁူႉလႄႈ တႃႇတေၵူတ်ႇထတ်းၵၼ် ႁႂ်ႈၵူႈၵေႃႉၼႆႉ ယၢပ်ႇၵျႃႉ” – Dr. ပႃႉ သူဝ်းထႅၵ်ႇ လၢတ်ႈၼႄၼင်ႇၼႆ။
ယၢမ်းလဵဝ် ၼႂ်းမိူင်းႁူမ်ႈတုမ်ၼႆႉ ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တင်းမူတ်း 99,155 ၵေႃႉ၊ ယူတ်းယႃ 19,409 ၵေႃႉ၊ ယႃၶႅၼ်း 77,636 ၵေႃႉလႄႈ လူႉ တၢႆ 2,110 ၵေႃႉ ယူႇတီႈႁွင်ႈ ၵၢၼ်ပၢႆးယူႇလီ မိူင်းႁူမ်ႈတုမ် ဢွၵ်ႇဝႆႉၼင်ႇၼႆ။
