ၽူႈၸၢႆးဢႃယု 37 ပီ ၵေႃႉၼိုင်ႈ တီႈၸႄႈဝဵင်းမိူင်းၽျၢၵ်ႈ ထုၵ်ႇၽၼ်းတၢႆထင်တီႈ ၼႂ်းတူင်ႈၼႃး ဝႃႈၼႆ။
ဝၼ်းတီႈ 3/12/2020 ယၢမ်းဝၢႆးဝၼ်း 4 မူင်းပၢႆ ၵူၼ်းဝၢၼ်ႈၵႂႃႇထူပ်းႁၼ် တူဝ်တၢႆ ၸၢႆးယီႈ ဢႃယု 37 ပီ ထုၵ်ႇၽၼ်းသႂ်ႇတီႈ တူဝ်မၼ်းၸၢႆး ဢမ်ႇယွမ်း 10 ႁွႆး တီႈ ၼႂ်းတူင်ႈၼႃး ဢိူင်ႇသေးတၢၼ်း ၸႄႈဝဵင်းမိူင်းၽျၢၵ်ႈ ၸႄႈတွၼ်ႈတႃႈၶီႈ လဵၵ်း ၸိုင်ႈတႆးပွတ်းဢွၵ်ႇၶူင်း ။
လုင်းၸၢႆးသႅင်ႁွင် ၵေႃႉပဵၼ်လုင်း ၸၢႆးယီႈ လၢတ်ႈဝႃႈ – “ပဵၼ်လၢၼ်ၸၢႆးၶႃႈဢေႃႈ ဢၼ်ၺႃးၽၼ်းတၢႆၼႆႉ မၼ်းၸၢႆးၺႃး ၽၼ်းတီႈတူဝ် ဢမ်ႇယွမ်း 13 ႁွႆးၼႆႉၶႃႈ။ ၵူၼ်းႁႅမ်မၼ်းၼၼ်ႉ ပဵၼ်ၸၢဝ်းမၢၼ်ႈ ဢမ်ႇမီးတီႈယူႇတီႈၵိၼ် မႃးမူၵ်းယူႇၸွမ်း သုမ်ႉ ၸွမ်းထဵင်ၼႃးၼႆႉၵူၺ်းၶႃႈ။ ယၢမ်းလဵဝ် ပလိၵ်ႈ တီႉၺွပ်းလႆႈ 2 ၵေႃႉၶႃႈ ဝႆႉယဝ်ႉ”- ဝႃႈၼႆ။
ယူႇတီႈပလိၵ်ႈတီႉလႆႈ တူဝ်ၵူၼ်းႁၢႆႉ ၸိုဝ်ႈ ႁွင်ႉဝႃႈ မွင်ႇ သၢၼ်းလုၼ်ႇ (ႁွင်ႉ) ငႄႇလေး။ ထႅင်ႈၵေႃႉ ၼိုင်ႈဢမ်ႇႁူႉၸိုဝ်ႈ ဢႃယု တေမီး 60 ပၢႆ လုင်းၸၢႆးသႅင်ႁွင် သိုပ်ႇလၢတ်ႈၼႄ ၼင်ႇၼႆ။
ဝၼ်းတီႈ 4/12/2020 ယူႇတီႈၸၢဝ်းၶိူဝ်းပီႈၼွင်ႉ ၸၢႆးယီႈ လႆႈပူၼ်ႉၶၢပ်ႈတူဝ် တၢႆမၼ်းၸၢႆးၵႂႃႇယဝ်ႉ ဝႃႈၼႆ။
ၸၢႆးယီႈၼႆႉ ပဵၼ်လုၵ်ႈၸၢႆးလုင်းဢွတ်ႉ ပႃႈသႅင်ဢူၺ်ႈ ၵူၼ်းဝၢၼ်ႈဝဵင်းမႆႇ ၼႆယဝ်ႉ။
လုင်းၸၢႆးသႅင်ႁွင် လၢတ်ႈဝႃႈ – “လၢၼ်ၸၢႆးၶႃႈၼႆႉ ပဵၼ်ၵူၼ်းၵေႃႉလဵဝ် ပႆႇမီးၼႃႈႁိူၼ်းၶႃႈ ယဝ်ႉၵေႃႈ ပဵၼ်ၵူၼ်းသူပ်းၼၵ်း ပဵၼ်ၵူၼ်းသိုဝ်ႈယူဝ်း ဢမ်ႇမေႃၵိၼ်လဝ်ႈ မၼ်းၸၢႆးပဵၼ်ၵူၼ်းၵႃႉၶၢႆသိုဝ်ႉဝူဝ်းၵႂၢႆး ပေႉၵႃႈႁိုဝ် သိုဝ်ႉၶၢႆ ၵႃႈၼၼ်ႉ လွင်ႈလႆႈ ပဵၼ်ၵႂႃႇၸိူင်ႉၼႆ ႁဝ်းၶႃႈ ၸိူဝ်းပဵၼ်ပီႈၼွင်ႉ ပဵၼ်ဢၼ်ၸႂ်ဢမ်ႇလီၶႃႈ။ ၸဵပ်းၸႂ်ၶႃႈဢေႃႈ”- ဝႃႈၼႆ။
ဢိင်ၼိူဝ်လွင်ႈပိူင်ပဵၼ်ၼႆႉသေ ယူႇတီႈပလိၵ်ႈၸႄႈဝဵင်းမိူင်းၽျၢၵ်ႈ လႆႈပိုတ်ႇလိူင်ႈ ၸွႆးတြႃးၵူၼ်းၶႃႈႁႅမ်ၸၢႆးယီႈၼၼ်ႉ ဝႆႉ တီႈႁူင်းပလိၵ်ႈယဝ်ႉ ဝႃႈၼႆ။