ၵေႃလိၵ်ႈလၢႆး ၵဵင်းမႂ်ႇ ပိုၼ်ၽၢဝ်ႇ တေဢမ်ႇၸတ်းပၢင်ပွႆးပီမႂ်ႇတႆး

ပၢင်ပွႆးႁူမ်ၸူမ်းႁပ်ႉတွၼ်ႈပီမႂ်ႇတႆး 2115 ၼီႈ တေထိုင်ၼႆႉ ယူႇတီႈၵေႃလိၵ်ႈလၢႆး ၵဵင်းမႂ်ႇ တေဢမ်ႇၸတ်းႁဵတ်းပၢင်ပွႆး တၢင်းၵႃႈဝႅၼ်ႈ လဝ်ႇမူၼ်ႈတူၼ်ႈၸႂ် မိူၼ်မိူဝ်ႈၵူႈပီယဝ်ႉ၊ တေလူႇၶဝ်ႈမႂ်ႇၼမ်ႉမႂ်ႇၸွမ်းၼင်ႇၾိင်ႈထုင်းမီးဝႆႉၵူၺ်းဝႃႈၼႆ။

မိူဝ်ႈၼႆႉ ဝၼ်းတီႈ 4/12/2020 ယူႇတီႈၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႂ်ႇ ပိုၼ်ၽၢဝ်ႇ ဢွၵ်ႇမႃးဝႃႈ ၼႂ်းတိုဝ်ႉတၢင်းဝၼ်း ပီမႂ်ႇတႆး 2115 ၼီႈ ပီႁုင်ႉပဝ်ႈ (ပီဝူဝ်း) ပီၼႆႉ တေဢမ်ႇၸတ်းႁဵတ်းပၢင်ပွႆး တၢင်းၵႃႈဝႅၼ်လဝ်ႇမူၼ်ႈတူၼ်ႈၸႂ်ယဝ်ႉလႄႈ တေၸတ်း ႁဵတ်းပၢင်လူႇတၢၼ်းၶဝ်ႈမႂ်ႇ မိူၼ်ၵူႈပီပိူင်လဵဝ် ၸွမ်းၼင်ႇၾိင်ႈႁိတ်ႈႁွႆးတႆး ၼႂ်းဝၼ်းပီမႂ်ႇလိူၼ်ၸဵင်မႂ်ႇ ၼိုင်းဝၼ်းတီႈဝတ်ႉၵူႇတဝ်ႈ ဢိူင်ႇသီၽုမ်း ၸႄႈဝဵင်းၵဵင်းမႂ်ႇ ၸိုင်ႈထႆး ၼႆယဝ်ႉ။

ၸၢႆးသႅင်ယ ႁူဝ်ပဝ်ႈ ၵေႃလိၵ်ႈလၢႆး ၵဵင်းမႂ်ႇ လၢတ်ႈဝႃႈ – “တႃႇတေၸတ်းႁဵတ်းပၢင်ပွႆး ႁူမ်ၸူမ်းႁပ်ႉတွၼ်ႈပီမႂ်ႇတႆး ပီၼႆႉ ႁဝ်းၶႃႈ လႆႈဢုပ်ႇၵၼ် လၢႆလၢႆၾၢႆႇ မိူၼ်ၼင်ႇ တၢင်းဝတ်ႉ၊ တင်းၶျုမ်ႊၶျူၼ်ႊဝၢၼ်ႈၵူႇတဝ်ႈလႄႈတၢင်းၾၢႆႇလူလွမ်ၵိၸ်ႇၵၢၼ်ဝတ်ႉ ၸိူဝ်းၼႆႉသေ ၵွပ်ႈဝႃႈတၢင်းပဵၼ်ၶူဝ်ႊဝိၻ်ႉယင်းတိုၵ်ႉလွၵ်ႇငိုတ်ႈယူႇလႄႈ  ႁဝ်းၶႃႈမီးလွင်ႈလႆႈၸႂ်ၵၼ်သေ ၵိုတ်းဝႆႉၵၢၼ်လဝ်ႇမူၼ်ႈတူၼ်ႈၸႂ်ၵူႈလွင်ႈလွင်ႈယဝ်ႉ”- ဝႃႈၼႆ။

ၵွပ်ႈၼၼ်လႄႈပီမႂ်ႇတႆး 2115 ပီၼႆႉ ႁဝ်ႊၶႃႈတေမီးပၢင်လူႇတၢၼ်းၶဝ်ႈမႂ်ႇသေႁပ်ႉသိလ်ႁပ်ႉပွလ်းၽွၼ်းလီပီမႂ်ႇ ဢိၵ်ႇတင်းၵႃရဝၵူၼ်းထဝ်ႈပိူင်လဵဝ်ၵူၺ်းၼႆဢေႃႈ။

ၶပ်ႉမၢႆပၢင်လူႇတၢၼ်းၶဝ်ႈမႂ်ႇ ၼႂ်းဝၼ်းပီမႂ်ႇ ဝၼ်းတီႈ 15/12/2020 ယၢမ်းၵၢင်ၼႂ် 9 မူင်းၶိုင်ႈ တေလူႇတၢၼ်းၶဝ်ႈမႂ်ႇ ႁပ်ႉ သိလ်းဝၼ်းပီမႂ်ႇ၊ ယၢမ်း 10 မူင်းၶိုင်ႈသမ်ႉ တေၵႃရဝ ၵူၼ်းထဝ်ႈ၊ ယဝ်ႉ ၵေႃႈ လူႇတၢၼ်းၽဵလ်း (ၶဝ်ႈၽၵ်းသွမ်းသင်ၶၸဝ်ႈ) ၼႆယဝ်ႉ။

ပၢင်ပွႆးႁပ်ႉတွၼ်ႈပီမႂ်ႇတႆး 2115 ၼီႈ တီႈၵေႃလိၵ်ႈလၢႆး ၵဵင်းမႂ်ႇ ပီၼႆႉ ႁၢင်ႈႁႅၼ်းဝႆႉ တေၸတ်းႁဵတ်း ၼႂ်းဝၼ်းတီႈ 13-15/12/2020 တႃႇၶၢဝ်းတၢင်း 3 ဝၼ်း ဝႃႈၼႆသေတႃႉ ယွၼ်ႉငဝ်းလၢႆးတၢင်းပဵၼ်ၶူဝ်ႊဝိၻ်ႉ 19 ၽႄႈလၢမ်းၼမ်မႃးသေ ၸင်ႇလႆႈတႅပ်းတတ်း ဝႃႈဢမ်ႇၸတ်းႁဵတ်း ၼႆယဝ်ႉ။