ၽွင်းၶၢဝ်းတၢင်းပဵၼ်ၽႄႈလၢမ်းႁၢဝ်ႈႁႅင်းၼႆႉ ၸုမ်းၵႅတ်ႇၵင်ႈတၢင်းပဵၼ်ၶူဝ်ႊဝိတ်ႉ19 ဝဵင်းမိူင်းယၢင်း ၸိုင်ႈတႆးပွတ်းဢွၵ်ႇၶူင်း ဢွၵ်ႇလိၵ်ႈ ႁၢမ်ႈၵူၼ်းမိူင်းၼႂ်းပိုၼ်ႉတီႈ ဢွၵ်ႇၶၢဝ်းတၢင်းၵႂႃႇမႃး တၢင်းဝဵင်းတႃႈၶီႈလဵၵ်း။

မိူဝ်ႈဝၼ်းတီႈ 01/12/2020 ဢိင်ၼိူဝ်တၢင်းပဵၼ်ၸိူဝ်ႉမႅင်းၶူဝ်ႊဝိတ်ႉ 19 လၢမ်းၽႄႈႁၢဝ်ႈႁႅင်း ပွတ်းဝဵင်းတႃႈၶီႈလဵၵ်း၊ ၶၢဝ်းတၢင်းၼိုင်ႈဝူင်ႈၵူၺ်း ႁူဝ်ၼပ်ႉၵူၼ်းပဵၼ်ပုင်ႈၶိုၼ်ႈၼမ်ထိုင် ႁိမ်း 50 ၵေႃႉလႄႈ ယူႇတီႈ ၸုမ်းၵႅတ်ႇၵင်ႈ တၢင်းပဵၼ်ၶူဝ်ႊဝိတ်ႉ19 ဝဵင်းမိူင်းယၢင်း ၸႄႈတွၼ်ႈၵဵင်းတုင် ၸိုင်ႈတႆးပွတ်းဢွၵ်ႇၶူင်း ဢွၵ်ႇလိၵ်ႈပၼ်ၾၢင်ႉ ႁၢမ်ႈၵူၼ်းမိူင်းၼႂ်းပိုၼ်ႉတီႈ ဢွၵ်ႇၶၢဝ်းတၢင်းၵႂႃႇမႃး တၢင်းတႃႈၶီႈလဵၵ်း ၼႆယဝ်ႉ။

ဢူးၸေႃႇလိၼ်းထႅတ်ႉ ႁူဝ်ပဝ်ႈၸုမ်းၵႅတ်ႇၵင်ႈတၢင်းပဵၼ်ၶူဝ်ႊဝိတ်ႉ 19 ဝဵင်းမိူင်းယၢင်း လၢတ်ႈတီႈၸုမ်းၶၢဝ်ႇ ၽူႈတွႆႇႁွၵ်ႈဝႃႈ- “ၼႂ်းမိူင်းတႆးပွတ်းဢွၵ်ႇၶူင်း တီႈဝဵင်းတႃႈၶီႈလဵၵ်းၼႆႉ ၶၢဝ်းတၢင်းဝူင်ႈၼိုင်ႈၵူၺ်း မီးၵူၼ်းတိတ်းၸပ်း တၢင်းပဵၼ်ၼမ်မႃး ႁႅင်းတႄတႄႉ။ ယွၼ်ႉၼၼ်လႄႈ ႁဝ်းၶႃႈလၢႆၾၢႆႇၸင်ႇလႆႈဢုပ်ႇၵုမ်ၵၼ်သေ ဢွၵ်ႇလိၵ်ႈပိုၼ်ၽၢဝ်ႇ ပိၵ်ႉဢိုတ်းဝႆႉ၊ ၼွၵ်ႈလိူဝ်သေ ၾၢႆႇပၢႆးယူႇလီလႄႈ ၽူႈမီးၵၢၼ်ငၢၼ်းဢၼ်လမ်ႇလွင်ႈၸိူဝ်းၼၼ်ႉ တေဢမ်ႇလႆႈ ဢွၵ်ႇၶၢဝ်းတၢင်း ၵႂႃႇၸူးၾၢႆႇတၢင်းဝဵင်းတႃႈၶီႈလဵၵ်းလႃးလႃး” ဝႃႈၼႆ။

ဝဵင်းတႃႈၶီႈလဵၵ်းၼႆႉ ပဵၼ်လႅၼ်လိၼ်တိတ်းၸပ်းမိူင်းထႆး ဝဵင်းမႄႈသၢႆ မီးမႄႈၼမ်ႉသၢႆတတ်းၶႅၼ်ႈၵၢင်ဝႆႉ၊ ပဵၼ်ဝဵင်းၵႃႉၶၢႆပၢႆးမၢၵ်ႈမီးၶိုၼ်ႈယႂ်ႇဝဵင်းၼိုင်ႈလႄႈ ၶႅၵ်ႇၼွၵ်ႈမိူင်း ၼႂ်းမိူင်းၵေႃႈ မႃးဢႅဝ်ႇတွင်ႈတဵဝ်းၼမ်၊ ပၼ်ႁႃၵေႃႈၼမ်၊ ပဵၼ်ဝဵင်းပၵ်းႁွင်ႈၵၢၼ်လူင်ပွင်ၸိုင်ႈၵူႈႁွင်ႈၵၢၼ်။

ၵူၺ်းၵႃႈ တင်ႈတႄႇၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 လၢမ်းၽႄႈမႃးၶၢဝ်းတၢင်း 7-8 လိူၼ်ၼႆႉ ၵုမ်းတၢင်းပဵၼ် လႆႈလီယူႇသေတႃႉ တင်ႈဢဝ်ဝၼ်းတီႈ 25 လိူၼ်ၼူဝ်ႊဝႅမ်ႊပိူဝ်ႊ မႃးတေႃႇထိုင်ယၢမ်းလဵဝ် ၼႂ်းၶၢဝ်းတၢင်း ၼိုင်ႈဝူင်ႈၵူၺ်း ၵူၼ်းတိတ်းၸပ်းတၢင်းပဵၼ် ပုင်ႈၶိုၼ်ႈၼမ်ထိုင်ႁိမ်းၸမ် 50 ၵေႃႉ။ ၵွပ်ႈၼႆလႄႈ သင်ဝႃႈၵူၼ်းမိူင်းယၢင်း မီးလွင်ႈတၢင်းလမ်ႇလွင်ႈလိူဝ်ႁႅင်းလႄႈတေလႆႈၵႂႃႇတႃႈၶီႈလဵၵ်းၼႆၸိုင် ႁႂ်ႈလုမ်းလႃးႁဵတ်းၸွမ်းလွင်ႈႁႄႉၵင်ႈတၢင်းပဵၼ်။

“ၵူၼ်းၸပ်းတၢင်းပဵၼ်ၵေႃႈ ၼမ်ၶိုၼ်ႈမႃးၵူႈဝၼ်း။ ၵွပ်ႈပိူဝ်ႈၼၼ် ပေႃးမီးၵၢၼ်လမ်ႇလွင်ႈ လူဝ်ႇဢွၵ်ႇၶၢဝ်းတၢင်း ၵႂႃႇၸူးတၢင်း ဝဵင်းတႃႈၶီႈလဵၵ်းၸိုင် တေလႆႈဢဝ်ဝႂ်ႁပ်ႉႁွင်းတီႈ ၸုမ်းၵႅတ်ႇၵင်ႈတၢင်းပဵၼ်လႄႈၽူႈၵွၼ်းပွၵ်ႉ/ဝၢၼ်ႈ/ ဢိူင်ႇၽႂ်မၼ်းသေၵႂႃႇ၊ ပေႃးၶိုၼ်းပွၵ်ႈမႃးၼႆ  တၵ်းတေလႆႈၶဝ်ႈၵုမ်းၵၵ်းတူဝ် ၸွမ်းၼင်ႇႁွင်ႈၵၢၼ် ၾၢႆႇပၢႆးယူႇလီ ပိုၼ်ၽၢဝ်ႇဝႆႉၼၼ်ႉၶႃႈဢေႃႈ” ဢူးၸေႃႇလိၼ်းထႅတ်ႉ သိုပ်ႇလၢတ်ႈထႅင်ႈၼင်ႇၼႆ။

ယွၼ်ႉပိူဝ်ႈၵူၼ်းတိတ်းၶူဝ်ႊဝိတ်ႉ 19 တီႈတႃႈၶီႈလဵၵ်း ၼမ်ၶိုၼ်ႈမႃးႁၢဝ်ႈႁႅင်းသေ ၵူၼ်းတၢင်ႇတီႈသီႇလႅၼ် ဢၼ်ႁဵတ်းၵၢၼ်တီႈဝဵင်းတႃႈၶီႈလဵၵ်းၵေႃႈ ဢွၼ်ၵၼ်ပွၵ်ႈၶိုၼ်းႁိူၼ်းၽႂ်မၼ်း။ ၼင်ႇႁိုဝ်တူဝ်ၸဝ်ႈၵဝ်ႇလႄႈ ၵူၼ်းႁိူၼ်း ၵူၼ်းဝၢၼ်ႈ ၸဝ်ႈၵဝ်ႇ တေလွတ်ႈၽေး တၢင်းပဵၼ်ၼၼ်ႉ ၽူႈတႅၼ်းၽွင်းသၽႃးၵေႃႈ တိုၵ်းသူၼ်းႁႂ်ႈၵူၼ်းမိူင်းႁဵတ်း ၸွမ်းၼင်ႇႁွင်ႈၵၢၼ်ပၢႆးယူႇလီ ပိုၼ်ၽၢဝ်ႇဝႆႉ။  

ၸၢႆးလိူၼ်ၶမ်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 1 ဝဵင်းမိူင်းယၢင်း ပႃႇတီႇသၢင်ႇသီႈ USDP လၢတ်ႈဝႃႈ “ပေႃးဝႃႈမီးၵၢၼ်လမ်ႇလွင်ႈလႄႈ တေလႆႈၵႂႃႇၵေႃႈ တေလႆႈဢဝ်လိၵ်ႈႁပ်ႉႁွင်း တီႈၽူႈၵွၼ်းပွၵ်ႉသေၵႂႃႇ၊ ပေႃးမႃးၶိုၼ်း တေလႆႈၶဝ်ႈၵုမ်းၵၵ်းတူဝ်ႁင်းၽႂ်မၼ်း၊ ပေႃးပဵၼ်ၵူၼ်းဢၼ်ဢမ်ႇလီထၢင်ႇထိူမ်တႄႉ တေလႆႈၵၵ်းတူဝ်တီႈႁိူၼ်း၊  ၵူၺ်းၵႃႈ ပေႃးဝႃႈပဵၼ် ၵူၼ်းဢၼ်လီထၢင်ႇထိူမ် ဢမ်ႇၼၼ် ၵူၼ်းမီးၾၢင်ႁၢင်ႈတၢင်းပဵၼ်တႄႉ တေလႆႈၶဝ်ႈၵၵ်းတူဝ် တီႈႁူင်းၵၵ်းတူဝ် ဢၼ်မၵ်းမၼ်ႈဝႆႉၼၼ်ႉၶႃႈဢေႃႈ။ ႁႂ်ႈၵူၼ်းမိူင်းဢွၼ်ၵၼ်ႁၵ်ႉတူဝ်ၸဝ်ႈၵဝ်ႇ ဝၢၼ်ႈမိူင်းၸဝ်ႈၵဝ်ႇ သေ ဢွၼ်ၵၼ်ႁဵတ်းသၢင်ႈၸွႆႈႁႄႉၵင်ႈတၢင်းပဵၼ်ၵၼ်ၵူႈၵေႃႉသေၵမ်းၶႃႈ” ဝႃႈၼႆ။

ဝဵင်းမိူင်းယၢင်းၼႆႉ ၵူၼ်းဝၢၼ်ႈၵူၼ်းမိူင်းႁဵတ်းၵၢၼ်ၵႃႉၶၢႆ ဢွၵ်ႇၶၢဝ်းတၢင်းၵႂႃႇမႃး ဝဵင်းၵဵင်းတုင်-တႃႈၶီႈလဵၵ်း တႃႇသေႇ၊ ၾၢႆႇၼိုင်ႈ တီႈမိူင်းယၢင်းၵေႃႈ ယၢမ်ႈမီးၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ-19 မႃးလႄႈ တေႃႇထိုင်ယၢမ်းလဵဝ်   ၸုမ်းၵႅတ်ႇၵင်ႈတၢင်းပဵၼ်ၶူဝ်ႊဝိတ်ႉ -19 ဝဵင်းမိူင်းယၢင်း တိုၵ်ႉဝႆႉၼၵ်းႁဵတ်းၸွမ်းပိူင်ၵၢၼ်ၵႅတ်ႇၵင်ႈ တၢင်းးပဵၼ်ယူႇ။

ၼွၵ်ႈသေၼၼ်ႉ တီႈမိူင်းယၢင်းၼႆႉ မိူဝ်ႈပူၼ်ႉမႃး တင်ႈဢဝ်ၽွင်းႁူဝ်လိူၼ်သႅပ်ႊထႅမ်ႊပိူဝ်ႊ တေႃႇထိုင်ၽွင်း ႁၢင်လိူၼ်ၼၼ်ႉ ယၢမ်ႈမီးၵူၼ်းမိူင်းရၶႅင်ႇ ဢၼ်မႃးၵိၼ်ၸၢင်ႈႁဵတ်းၵၢၼ် တၢင်းမိူင်းယၢင်း- သိူဝ်လိုဝ်း ၼၼ်ႉ ၸပ်းတၢင်းပဵၼ်ၶူဝ်ႊဝိတ်ႉ 19 သၢမ်ၵေႃႉ၊ လႆႈသူင်ႇယူတ်းယႃတီႈ ႁူင်းယႃၵဵင်းတုင်။ ၽွင်းၼၼ်ႉၵေႃႈ ႁႂ်ႈ ၵူၼ်းမိူင်းယူႇႁိူၼ်း၊ ႁၢမ်ႈဢွၵ်ႇတၢင်းၼွၵ်ႈသေ ဢမ်ႇၵႃး ရူတ်ႉၵႃး ဢၼ်တေႃႉတၢင်ႇၵူၼ်း၊ မိူင်းယၢင်း – သိူဝ်လိုဝ်း – မိူင်းလႃး ၊ မိူင်းယၢင်း – မိူင်းၶၢၵ်ႇ – ၵဵင်းတုင် ၊ မိူင်းယၢင်း ၶဝ်ႈဢွၵ်ႇ တၢင်း မိူင်းၽႅၼ် – ႁူဝ်တဝ်း – မိူင်းပွၵ်ႉ ၸိူဝ်းၼႆႉၵေႃႈ ဢိုတ်းသဵင်ႈ။