ၶၢဝ်းၶူဝ်ႊဝိတ်ႉ ၽႄႈလၢမ်းၶိုၼ်းႁၢဝ်ႈႁႅင်းၼႆႉ ၵူၼ်းမိူင်းတႆး ၸိူဝ်းႁူပ်ႉတၢင်းယၢပ်ႇ လၢႆပိူင်၊ ၵမ်ႈၽွင်ႈ ၺႃးၶွၵ်ႈ ထုၵ်ႇထႆး သူင်ႇပွၵ်ႈ မိူင်းၶိုၼ်း 100 ၵေႃႉပၢႆ ၊ ၽူႈယႂ်ႇၸႂ်လီ တီႈတႃႈၶီႈလဵၵ်း လၢႆၸဝ်ႈ သၢၼ် မိုဝ်းၵၼ်ၸွႆႈထႅမ် ၶဝ်ႈၼမ်ႉငိုၼ်းတွင်း ၽွင်းၶၢဝ်းၵၵ်းတူဝ် 21 ဝၼ်း။

ဢၼ်ၺႃးၵုမ်းၵၵ်းတူဝ်ဝႆႉတီႈ သုၼ်တိုဝ်းၵမ်ထမ်း “မိုးကုတ်ဝိပဿနာ” မီး ၵူၼ်း 120 ၵေႃႉ ၊ ပႃး ၵူၼ်းမိူင်း တႃႈၶီႈလဵၵ်း 28 ၵေႃႉ၊ ၵူၼ်းမိူင်းသၢတ်ႇ 12 ၵေႃႉ၊ လိူဝ်ၼၼ်ႉ ပဵၼ်ၵူၼ်း မိူင်းတႆး ပွတ်း ၸၢၼ်း၊ ပွတ်းႁွင်ႇ ၊ ၵူၼ်းတၢင်ႇတီႈသီႇလႅၼ်ၵေႃႈပေႃး။ ၵူၼ်းၸိူဝ်းၼႆႉ ၺႃးၵၵ်းတူဝ်တဵမ် 14 ဝၼ်း မိူဝ်ႈဝၼ်း 27 သေတႃႉ ပႆႇလႆႈပွၵ်ႈႁိူၼ်း တၵ်းတေလႆႈၵၵ်းတူဝ် ယူႇတဵမ် 21 ဝၼ်းယဝ်ႉ ၸင်ႇလႆပွၵ်ႈဝၢၼ်ႈၽႂ်မိူင်းမၼ်းဝႃႈၼႆ။

ၽူႈယႂ်ႇၸႂ်လီ ဢၼ်တၢမ်တူဝ်လႆႈၵႂႃႇမွပ်ႈၶူဝ်းၶွင်ၵမ်ႉၸွႆႈၼၼ်ႉ လၢတ်ႈၼႄဝႃႈ – “ႁဝ်းၶႃႈ ငိၼ်းဝႃႈ ၶဝ်ႁူပ်ႉတၢင်းယၢပ်ႇတႃႇပွၵ်ႈႁိူၼ်း ပွၵ်ႈယေးၶိုၼ်း ၼႆ ႁွမ်ငိုၼ်းၵၼ် လႆႈ 21.53 သႅၼ်ၵျၢတ်ႉ၊ ငိုၼ်းထႆး 12000 ဝၢတ်ႇ၊ သိုဝ်ႉ ႁေႃႇၶဝ်ႈ တဝ်ႈၼမ်ႉ ၵႂႃႇပၼ် တႃႇၵူၼ်း 120 ၵေႃႉ၊ ၾၢႆႇတူၺ်းလူၶဝ် သမ်ႉမီး 18 ၵေႃႉ၊  ႁူမ်ႈ 138 ၵေႃႉ (ၶဝ်ႈၼိုင်ႈဢႅပ်ႇ ၼမ်ႉၼိုင်ႈတဝ်ႈ 79 ဝၢတ်ႇ)  ႁဝ်းၶႃႈႁူမ်ႈၵၼ်လၢႆၵေႃႉ လၢႆၸဝ်ႈဢေႃႈ။ ” –  ဝႃႈၼႆ။

ၶူဝ်းၶွင်ၵမ်ႉၸွႆႈၸိူဝ်းၼႆႉ ၾၢႆႇၽူႈယႂ်ႇၸႂ်လီလႆႈဢဝ်ၵႂႃႇမွပ်ႈဝႆႉပၼ်တီႈ ၵူဝ်ႇယႄး ၽူႈၵွၼ်းႁွင်ႈၵၢၼ်တူၺ်းလူၽူႈၶဝ်ႈၵၵ်းတူဝ် Quarantine Center တီႈမူဝ်းၵူၵ်ႉဝိပတ်ႉသၼႃႇ ယဝ်ႉဝႃႈၼႆ။

ဢၼ်ႁူမ်ႈငိုၼ်းႁူမ်ႈတွင်းၵၼ်ၵႂႃႇၸွႆႈထႅမ်ၵူၼ်းယၢပ်ႇၽိုတ်ႇယွၼ်ႉၶူဝ်ႊဝိတ်ႉ ပွၵ်ႈၼႆႉပဵၼ်  ၶွမ်ႊပၼီႊ LM ႁၢၼ်ႉၶၢႆ ၶိူင်ႈၵေႃႇသၢင်ႈႁိူၼ်း၊ ၸုမ်းလၢၼ်ႉထွင်းလေႃႇ၊ ၸုမ်းၵေႃပိုတ်ႇပၢင်ႇဢိၵ်ႇ ၽူႈယႂ်ႇၸႂ်လီ လၢႆၸဝ်ႈ သၢၼ်မိုဝ်းၵၼ် ၸွႆႈထႅမ်။

ၶၢဝ်းတၢင်းပဵၼ်ၶူဝ်ႊဝိတ်ႉၼႆႉ ၵူၼ်းမိူင်းမၢၼ်ႈ၊ မိူင်းတႆး ၵႂႃႇႁဵတ်းၵၢၼ် မိူင်းထႆး ဢမ်ႇမီးၵၢၼ်ႁဵတ်း၊ ႁႃၵၢၼ်ဢမ်ႇလႆႈ၊ ဢမ်ႇမီးဝတ်းဝႂ်၊ ၽိတ်းမၢႆ မီႈသေ ၺႃးတီႉ ယဵတ်ႈၶွၵ်ႈ ၸိူဝ်းၼႆႉ သူင်ႇပွၵ်ႈၶိုၼ်း တၢင်းတႃႈၶီႈလဵၵ်း မီးယူႇတႃႇသေႇ။

ၵူၼ်းၸိူဝ်းပွၵ်ႈႁိူၼ်းၼၼ်ႉ ၵမ်ႈၽွင်ႈသမ်ႉ ဢမ်ႇမီးငိုၼ်းၸပ်းတူဝ်သေဢိတ်း၊ တႃႇၸၢႆႇ ၵိၼ်လဵင်ႉ တွင်ႉၵေႃႈဢမ်ႇမီး၊ ပေႃးပွၵ်ႈႁိူၼ်းၵေႃႈ သင်ပဵၼ်ၵူၼ်းမိူင်းတႆး တေလႆႈၶဝ်ႈ ၵုမ်းၵၵ်းတူဝ်လၢႆတီႈ တႃႈၶီႈလဵၵ်း 21 ဝၼ်း၊ ဢမ်ႇၼၼ် ၵုမ်းၵၵ်းတူဝ်တီႈ ဝဵင်းတူၼ်ႈတီး၊ ပေႃးယဝ်ႉ တေလႆႈၵုမ်းၵၵ်းတူဝ် တီႈဝၢၼ်ႈၸဝ်ႈၵဝ်ႇထႅင်ႈ၊ ပေႃးပဵၼ် ဝၢၼ်ႈၸိူဝ်းဢၼ် ဢမ်ႇၶဵင်ႈၶႅင်လွင်ႈႁူမ်ႈလူမ်ႈတေႉ ပွၵ်ႈ မိူဝ်း ယူႇႁိူၼ်း လႆႈၵမ်းသိုဝ်ႈ ၵေႃႈမီး။