ၵူၼ်းတႃႈၶီႈလဵၵ်း 6 ၵေႃႉပေႃႈမႄႈလုၵ်ႈၵႂႃႇဢႅဝ်ႇယဵမ်ႈၵဵင်းတုင် ၵႂႃႇၼွၼ်းတီႈႁူင်းႁႅမ်း၊ ၸဝ်ႈၼႃႈတီႈၶဝ်ႈၵူတ်ႇထတ်း ၶူဝ်ႊဝိတ်ႉပၼ် ၊ ထူပ်းႁၼ်ၸိူဝ်ႉမႅင်းတီႈလုၵ်ႈဢွၼ်ႇဢႃယု 8 ၶူပ်ႇ ၼၼ်ႉ။
ဝၼ်းတီႈ 26/11/2020 ယၢမ်းၵၢင်ၶမ်ႈ ၸဝ်ႈၼႃႈတီႈ လႆႈဢဝ်ၶိူင်ႈၸၢၵ်ႈ RDT ၶဝ်ႈၵူတ်ႇထတ်း ၶူဝ်ႊဝိတ်ႉပၼ် တီႈႁူင်းႁႅမ်း တီႈၼိုင်ႈၼႂ်းၸႄႈ ဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်းသေ ၵူတ်ႇထတ်းထူပ်းႁၼ်ၸိူဝ်ႉမႅင်းတီႈလုၵ်ႈဢွၼ်ႇ ဢႃယု 8 ၶူပ်ႇ ၵေႃႉၼိုင်ႈ ။
Dr. လိၼ်းထုၼ်းဢူး ၵႅမ်ၽူႈၸီႉသင်ႇပၢႆးယူႇလီ ၸိုင်ႈတႆးပွတ်းဢွၵ်ႇၶူင်း လၢတ်ႈဝႃႈ – “ လုၵ်ႈဢွၼ်ႇ ဢၼ်ၵူတ်ႇထတ်း ထူပ်းႁၼ် Positive ၼၼ်ႉ ပဵၼ်လုၵ်ႈဢွၼ်ႇၵူၼ်းတႃႈၶီႈလဵၵ်း မႃးဢႅဝ်ႇလေႇ တီႈၵဵင်းတုင် ၸွမ်းပေႃႈမႄႈမၼ်း” – ဝႃႈၼႆ။
လုၵ်ႈဢွၼ်ႇ ဢႃယု 8 ၶူပ်ႇၼၼ်ႉလုၵ်ႉတႃႈၶီႈလဵၵ်းမႃးဢႅဝ်ႇယဵမ်ႈၸွမ်းပေႃႈမႄႈၵူၼ်းႁိူၼ်းမၼ်း တင်းမူတ်းၶဝ်မႃးၸွမ်းၵၼ် 6 ၵေႃႉ။ ၸိူဝ်းၶဝ် လႆႈဢႅဝ်ႇယႅမ်ႈလေႇတီႈၼႂ်းဝဵင်းၵဵင်းတုင်သေ လႆႈႁူပ်ႉထူပ်းယူႇၸမ်ၵၼ်တင်းၵူၼ်း 31 ၵေႃႉ။ ယၢမ်းလဵဝ် ၸိူဝ်းၶဝ်တင်းမူတ်းထုၵ်ႇၵုမ်းၵၵ်းတူဝ်ဝႆႉယဝ်ႉတႃႇဢဝ်ၼမ်ႉမုၵ်ႈၼမ်ႉလၢႆးသူင်ႇၵူတ်ႇထတ်းထႅင်ႈ ဝႃႈၼႆ။
ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 ၼႂ်းၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်းၼႆႉ တင်းမူတ်းမီး 17 ၵေႃႉ။ ယၢမ်းလဵဝ် ဢၼ်လႆႈ ယူတ်းယႃတူဝ်ဝႆႉယူႇတီႈႁူင်းယႃတႄႉ မီး 3 ၵေႃႉ ဝႃႈၼႆ။
ၼႂ်းမိူင်းႁူမ်ႈတုမ်ၼႆႉ ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 တင်းမူတ်းမီးၵႂႃႇ 85,205 ၵေႃႉ၊ ယူတ်းယႃ 18,714 ၵေႃႉ၊ ယႃၶႅၼ်း 64,645 ၵေႃႉလႄႈ လူႉတၢႆ 1,846 ၵေႃႉ ႁွင်ႈၵၢၼ်ပၢႆးယူႇလီ မိူင်းႁူမ်ႈတုမ် ပိုၼ်ၽၢဝ်ႇဢွၵ်ႇဝႆႉ။
