ယၢမ်းလဵဝ် ၼႂ်းၸိုင်ႈတႆးပွတ်းၸၢၼ်း ၵူတ်ႇထတ်းထူပ်းႁၼ် ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တင်း မူတ်းမီးၵႂႃႇ 242 ၵေႃႉ ၵမ်ႈၼမ် ပဵၼ်ၵူၼ်း လုၵ်ႉတၢင်းတႃႈၵုင်ႈမႃး ႁွင်ႈၵၢၼ်ပၢႆးယူႇလီမိူင်းတႆးပိုၼ်ၽၢဝ်ႇ။
ဝၼ်းတီႈ 20/11/2020 ၼႆႉ ၼႂ်းၸိုင်ႈတႆးပွတ်းၸၢၼ်း ၵူတ်ႇထတ်းတၢင်းပဵၼ်ၶူဝ်ႊဝိတ်ႉ-19 ႁၼ်မႅၼ်ႈတီႈၸဝ်ႈၵႃး၊ ၵူၼ်းမိူင်းလႄႈ ၵူၼ်းလၵ်ႉ ၶဝ်ႈမိူင်းတႆး တင်းမူတ်း မီး 242 ၵေႃႉ။ ၼႂ်းၼၼ်ႉ တႃႇ 136 ၵေႃႉတႄႉ ပဵၼ်ၵူၼ်း လုၵ်ႉတႃႈၵုင်ႈၶိုၼ်ႈမႃး ဝႃႈၼႆ။
Dr. သဝၼၵူဝ်ႇ ၵႅမ်ႁွင်ႈၵၢၼ်ပၢႆးယူႇလီ မိူင်းတႆး ထတ်းသၢင်လၢတ်ႈဝႃႈ – “တၢင်းပဵၼ်ၶူဝ်ႊဝိတ်ႉ 19 ဢၼ်ပဵၼ်ၶိုၼ်ႈမႃး ၵမ်းသွင်ၼႆႉ ၼႂ်းမိူင်းတႆးပွတ်းၸၢၼ်း ဢၼ်ၵူတ်ႇထတ်းထူပ်းႁၼ်ၵမ်ႈၼမ် ပဵၼ်ၸဝ်ႈၵႃးလႄႈ ၵူၼ်းမိူင်းဢၼ်လုၵ်ႉတႃႈၵုင်ႈမႃး ၵမ်ႈၼမ်”- ဝႃႈၼႆ။
မိူဝ်ႈတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်း ပွၵ်ႈၵမ်းၼိုင်ႈၼၼ်ႉတႄႉ ၼႂ်းၸိုင်ႈတႆး ပွတ်းၸၢၼ်း ၵူၼ်းတိတ်းၸပ်းၸိူဝ်ႉမႅင်း ၶူဝ်ႊဝိတ်ႉ 19 မီး 4 ၵေႃႉ။ ထိုင်မႃး တၢင်းပဵၼ်ၽႄႈလၢမ်းပွၵ်ႈၵမ်းသွင်ၼႆႉ ၵူၼ်းတိတ်းၸပ်းတၢင်းပဵၼ် မီး 242 ၵေႃႉ ဝႃႈ ၼႆ။
ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 ၼႂ်းၸိုင်ႈတႆးပွတ်းၸၢၼ်း ဢၼ်ဢမ်ႇမီးပိုၼ်းဢွၵ်ႇတၢင်းၵႂႃႇတႂ်ႈမိူဝ်းၼိူဝ်ၼႆႉ တင်းမူတ်းမီး 48 ၵေႃႉ ဢၼ်လႆႈႁပ်ႉသဵၼ်ႈမၢႆမႃးတေႃႇထိုင်ဝၼ်းတီႈ 20/11/2020 ၼႆႉ။
ၼႂ်းၸိုင်ႈတႆးပွတ်းၸၢၼ်း ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 တင်းမူတ်း မီး 242 ၵေႃႉ။ ယူတ်းယႃတူဝ်ဝႆႉ 75 ၵေႃႉ လူႉတၢႆ 1 ၵေႃႉ ဝႃႈၼႆ။
ယၢမ်းလဵဝ် ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 ၸိူဝ်းၼႆႉ လႆႈထုၵ်ႉၵုမ်းတူဝ်ယူႇဝႆႉဢွင်ႈတီႈၽႂ်မၼ်းလႄႈ ၸႄႈဝဵင်းၽႂ်မၼ်းဝႆႉယူႇ ဝႃႈၼႆ။
ယၢမ်းလဵဝ်ၼႆႉ ၼႂ်းမိူင်းႁူမ်ႈတုမ် ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 တင်းမူတ်းမီး 83,566 ၵေႃႉ၊ လူႉတၢႆ 1,810 ၵေႃႉ၊ ယူတ်းယႃ 18,390 ၵေႃႉ၊ ယႃၶႅၼ်း 63,366 ၵေႃႉ ယူႇတီႈႁွင်ႈၵၢၼ်ပၢႆးယူႇလီ မိူင်းႁူမ်ႈတုမ် ဢွၵ်ႇဝႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ