ဝၼ်းတီႈ 2 မိူဝ်ႈၼႆႉ ၶၼ်ၼမ်ႉမၼ်းၸၢၵ်ႈပုင်ႈၶိုၼ်ႈသုင်ႁႅင်းႁဵတ်းႁႂ်ႈၵူၼ်းမိူင်းတႆးပွတ်းၸၢၼ်းပွတ်းဢွၵ်ႇ တူင်ႉတိုၼ်ႇၼႅတ်ႈႁႃသိုဝ်ႉၼမ်ႉမၼ်း မၢင်ႁၢၼ်ႉထိုင်တီႈလႆႈပိၵ်ႉႁၢၼ်ႉဝႆႉဝႃႈၼႆ။

ပႃႈၼၢင်းၼၢင်း ၵူၼ်းၵႃႉၶူဝ်းၵုၼ်ႇၵိၼ်ယမ်ႉ ၸႄႈတွၼ်ႈလၢင်းၶိူဝ်းလၢတ်ႈၽူႈတွႆႇႁွၵ်ႈဝႃႈ-“ မိူဝ်ႈသိုၼ်းၼမ်ႉမၼ်းၼိုင်ႈလိတ်ႉ 10000 ၵူၺ်း ။ မိူဝ်ႈဝႃး 11000 ။ ထိုင်မိူဝ်ႈၼႆႉ 13000 ပျႃး။ ၶိုၼ်ႈမႃးယိုၵ်ႈယိုၵ်ႈ။ ႁဝ်းၶႃႈၸိူဝ်းပဵၼ်ၸဝ်ႈၵႃး ၸဝ်ႈၵုၼ်ႇၼႆႉ ၼႅတ်ႈၵႂႃႇသိုဝ်ႉမိူဝ်ႈၼႆႉ။ ယၢမ်းၵၢင်ၼႂ်တိုၵ်ႉသိုဝ်ႉလႆႈယူႇ။ ထိုင်ယၢမ်းဝၢႆးဝၼ်းၼႆႉ ႁၢၼ်ႉၼမ်ႉမၼ်းပိၵ်ႉၵႂႃႇလၢႆလၢႆႁၢၼ်ႉ။ ၵမ်ႈၽွင်ႈဢမ်ႇတၼ်းလႆႈ။ ၵပ်းသိုပ်ႇႁႃပီႈၼွင်ႉဝၢၼ်ႈတႂ်ႈမိူင်းၼိူဝ်ပိူၼ်ႈၵေႃႈတူၵ်းၸႂ်ၵၼ်ဢေႃႈ။ ပီႈၼွင်ႉတႃႈၶီႈလဵၵ်းၶဝ်ဝႃႈ ဢမ်ႇမီးၼမ်ႉမၼ်းၶၢမ်ႈၶူဝ်မႃးသေဢိတ်းယဝ်ႉ လႆႈၶဝ်ႈထႅဝ်ၵၼ်သိုဝ်ႉ ၼိုင်ႈလိတ်ႉထိုင် 200 ဝၢတ်ႇၼႆ- မိူဝ်ႈၽုၵ်ႈမိူဝ်ႈႁိုဝ်းတေပဵၼ်ႁိုဝ်မႃးထႅင်ႈဢမ်ႇႁူႉ ” – ဝႃႈၼႆ။

ဝၢႆးလင် ဢီႊရၼ်ႊ လႄႈ ဢမေႊရိၵၼ်ႊ တင်းဢိတ်ႉသ်ရေႊလ် ၶဝ်ပိုတ်းယိုဝ်းၵၼ်တီႈဝၼ်းဢွၵ်ႇၵၢင်သေ ၼိူဝ်ၶၼ်ၼမ်ႉမၼ်းၸၢၵ်ႈၵိုင်ႉၵၢင်ႉပုင်ႈၶိုၼ်ႈႁႅင်း ။ ဝၼ်းမိူဝ်ႈၼႆႉ 2/3/2026 ႁၢၼ်ႉၼမ်ႉမၼ်းဢၼ်ယႂ်ႇ ထိုင်တီႈလႆႈပိၵ်ႉဝႆႉ။

မႄႈလုၵ်ႈဢွၼ်ႇ ၵူၼ်းမိူင်းတႃႈၶီႈလဵၵ်းၵေႃႉၼိုင်ႈၵေႃႈလၢတ်ႈတီႈၽူႈတွႆႇႁွၵ်ႈဝႃႈ- “ၼႂ်ၵႆႈတႄႉ ၶဝ်ႈထႅဝ်ၵၼ်သိုဝ်ႉဢေႃႈၼမ်ႉမၼ်းၼႆႉ။ ပေႃးဝႃႈၼမ်ႉမၼ်းၸၢၵ်ႈၵႃႈယႂ်ႇၼႆၵေႃႈ ၸဝ်ႈဢွၼ်ႇၸဝ်ႈဢိတ်းၸိူဝ်းၼၼ်ႉ သႂ်ႇၶူတ်ႇၼမ်ႉၶၢႆ ၼိုင်ႈလိတ်ႉ 200 ဝၢတ်ႇ(တူၵ်းမႅၼ်ႈငိုၼ်းမၢၼ်ႈမွၵ်ႈ 15000 ပျႃး)။ ဝၼ်းၼိုင်ႈလႄႈဝၼ်းၼိုင်ႈ ပၼ်ႁႃၼႆႉၼႃ။ ၼမ်ႉမၼ်းထႆးၼႆႉ ဢမ်ႇၶဝ်ႈၸဵမ်မိူဝ်ႈဝႃးၶႃႈလူင်။”ဝႃႈၼႆ။

မိူင်းထႆးတႄႉပိုၼ်ၽၢဝ်ႇဝႃႈ ၼႂ်းမိူင်းၶဝ်မီးၼမ်ႉမၼ်းၸၢၵ်ႈ 7660 လၢၼ်ႉလိတ်ႉ။ တွၼ်ႈတႃႇမိူင်းထႆးတႄႉတေပေႃးၸႂ်ႉယူႇတႃႇမွၵ်ႈ 2 လိူၼ်ၼႆႉ – ဝႃႈၼႆ။

ထႆးၼႆႉ ၼမ်ႉမၼ်းၸၢၵ်ႈဢၼ်ၶဝ်သိုဝ်ႉဢဝ်တၢင်ႇမိူင်းမႃးၼၼ်ႉ ၶဝ်ၶိုၼ်းသူင်ႇၶၢႆတေႃႇ မိူင်းႁိမ်းႁွမ်းမိူၼ်ၼင်ႇ မိူင်းမၢၼ်ႈ မိူင်းလၢဝ်းလႄႈ မိူင်းၵမ်ႊပေႃႊတီႊယႃႊ ၸိူဝ်းၼႆႉ။ ၵူၼ်းမိူင်းတႆးပွတ်းဢွၵ်ႇပွတ်းၸၢၼ်းၵမ်ႈၼမ် ၸႂ်ႉၼမ်ႉမၼ်းဢၼ်ဢဝ်မိူင်းထႆးၶဝ်ႈ။