ၽူႈၸၢႆးသွင်ၵေႃႉ ၵူၼ်းၼမ်ႉတူႈ ၵႂႃႇႁႃပႃၸွမ်းၵၼ် တီႈမႄႈၼမ်ႉတူႈသေ ၸူမ် ၼမ်ႉတၢႆ 1 ၵေႃႉ ႁၢႆဝႆႉ 1 ၵေႃႉ ဝႃႈၼႆ။
ဝၼ်းတီႈ 24/11/2020 ယၢမ်းၵၢင်ဝၼ်း ၵူၼ်းဝၢၼ်ႈလႄႈ ၽူႈမီးပုၼ်ႈၽွၼ်း၊ၸုမ်းၸွႆႈထႅမ်ႁူမ်ႈၵၼ်ၸွမ်းသွၵ်ႈႁႃ ။ ၵူၼ်းၸူမ်ၼမ်ႉလႄႈ ဢၼ်ႁၢႆတူဝ်ဝႆႉၼၼ်ႉပဵၼ် ၸၢႆးတဵင်းဢွင်ႇ တင်း ၸၢႆးပႃႉထုၼ်း ။ ထူပ်း ႁၼ်တူဝ်တၢႆ ၸၢႆးတဵင်းဢွင်ႇ ႁိမ်းဝၢၼ်ႈလီလူႉ ၸႄႈဝဵင်းၼမ်ႉတူႈ ။ ၸၢႆးပႃႉထုၼ်း ပႆႇထူပ်းႁၼ်တူဝ် ၼႆယဝ်ႉ။
ၵူၼ်းၼမ်ႉတူႈ ၽူႈတူင်ႉၼိုင်တူင်ႇဝူင်းၵူၼ်း လၢတ်ႈဝႃႈ -“မိူဝ်ႈဝႃးၼႆႉ ထူပ်းႁၼ် တူဝ်တၢႆ ၸၢႆးတဵင်းဢွင်ႇ တီႈႁိမ်းဝၢၼ်ႈလီလူႉ။ တူဝ်ၸၢႆးပႃႉထုၼ်းတႄႉ ထိုင်ယၢမ်းလဵဝ် ပႆႇႁၼ် ၵူၼ်းဝၢၼ်ႈတိုၵ်ႉဢွၼ်ၵၼ်သွၵ်ႈႁႃယူႇ၊ တူဝ်တၢႆ ၸၢႆးတဵင်း ဢွင်ႇၼၼ်ႉတႄႉ လႆႈပူၼ်ႉၶၢပ်ႈတူဝ် ၽဝ်ၵႂႃႇမိူဝ်ႈဝႃးၼၼ်ႉၵမ်းလဵဝ်ၶႃႈယဝ်ႉ” – ဝႃႈၼႆ။
ၸၢႆးတဵင်းဢွင်ႇၼႆႉ ဢႃယု လႆႈ 39 ပီ ပဵၼ်လုၵ်ႈၸၢႆး ပႃႈၶိၼ်ႇ၊ ၸၢႆးပႃႉထုၼ်း ဢႃယု 49 ပီသမ်ႉ ပဵၼ်လုၵ်ႈၸၢႆး ပႃႈၼၢင်း ပဵၼ်ၵူၼ်းဝၢၼ်ႈလီလူႉ ၸႄႈဝဵင်းၼမ်ႉတူႈ ၼင်ႇၵၼ်။
“ပိူင်ပဵၼ်မႃးၼႆႉ မိူဝ်ႈဝၼ်းတီႈ 18 ၼၼ်ႉ ၶဝ်တေဢၢင်ႈၵႂႃႇတၢင်ႇမႆႉ။ ၵႃးသမ်ႉလႅဝ် ၵမ်းၼႆႉ ယၢမ်းဝၢႆးဝၼ်း ႁူဝ်ၶမ်ႈၼႆႉ ၶႃသွင်ၵေႃႉပႃးတၢင်းၼႅင်ႈသေ ဢွၵ်ႇၵႂႃႇႁႃပႃ ဢမ်ႇပွၵ်ႈမႃး ၵူၼ်းႁိူၼ်းမႆႈၸႂ် ဢွၼ်ၵၼ် လမ်းသွၵ်ႈႁႃၸင်ႇႁၼ်တူဝ်တၢႆ ၸၢႆး တဵင်းဢွင်ႇၼႆႉၶႃႈယဝ်ႉ”- ၵူၼ်းပိုၼ်ႉတီႈ ၼမ်ႉတူႈ သိုပ်ႇလၢတ်ႈၼႄႇၼင်ႇၼႆ။
ၸၢႆးပႃႉထုၼ်း ဢႃယု 49 ပီၼၼ်ႉတႄႉ ထိုင်ယၢမ်းလဵဝ် သွၵ်ႈႁႃပႆႇႁၼ် တၢႆႁိုဝ် လိပ်းႁိုဝ် ပႆႇႁူႉ။
မိူဝ်ႈပီၵၢႆၼႆႉ မီးၵူၼ်းၶူဝ်ႊရီႊယိူဝ်ႊ မႃးဢႅဝ်ႇယဵမ်ႈမိူင်းမၢၼ်ႈမိူင်းတႆးသေ မႃးတူၵ်းၼမ်ႉတူႈတၢႆၵေႃႈၼိုင်ႈၼင်ႇၵဝ်ႇ။ၾၢႆႇၸွႆႈထႅမ်လႄႈၸဝ်ႈၼႃႈတီႈၸွႆႈၵၼ်ႁႃၼပ်ႉႁူဝ်လိူၼ်ၵေႃႈဢမ်ႇႁၼ်တူဝ်မၼ်းၼၢင်းၶိုၼ်းလႃးလႃး။