တၢင်းပဵၼ်ၶူဝ်ႊဝိတ်ႉ 19 လၢမ်းၽႄႈထိုင် ၼႂ်းမိူင်းတႆးပွတ်းႁွင်ႇပွတ်းၸၢၼ်းမီး 100 ပၢႆ၊ ႁွင်ႈၵၢၼ်ၾၢႆႇပၢႆးယူႇလီမိူင်းႁူမ်ႈတုမ်  ပိုၼ်ၽၢဝ်ႇဝႃႈ ယၢမ်းလဵဝ် ၵူၼ်းတိတ်းၸပ်းတၢင်းပဵၼ်ၼႂ်းမိူင်းတႆး ၼမ်မႃးထႅင်ႈ 5 ၵေႃႉ  ။

ဝၼ်းတီႈ 23/11/2020 ယၢမ်းႁူဝ်ၶမ်ႈ 5 မူင်း ယူႇတီႈႁွင်ႈၵၢၼ်ပၢႆးယူႇလီ မိူင်းႁူမ်ႈတုမ် ပိုၼ်ၽၢဝ်ႇဢွၵ်ႇမႃး ၼႂ်းမိူင်းႁူမ်ႈ တုမ်ပတ်းပိုၼ်ႉ ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တင်းမူတ်း 1,398 ၵေႃႉ။ ၼႂ်းၼၼ်ႉ ၼႂ်းမိူင်းတႆး ပွတ်းၸၢၼ်း ၵူတ်ႇထတ်းထူပ်းႁၼ် 2 ၵေႃႉလႄႈ ပွတ်းႁွင်ႇ 2 ၵေႃႉ ၼႆယဝ်ႉ။

Dr. သဝၼၵူဝ်ႇ ၵႅမ်ၽူႈၸီႉသင်ႇ ႁွင်ႈၵၢၼ်ပၢႆးယူႇလီ ၸႄႈမိူင်းတႆး လၢတ်ႈဝႃႈ -“မိူဝ်ႈတၢင်းပဵၼ်ၶူဝ်ႊဝိတ်ႉ 19 တႄႇပဵၼ် ၼၼ်ႉတႄႉ ၵူၼ်းႁဝ်းၶႃႈ ဢွၼ်ၵၼ်သႂ်ႇၽႃႈတူမ်းသူပ်း Mask ၵၼ်ယူႇ။ ထိုင်ပဵၼ်မႃး ၵမ်းတီႈသွင်ၼႆႉသမ်ႉ ၵူၼ်းသႂ်ႇ ၽႃႈတူမ်းသူပ်းဢေႇ ၵၢၼ်ပွင်ႇၶၢဝ်ႇပွင်ႇငၢဝ်းၸူး တီႈၽူႈမီးပုၼ်ႈၽွၼ်းလႄႈ ၾၢႆႇပၢႆးယူႇလီၶဝ်ၵေႃႈဢေႇ”- ဝႃႈၼႆ။

ၼႂ်းမိူင်းတႆး ဢၼ်ၵူတ်ႇထတ်းထူပ်းႁၼ် ၵူၼ်းတိတ်းၸပ်းၸိူဝ်ႉမႅင်း 4 ၵေႃႉၼၼ်ႉ တီႈၸႄႈဝဵင်းတူၼ်ႈတီး 1 ၵေႃႉ၊ ပၢင် လွင်း 1 ၵေႃႉ၊ ၼွင်ၶဵဝ် 1 ၵေႃႉလႄႈ လႃႈသဵဝ်ႈ 1 ၵေႃႉ ဝႃႈၼႆ။

မိူဝ်ႈဝၼ်းတီႈ 22/11/2020 ယၢမ်းႁူဝ်ၶမ်ႈ 4 မူင်းၼၼ်ႉၵေႃႈ ၵူတ်ႇထတ်းထူပ်းႁၼ် ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 တင်းမူတ်း 3 ၵေႃႉ၊ လႃႈသဵဝ်ႈ 1 ၵေႃႉ၊ ၼမ်ႉၸၢင် 1 ၵေႃႉလႄႈ မိူင်းပၼ်ႇ 1 ၵေႃႉ ဝႃႈၼႆ။

ယၢမ်းလဵဝ် ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ၼႂ်းမိူင်းႁူမ်ႈတုမ် ပတ်းပိုၼ်ႉၼႆႉသမ်ႉ တင်းမူတ်းမီး 80,505 ၵေႃႉ၊ လႆႈၶႂၢင်ႉလူင်းႁူင်းယႃ 59,888 ၵေႃႉ၊ လူႉတၢႆ 1,765 ၵေႃႉ ႁွင်ႈၵၢၼ်ပၢႆးယူႇလီမိူင်းႁူမ်ႈတုမ် ပိုၼ်ၽၢဝ်ႇဢွၵ်ႇ ဝႆႉ။