ႁူဝ်ပဝ်ႈ သင်ႇၶႃႇၸိုင်ႈတႆးပွတ်းဢွၵ်ႇ ႁဵတ်းတၢင်းလီၵုသူလ် တႃႇမၢႆတွင်းၼႂ်းဝၼ်းၵိူတ်ႇၸဝ်ႈ ၶွပ်ႈတဵမ် 53 ပီ လူႇ တၢၼ်းထႅမ် ငိုၼ်းၾူၼ်းပၼ် တၵ်ႉၵႃႇသတ်ႉထႃး ၼပ်ႉႁူဝ်ပၢၵ်ႇၶိူင်ႈ ဝႃႈၼႆ။
ဝၼ်းတီႈ 21/11/2020 ၼၼ်ႉ ၸဝ်ႈၶူးလူင် ၺႃႇၼသီႇရိ ႁူဝ်ပဝ်ႈငဝ်ႈငုၼ်းမုၵ်ႉၸုမ်း လူင်သင်ႇၶႃႇၸိုင်ႈတႆး ပွတ်းဢွၵ်ႇၶူင်း တႃႇမၢႆတွင်းဝၼ်းၵိူတ်ႇၸဝ်ႈ ၶွပ်ႈတဵမ် 53 ပီ ယဵပ်ႇၶဝ်ႈၼႂ်း 54 ပီၼႆသေ ပိုၼ်ၽၢဝ်ႇၼႂ်းၽဵတ်ႉပုၵ်ႉၸဝ်ႈ ဢၼ်ဝႃႈ Nyana Siri ၼၼ်ႉဝႃႈ ႁႂ်ႈပီႈၼွင်ႉတၵ်ႉၵႃႇသတ်ႉ ထႃး သင်ၶၸဝ်ႈ သူင်ႇမၢႆၾူၼ်းပၼ်မႃး၊ ၸဝ်ႈတေလူႇတၢၼ်းထႅမ်ပၼ် ငိုၼ်း တႃႇၸႂ်ႉၵပ်းသိုပ်ႇႁႃၵၼ် ၼိုင်ႈမၢႆ/ ၼိုင်ႈၶိူင်ႈလႂ် 3,000 ပျႃး ၼႆယဝ်ႉ။
ၸဝ်ႈၶူးလူင် ၺႃႇၼသီႇရိ ႁူဝ်ပဝ်ႈၵိင်ႇၽႄငဝ်ႈငုၼ်းမုၵ်ႉၸုမ်းလူင် သင်ႇၶႃႇၸိုင်ႈ တႆးပွတ်းဢွၵ်ႇၶူင်းလၢတ်ႈဝႃႈ – “မိူဝ်ႈၵူႈ ပီပူၼ်ႉမႃးၼၼ်ႉ ပေႃးထိုင်ဝၼ်းၵိူတ်ႇ ႁဝ်းၸဝ်ႈၼႆ ၽိတ်ႈမွၵ်ႈပိူၼ်ႈမႃးသေ လဵင်ႉလူၸႃႇၵ၊ ႁဝ်းၵႂႃႇတီႈပိူၼ်ႈၵေႃႈ မၼ်းငၢႆႈ။ ပီၼႆသမ်ႉ ၵွပ်ႈတၢင်းပဵၼ်သေလႄႈ တေၵႂႃႇႁႃၵၼ်ၵေႃႈယၢပ်ႇ ႁဵတ်းသင်ၵေႃႈယၢပ်ႇ၊ ၵမ်းၼႆႉႁဝ်းၸဝ်ႈၵေႃႈ ဝူၼ်ႉသေ ႁႂ်ႈလႆႈလူႇတၢၼ်းၼႂ်းဝၼ်းၵိူတ်ႇၸဝ်ႈၼႆလႄႈ ၸင်ႇမႃးဝူၼ်ႉမႅၼ်ႈလွင်ႈၾူၼ်းၼႆႉသေ ပေႃးသႂ်ႇပၼ်ငိုၼ်းမၢႆၾူၼ်းပိူၼ်ႈ ၼႆ လွင်ႈႁူမ်ၸူမ်းပိူၼ်ႈၼၼ်ႉ တေမီးဢိူဝ်ႈၼႆသေ ၸင်ႇလႆႈႁဵတ်းပဵၼ်ၵုသူလ်မၢႆတွင်းၸဝ်ႈၼႂ်းဝၼ်းၵိူတ်ႇသေ လူႇတၢၼ်း ပၼ်ၵႃႈၾူၼ်းၵႂႃႇၼပ်ႉႁူဝ်ပၢၵ်ႇမၢႆ/ ၶိူင်ႈမၼ်းယဝ်ႉ” – ဝႃႈၼႆ။
ထႅင်ႈၾၢႆႇၼိုင်ႈၵေႃႈ ယၢမ်းလဵဝ် ၼႂ်းမိူင်းႁူမ်ႈတုမ်ပတ်းပိုၼ်ႉသမ်ႉ ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ၼမ်မႃးယူႇၵူႈဝၼ်းၵေႃႈပိူင်ႈ၊ ယူႇတီႈႁွင်ႈၵၢၼ်ပၢႆးယူႇလီၵေႃႈ သမ်ႉပိုၼ်ၽၢဝ်ဝႆႉဝႃႈ တေဢမ်ႇလႆႈၶွၼ်ႈတုမ်ႁူဝ် ၵူၼ်း 50 ၵေႃႉၶိုၼ်ႈၼိူဝ်ၸိူဝ်းၼႆႉၵေႃႈ ပိူင်ၼိုင်ႈ ဝႃႈၼႆ။
ဝၼ်းၵိူတ်ႇၸဝ်ႈၶူးလူင်ၺႃႇၼသီႇရိပီၼႆႉ ၸဝ်ႈၶူး လႆႈလူႇတၢၼ်းပၼ်ငိုၼ်းၼႂ်းၾူၼ်း ၊ ၸိူဝ်းဢၼ်တၵ်ႉၵႃႇသတ်ႉထႃး ၸဝ်ႈၽူႈသူင်ႇမၢႆၾူၼ်းမႃးပၼ် တၢင်းၾဵတ်ႉသ်ပုၵ်ႉ ၊တၢင်းၶေႃႈၵႂၢမ်းၾူၼ်း SMS ၸိူဝ်းၼႆႉ ၊ လူႇတၢၼ်းပၼ်လူၺ်ႈ ဢမ်ႇလိူၵ်ႇၼႃႈတႃ ၽႃႇသႃႇ၊ သႃႇသၼႃႇ၊ ၸၼ်ႉ ထၢၼ်ႇၵူၼ်း၊ တီႈၵိူဝ်းယမ်လႄႈ လဵၵ်ႉယႂ်ႇၼုမ်ႇထဝ်ႈ ၊ လူႇတၢၼ်းပၼ် ၼိုင်ႈမၢႆ 3,000 ပျႃႇ မွၵ်ႈ 300 မၢႆ/ ၶိူင်ႈ ၼႆယဝ်ႉ။
ၸဝ်ႈၶူးလူင် ၺႃႇၼသီႇရိၼႆႉ ပဵၼ်လုၵ်ႈၸၢႆး လုင်းသႆႇတိပ်ႉ ပႃႈၶၼ် ၵိူတ်ႇမိူဝ်ႈပီ 1967 လိူၼ်ၼူဝ်ႊဝႅမ်ႊၿိူဝ်ႊ ဝၼ်းတီႈ 21 တူၵ်းမႅၼ်ႈလိူၼ် 12 လွင်ႈ 5 ၶမ်ႈ ဝၼ်းဢင်းၵၢၼ်း မီးပီႈၼွင်ႉႁူမ်ႈတွင်ႉၵၼ် 4 ၵေႃႉ ၸဝ်ႈပဵၼ်ၵေႃႉထူၼ်ႈ 4 ၸႃႉတိ တီႈ ၵိူတ်ႇပဵၼ်ဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း။
