ၵူၼ်းလၢင်းၶိူဝ်း တူင်ႉတိုၼ်ႇသိုဝ်ႉ ၶွင်ၵိၼ်ယႅမ်ႉ ဝၢႆးလင်မီးၵူၼ်းၸပ်းၶူဝ်ႊဝိတ်ႉ ၵေႃႉၼိုင်ႈ

0
211

ပလိၵ်ႈလုၵ်ႉတႃႈၵုင်ႈၶၢႆႉမႃးတႃႇႁၢပ်ႇၵၢၼ်တီႈလၢင်းၶိူဝ်း ၊ၽွင်းၵၵ်းတူဝ်ဝႆႉၼၼ်ႉ သမ်ႉၵူတ်ႇထတ်းႁၼ်ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ-19 လႄႈ ၵူၼ်းမိူင်းတူၵ်းၸႂ်တိုၼ်ႇသၢၼ်ႈၵဵပ်းသိုဝ်ႉၶူဝ်းၶွင်ၵိၼ်ယမ်ႉတႃႇၵၵ်းတူဝ်ယူႇၼႂ်းႁိူၼ်း။

Photo Credit to Mg Mg Than: ႁၢင်းယႃလၢင်းၶိူဝ်း ႁွင်ႈႈဝႆႉၵူၼ်းပဵၼ်ၶူဝ်ႊဝိတ်ႉ

ဝၼ်းတီႈ 19/11/2020 ၾၢႆႇပၢႆးယူႇလီဝဵင်းလၢင်းၶိူဝ်း ပိုၼ်ၽၢဝ်ႇပဵၼ်တၢင်းၵၢၼ်ဝႃႈ ပလိၵ်ႈဢၼ်ၵၵ်းတူဝ်ဝႆႉၼၼ်ႉမီးၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ၼႆလႄႈ ဝၼ်းတီႈ 20/11/2020 ယၢမ်းၵၢင်ၼႂ်ၼႆႉ ၵူၼ်းမိူင်းလၢင်းၶိူဝ်း ၼွၵ်ႈဝဵင်းၼႂ်းဝဵင်း ဢွၼ်ၵၼ်ဢွၵ်ႇသိုဝ်ႉၶူဝ်းၶွင်ၵိၼ်ယႅမ်ႉတႃႇၵဵပ်းဝႆႉ ၽွင်းၵၵ်းတူဝ်ယူႇႁိူၼ်း။ ၾၢႆႇၼိုင်ႈၵေႃႈ မီးၶၢဝ်ႇဝႃႈ လူင်ပွင်ၸိုင်ႈ ပိုၼ်ၽၢဝ်ႇႁႂ်ႈၵၵ်းတူဝ်ယူႇႁိူၼ်း  Stay At Home တင်ႈဢဝ်ဝၼ်းတီႈ 21/11/2020 တေႃႇထိုင် 5/12/2020 ၼႆလႄႈ     ၵူၼ်းမိူင်းၸင်ႇဢွၼ်ၵၼ်ဢွၵ်ႇသိုဝ်ႉၶူဝ်းၶွင်ၵိၼ်ယႅမ်ႉၵၼ်။   

ၼၢင်းလၢဝ် ၵူၼ်းလၢင်းၶိူဝ်း လၢတ်ႈဝႃႈ -“ၵူၼ်းမိူင်း လႆႈငိၼ်းဝႃႈ တေပိၵ်ႉမိူင်း တႃႇ 15 ဝၼ်း။ ၾၢႆႇၼိုင်ႈၵေႃႈ တီႈလၢင်းၶိူဝ်းၼႆႉသမ်ႉမီး ၵူၼ်းတိတ်းၸပ်း တၢင်းပဵၼ်မႃး 1 ၵေႃႉ ၼႆလႄႈ  ၼႅတ်ႈဢွၼ်ၵၼ်ႁႃသိုဝ်ႉ  ဝႆႉတၢင်းၵိၼ်တၢင်းယႅမ်ႉ။ တေႃႇထိုင်မိူဝ်ႈၼႆႉတႄႉ ၶၼ်ၵုၼ်ႇၶူဝ်းၶွင်တႄႉ ဢမ်ႇၶိုၼ်ႈၶႃႈ တိုၵ်ႉမိူၼ်ၵဝ်ႇၵူၺ်း”- ဝႃႈၼႆ။

ႁၢၼ်ႉၶၢႆတၢင်းၵိၼ်တၢင်းယႅမ်ႉမၢင်ႁၢၼ်ႉဢမ်ႇပိုတ်ႇၶၢႆယဝ်ႉ။ မၢင်ႁၢၼ်ႉၵေႃႈလႆႈၸတ်းႁႂ်ႈၵူၼ်းၶဝ်ႈထႅဝ်သိုဝ်ႉၶူဝ်း – ဝႃႈၼႆ။ ယွၼ်ႉပိူဝ်ႈမီးၵူၼ်းၸပ်းတၢင်းပဵၼ်မႃးၵေႃႉၼိုင်ႈၼႆသေ ၵူၼ်းဝၢၼ်ႈၵူၼ်းသူၼ် ဢၼ်ႁၢင်ႈႁႅၼ်းတေၸတ်းပၢင် လူႇတၢၼ်း ၶႅၵ်ႇလီပၢင်ၸႃႉၸိူဝ်းၼႆႉၵေႃႈ ဢွၼ်ၵၼ်ယုၵ်ႉလိူၵ်ႈဝႆႉၶိုၼ်းတင်းၼမ် ။  

ယွၼ်ႉပိူဝ်ႈၶၢဝ်ႇတေပိၵ်ႉမိူင်းလႄႈသင် ႁႂ်ႈၵၵ်းတူဝ်ယူႇႁိူၼ်းၸိူဝ်းၼႆႉလႄႈသင် ၸဝ်ႈလူတ်ႉၸဝ်ႈၵႃး ၵူၼ်းလၢင်း ၶိူဝ်းၸိူဝ်းႁွတ်ႈဝႆႉတၢင်ႇဝဵင်းၼၼ်ႉၵေႃႈ ယူႇတီႈၵဵတ်ႉ(တႃႈလူတ်ႉ) မိူင်းၼၼ်ႉႁႂ်ႈၸဝ်ႈၵႃးပွၵ်ႈၶိုၼ်းလၢင်းၶိူဝ်း- ဝႃႈၼႆ။ 

ၸၢႆးသူၺ်ႇ ၵူၼ်းႁေႃႈၵႃး လၢင်းၶိူဝ်း – တူၼ်ႈတီး လၢတ်ႈဝႃႈ – “ယၢမ်းလဵဝ် ၸဝ်ႈၵႃးလၢင်းၶိူဝ်း ဢၼ်ၵႂႃႇမီးဝႆႉ တၢင်ႇဝဵင်း တၢင်ႇ တီႈၼၼ်ႉၵေႃႈ ႁႂ်ႈဢွၼ်ၵၼ်ပွၵ်ႈမႃးမူတ်းမူတ်း ၶႃႈဢေႃႈၼႆႉ။ တေႃႈလဵဝ် ၶႃႈတိုၵ်ႉလုၵ်ႉတူၼ်ႈတီးသေ ပွၵ်ႈမိူဝ်းလၢင်းၶိူဝ်း ဢေႃႈ”-  ဝႃႈၼႆ။

ၵဵဝ်ႇၵပ်းလူၺ်ႈလွင်ႈလူင်ပွင်ၸိုင်ႈ ပိုၼ်ၽၢဝ်ႇဢွၵ်ႇဝႆႉဝႃႈ ၵူၼ်းမိူင်းတင်းသဵင်ႈ တေလႆႈယူႇၼႂ်းႁိူၼ်းယေးၵၼ် တႃႇၶၢဝ်း တၢင်း 21 ဝၼ်း တႄႇဢဝ် ဝၼ်းတီႈ 21/11/2020 တေႃႇထိုင် 5/12/2020 ၼၼ်ႉ ၵူၺ်းၵႃႈ ပဵၼ်ၶၢဝ်ႇႁူင်လိုဝ်းၵၼ်ဝႆႉ ယူႇ တီႈ လူင်ပွင်ၸိုင်ႈပိုၼ်ၽၢဝ်ႇ ဢွၵ်ႇလိၵ်ႈပဵၼ်တၢင်းၵၢၼ်တႄႉ ပႆႇႁၼ် ဝႃႈၼႆ။

ၸၢႆးၵျေႃႇၸဵင်ႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းလၢင်းၶိူဝ်း လၢတ်ႈဝႃႈ -“ယၢမ်းလဵဝ် ၵူၼ်းလၢင်း ၶိူဝ်းႁဝ်းၶႃႈတႄႉ ဢွၼ်ၵၼ်ယူႇႁိူၼ်းယေးၵၼ် ၶႃႈဢေႃႈ။ လွင်ႈလူင် ပွင်ၸိုင်ႈ ပိုၼ်ၽၢဝ်ႇဝႃႈ ႁႂ်ႈဢွၼ်ၵၼ်ယူႇၼႂ်းႁိူၼ်း တႃႇ 15 ဝၼ်းၼၼ်ႉ ၶႃႈႁဝ်း ဢမ်ႇလႆႈႁၼ်မႅၼ်ႈလိၵ်ႈဢၼ်ဢွၵ်ႇဝႆႉပဵၼ်တၢင်းၵၢၼ်ၶႃႈ လႆႈႁၼ်ၼိူဝ်ၽဵတ်ႉပုၵ်ႉ ဢွၵ်ႇဝႆႉ ၸိူင်ႉၼၼ်ၵူၺ်း”- ဝႃႈၼႆ။

ၼႂ်းမိူင်းႁူမ်ႈတုမ်ၼႆႉ ၵူၼ်းတိတ်းၸပ်းတၢင်းပဵၼ်ၸိူဝ်ႉမႅင်း ၶူဝ်ႊဝိတ်ႉ 19 ၽိူမ်ႉၶိုၼ်ႈၵူႈဝၼ်းလႄႈ ၼိုင်ႈဝၼ်းလႂ် ဢမ်ႇ ယွမ်း 1,000 ၵေႃႉ။ ယၢမ်းလဵဝ် ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တင်းမူတ်းမီးၵႂႃႇ 74,882 ၵေႃႉ၊ လူႉတၢႆ 1,676 ၵေႃႉ၊ ယူတ်းယႃ 17,573 ၵေႃႉလႄႈ ယႃၶႅၼ်း 55,633 ၵေႃႉ ယူႇတီႈႁွင်ၵၢၼ်ပၢႆးယူႇလီ မိူင်းႁူမ်ႈတုမ် ပိုၼ်ၽၢဝ်ႇ ဢွၵ်ႇဝႆႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

SHARE