ဝၼ်းတီႈ 8/1/2026 ယၢမ်းၵၢင်ၼႂ် သိုၵ်းမၢၼ်ႈႁူမ်ႈၵၢင်ႉၵႄႇ တီႈဝဵင်းႁူဝ်မိူင်း ၸႄႈတွၼ်ႈလၢင်းၶိူဝ်း  ႁွင်ႉပၢင်ၵုမ် ၸဝ်ႈၵႃး ၸိူဝ်းႁေႃႈရူတ်ႉတၢင်ႇၵူၼ်း တၢင်ႇၵုၼ်ႇ(လိုင်းကား) ႁူဝ်မိူင်း – လၢင်းၶိူဝ်း- ၼမ်ႉၸၢင် ၸိူဝ်းၼႆႉတင်းသဵင်ႈသေ  ၵမ်ၵိၼ်း လွင်ႈတၢင်ႇၵုၼ်ႇ လတ်းၶၢမ်ႈၵႂႃႇမႃး ဝႃႈၼႆ ။

တႄႇၼႂ်းၵၢင်လိူၼ် ၵျႅၼ်ၼိဝ်ႊရီႊၼႆႉၵႂႃႇ ၸဝ်ႈၵႃးဢၼ်ႁေႃႈလႅၼ်ႈယူႇသဵၼ်ႈတၢင်း ႁူဝ်မိူင်း – လၢင်းၶိူဝ်း – ၼမ်ႉၸၢင် – ပၢင်လူင် ၸိူဝ်းၼႆႉတေလႆႈတေႃႉသူင်ႇၶူဝ်းၵုၼ်ႇၼိုင်ႈဝၼ်းလႂ် 5 လမ်း ၵူၺ်းယဝ်ႉ။ ဢမ်ႇပၼ်ဢွၵ်ႇၼမ်ၼမ်ၸိူင်ႉၵူႈပွၵ်ႈယဝ်ႉ။  တေလႆႈလူတ်းယွမ်းတၢင်ႇၶူဝ်းၵုၼ်ႇ ဢၼ်တေႃႉတၢင်ႇၶဝ်ႈမႃးၸိူဝ်းၼၼ်ႉၼႆလႄႈ  ႁဵတ်း ႁႂ်ႈၸဝ်ႈၵႃးယၢပ်ႇၽိုတ်ႇ တႃႇႁႃၵိၼ် လဵင်ႉတွင်ႉ  ဝႃႈၼႆ ။

ၸဝ်ႈၵႃး ႁူဝ်မိူင်း ၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“ တလဵဝ်ၼႆႉ ၵုၼ်ႇၵေႃႈ တေဢမ်ႇလႆႈတၢင်ႇ မိူၼ်ၵူႈပွၵ်ႈၼႆ ၊ ၵုၼ်ႇတင်း မိူင်းထႆးဢၼ်တၢင်ႇမႃးမိူင်းတႆးၼႆႉ ၼိုင်ႈဝၼ်းၼႆႉ တေလႆႈတၢင်ႇမႃး 5 လမ်းၵူၺ်းၼႆလႄႈ လႆႈႁဵတ်းဝႆႉ ၼိုင်ႈဝၼ်း 5 ၵေႃႉ ၵုမ်ႇလႂ်ၵုမ်ႇၼၼ်ႉဢဝ်၊   5 လမ်းၼႆႉ ၶဝ် သမ်ႉ ဢမ်ႇပၼ်ဢွၵ်ႇၸွမ်းၵၼ်မိူဝ်ႈမိူဝ်ႈၵၼ်။ တေႁႂ်ႈယၢၼ်ၵၼ် တီႈၵႄႇသုတ်း ၶိုင်ႈၸူဝ်ႈမူင်းၼိုင်ႈလမ်း။ သင်ပဵၼ်ၵုၼ်ႇတင်းမိူင်းတႆးၵႂႃႇတင်းမိူင်းထႆးတႄႉလႆႈယူႇၼႆဢေႃႈ ၊ ၸဝ်ႈၵႃး ၵေႃႈ ၵွၺ်ႈယူႇၵွၺ်ႈၵိၼ်းမႃးယဝ်ႉ”- ဝႃႈၼႆ ။

 သိုၵ်းမၢၼ်ႈတႄႇၵမ်ႇၵိၼ်းလွင်ႈတေႃႉတၢင်ႇၵုၼ်ႇမိူင်းထႆး- မိူင်းတႆးၼႆႉ တႄႇမႃးၼႂ်းႁၢင်လိူၼ်တီႊသႅမ်ႊပိူဝ်ႊ ပီ 2025 ၼႆႉမႃး ။ ၼႂ်းဝၼ်းတီႈ 23/12/2025 ပူၼ်ႉမႃးၼႆႉ ပလိၵ်ႈသိုၵ်းမၢၼ်ႈႁႄႉႁၢမ်ႈ ၵႃးလူင်တၢင်ႇၼမ်ႉမၼ်း ၊ ၵႃးတၢင်ႇၵုၼ်ႇ 30 လမ်းပၢႆ  တီႈဝၢၼ်ႈၸလွင်း ႁဵတ်းႁႂ်ႈ ၵႃးၵိုတ်းၶမ်ဝႆႉ ပဵၼ်ၶၢဝ်းတၢင်း ဝူင်ႈပၢႆ ၼႆယဝ်ႉ ။  

ၸဝ်းၵႃးၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“ ပေႃးပဵၼ် ၶူဝ်းၶွင်တၢင်းၵိၼ်တၢင်းယမ်ႉတႄႉ ပၼ်ပူၼ်ႉယူႇ ၊ ပေႃးပဵၼ်ၶူဝ်းၶွင်ႁႅင်ႈတႄႉ ဢမ်ႇပၼ်လတ်း  ။ ႁိမ်းၾၢင်ၶူင်းၼႆႉ ၵႃးၶမ်ဝႆႉမွၵ်ႈ 30 ပၢႆၼႆႉ တႄႇဝၼ်းတီႈ 23 ၼႆႉ ထိုင်ဝၼ်းတီႈ  1 ၼႆႉ ။ ယွၼ်ႉသင်ၼႆတႄႉ ဢမ်ႇႁူႉလီလီ ၊ လႆႈယိၼ်းဝႃႈ ယွၼ်ႉၵဵဝ်ၵပ်းလွင်ႈပၼ်ႁႃ ဢၼ်ပိူၼ်ႈတိူင်ႇလၢတ်ႈလွင်ႈၵဵပ်းငိုၼ်းၼမ်ၸွမ်း ၵဵတ်ႉလၢၼ်ၸိူဝ်းၼၼ်ႉၼႆၵေႃႈဝႃႈၵၼ်။  ၸဝ်ႈၵႃးၵူၼ်းပိုၼ်ႉတီႈ ဢွၼ်ၵၼ်ၶၢင်း၊ သိုဝ်ႇတူင်ႇဝူင်းၵေႃႈဢွၼ်ၵၼ်ဢွၵ်ႇၶၢဝ်ႇၼၼ်ႉၼႃႇ   ”- ဝႃႈၼႆ ။

ၸဝ်ႈရူတ်ႉၵႃး ၵူၼ်းႁူဝ်မိူင်းလၢတ်ႈထႅင်ႈဝႃႈ – “ တီႈတႄႉမၼ်း ၼႄႇႁူဝ်မိူင်းထိုင်လၢင်းၶိူဝ်းၼႆႉမၼ်းပဵၼ်ပိုၼ်ႉတီႈ SSS လႄႈပျီႇတူႉၸိတ်ႉ။ ၶဝ်လူဝ်ႇလႆႈၵႅတ်ႇ ၶႄႁႄႉၵင်ႈပၼ်ၵူၼ်းမိူင်း၊ ၶဝ်လူဝ်ႇယူႇၾၢႆႇၵူၼ်းမိူင်းသေ ၸွႆႈၵႄႈလိတ်ႈပၼ်ၶႃႈဢိူဝ်ႈ။ ဢၼ်ၼႆႉသမ်ႉ ဢမ်ႇႁတ်းလၢတ်ႈသင်တီႈသိုၵ်းမၢၼ်ႈၶိုၼ်း။ မၼ်းယၢပ်ႇၸႂ်ၵူၼ်းမိူင်းတႄႉယဝ်ႉၶႃႈ”- ဝႃႈၼႆ ။

ထႅင်ႈၾၢႆႇၼိုင်ႈၵေႃႈ မိူၼ်ၼင်ႇ ဝၼ်းတီႈ 18/12/2025 ယၢမ်းၵၢင်ၼႂ် 10 မူင်း ၵဵတ်ႉလၢၼ်ႇ သိုၵ်းမၢၼ်ႈ ႁၢမ်ႈၵႃးတၢင်ႇၼမ်ႉမၼ်းဢၼ် လုၵ်ႉတၢင်းတူၼ်ႈတီး တေတေႃႉၶဝ်ႈ ၼႂ်းဝဵင်း လၢင်းၶိူဝ်း ဢမ်ႇပၼ်လတ်းၶၢမ်ႈၵႂႃႇမႃး တေႃႇထိုင် ဝၼ်းတီႈ 22/12/2025 ႁဵတ်းႁႂ်ႈၵႃး တၢင်ၼမ်ႉမၼ်းၵိုတ်းၶင်ႉ တီႈၵဵတ်ႉလၢၼ်တၢင်းၶဝ်ႈဝဵင်းလၢင်းၶိူဝ်း ။  ၵူၼ်းမိူင်းမႆႈၸႂ် လွင်ႈၽိုၼ်းလွင်ႈၾႆး (လၢင်းၶိူဝ်းၼႆႉ ၾႆးမႆႈပႃႇၵႆႉလၢမ်းထိုင်ဝဵင်း)။

ၵူၼ်းၵႃႉၼႂ်းမိူင်းဝဵင်းလၢင်းၶိူဝ်း လၢတ်ႈၽူႈတွႆႇႁွၵ်ႈဝႃႈ – “ႁၢမ်ႈဝႆႉၵႃးတီႈၵဵတ်ႉၼွၵ်ႈဝဵင်း။ ဢမ်ႇပၼ်ၶဝ်ႈဝဵင်း ဢမ်ႇပၼ်လတ်းဝဵင်း။  တီႉတႄႉၶဝ်ဢမ်ႇတီႉ၊ ပေႃးပဵၼ်ၵႃးတၢင်ႇ ၼမ်ႉမၼ်း ဢၼ်ပိူၼ်ႈတေၵႂႃႇတၢင်းမိူင်းပၼ်ႇမိူင်းတူၼ်ၼၼ်ႉၵေႃႈၶဝ် ၸႂ်ႉပႂ်ႉဝႆႉ တၢင်းၶဝ်ႈဝဵင်း လၢင်းၶိူဝ်း ၼၼ်ႉ 3 – 4 ဝၼ်းပုၼ်ႉ ၊ မၢင်လမ်းၼႆ လႆႈပႂ်ႉထိုင် 10 ဝၼ်းပၢႆပုၼ်ႉၵေႃႈမီး။ ၼမ်ႉမၼ်းၸၢၵ်ႈ ၼၼ်ႉ ပေႃးလႆႈဢဝ်ၵႃးဢွၼ်ႇမႃးတၢင်ႇလတ်းဝဵင်းဢဝ် ၊ ၼိုင်ႈဝၼ်းၼႆႉ  ၶဝ်ပၼ်တေႃႉ လတ်းဝဵင်း ၼမ်ႉမၼ်းပီႇပႃႇ 5 လုၵ်ႈၵူၺ်းလႄႈ ၼမ်ႉမၼ်း ဢၼ်တၢင်ႇမႃးၵႃးၼိုင်ႈလမ်း ၼၼ်ႉလႆႈ တေႃႉပဵၼ်တႃႇ 6 ဝၼ်း ၵမ်းလဵဝ်။ ၶဝ်တိုၼ်းႁဵတ်းႁႂ်ႈၵူၼ်းမိူင်းယၢပ်ႇၽိုတ်ႇလူင်  ”- ဝႃႈၼႆ ။ 

ဝဵင်းလၢင်းၶိူဝ်းၼႆႉသုင်ၼိူဝ်ၼႃႈၼမ်ႉပၢင်ႇလၢႆႇ 996 ပေႇၵူၺ်း။ သမ်ႉပဵၼ်ဝဵင်းဢၼ်ယူႇၼႂ်း ပိုၼ်ႉတီႈတႅမ်ႇ ႁႅင်းလူမ်းမႆႈသုင်၊ လူမ်းႁၢဝ်ႉႁဵတ်းႁႂ်ႈၾႆးမႆႈလၢမ်းငၢႆႈလႄႈ လႆႈၾၢင်ႉ လွင်ႈၽိုၼ်းလွင်ႈၾႆးယူႇတႃႇသေႇ။

ယၢမ်းလဵဝ်သမ်ႉၵႃးတၢင်ႇၼမ်ႉမၼ်းလႆႈၵိုတ်းၶမ် ၼႂ်းလႅတ်ႇႁိမ်းသူၼ်ဝႆႉၸိူင်ႉၼႆ  ႁဵတ်းႁႂ်ႈ ၵူၼ်းပိုၼ်ႉတီႈ မႆႈၸႂ်လွင်ႈၽိုၼ်းလွင်ႈၾႆး၊ ၵူၼ်းယူႇႁူဝ်ဝဵင်းသမ်ႉပေႃးၼွၼ်းဢမ်ႇလပ်းလႆႈ -ဝႃႈၼႆ။    

ၵူၼ်းၵႃႉၵေႃႉၼိုင်ႈလၢတ်ႈဝႃႈ-“ ပဵၼ်သိုၵ်းမၢၼ်ႈ ၼႂ်းတပ်ႉပိဝ်ႇႁႃႇလၢင်းၶိူဝ်းဢေႃႈ ဢၼ်ႁႄႉ ရူတ်ႉၵႃးသေ ငိတ်ႈၸဝ်ႈၵႃးလႄႈၵူၼ်းၵႃႉယူႇၸိူင်ႉၼႆၼႆႉ။ မၼ်းၼႆႉ မီးၸိုဝ်ႈႁၢႆႉ ၸိုဝ်ႈၼဝ်ႈမႃး ႁိုင်ယဝ်ႉ။ ယွၼ်ႉၼၼ်လႄႈၶဝ်ၶၢႆႉမၼ်းမႃးပႂ်ႉၵဵတ်ႉ။ ယိင်ႈၶႅၼ်းပဵၼ်တိုဝ်ႉတၢင်းတႃႇမၼ်းမႃး ငိတ်ႈၵိၼ် ၵူၼ်းၵႃႉလႄႈၸဝ်ႈၵႃးထႅင်ႈႁေယဝ်ႉ။ ဝၢႆးလင်ပိူၼ်ႈဢွၵ်ႇၶၢဝ်ႇလွင်ႈမၼ်းငိတ်ႈ ၵိၼ်ငိုၼ်းယဝ်ႉၼၼ်ႉ မၼ်းၶႅၼ်းၵမ်ၵိၼ်းႁဵတ်းႁၢႆႉထႅင်ႈ ဢမ်ႇပၼ်ၸဝ်ႈၵႃးၵုၼ်ႇၵႂႃႇမႃး လွတ်ႈလႅဝ်း၊ ငိတ်ႈၵိၼ်ငိုၼ်းၵႃႈဢမ်ႇလႆႈဢမ်ႇၸူး  ၸႂ်ႉၸဝ်ႈၵႃးၵိုတ်းဝႆႉၸိူင်ႉၼၼ်ႉ ဢမ်ႇမီးလွင်ႈမီးတၢင်းသင် ။ မၼ်းတိုၼ်းတင်ႈၸႂ်ငိတ်ႈၼၼ်ႉယဝ်ႉ။ ႁဵတ်းႁႂ်ႈဢွၼ်ၵၼ်ႁႃၵိၼ်လဵင်ႉတွင်ႉယၢပ်ႇမူတ်း”- ဝႃႈၼႆ။  

ၵဵဝ်ၵပ်းလွင်ႈၼႆႉ ၵူၼ်းမိူင်းတုၵ်းယွၼ်းဝႆႉဝႃႈ ၶႂ်ႈႁႂ်ႈၸဝ်ႈၼႃႈတီႈၸိူဝ်းၵဵဝ်ႇၶွင်ႈ လႄႈ ၽူႈမီးပုၼ်ႈၽွၼ်းတၢင်းသဵင်ႈ တူၺ်းလူပၼ်လွင်ႈႁဵတ်းသၢင်ႈ ဢၼ်ဢမ်ႇမီးၽွၼ်းလီတွၼ်ႈတႃႇၵူၼ်းမိူင်း ၼႆယဝ်ႉ ။