တႃႇတေႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၼင်ႇႁိုဝ်ပေႃးတေဢမ်ႇၽႄႈလၢမ်းႁၢဝ်ႈႁႅင်းၼၼ်ႉ ယူႇတီႈလူင်ပွင်ၸိုင်ႈဢွၵ်ႇလိၵ်ႈပိုၼ် ၽၢဝ်ႇ ၸူးၵူၼ်းမိူင်း ႁၢမ်ႈဢွၵ်ႇတၢင်းၼွၵ်ႈႁိူၼ်း ယၢမ်းၵၢင်ၶမ်ႈ/ ၶိုၼ်းထႅင်ႈ တႃႇၶၢဝ်းတၢင်း 2 လိူၼ် ဝႃႈၼႆ။
လုမ်းၽူႈၵွၼ်းၸႄႈဝဵင်းၵျွၵ်ႉမႄး ပိုၼ်ၽၢဝ်ႇဢွၵ်ႇမၢႆမီႈ ၼႂ်းပိုၼ်ႉတီႈဝႆႉဝႃႈ တႄႇဢဝ် ဝၼ်းတီႈ 15/11/2020 ယၢမ်းၵၢင်ၶိုၼ်း 12 မူင်း တေႃႇထိုင် 4 မူင်းၵၢင်ၼႂ် ႁၢမ်ႈၵူၼ်းမိူင်း ၵူႈၵေႃႉ ဢွၵ်ႇတၢင်းၼွၵ်ႈႁိူၼ်း။ ယၢမ်း လဵဝ်ၼႆႉ ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 ၼႂ်းမိူင်းႁူမ်ႈတုမ်ၼႆႉ ၼမ်ၶိုၼ်ႈမႃးၵူႈဝၼ်းလႄႈပဵၼ်တႃႇႁႄႉၵင်ႈတၢင်းပဵၼ် ၼင်ႇႁိုဝ် တေဢမ်ႇၽႄႈလၢမ်းတိတ်းၸပ်းၵၼ် ၼႆယဝ်ႉ။
ၸၢႆးဢွၼ်ႇ ၵူၼ်းၵျွၵ်ႉမႄး လၢတ်ႈဝႃႈ – “ၸႂ်ႈၶႃႈဢေႃႈ လူင်ပွင်ၸိုင်ႈ ဢွၵ်ႇလိၵ်ႈမႃးထႅင်ႈၵမ်းၼိုင်ႈ တႃႇတေၵုမ်းတၢင်း ပဵၼ်ၶူဝ်ႊဝိတ်ႉ 19 ၼႆဢေႃႈ” – ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇၼၼ်ႉ သင်ဝႃႈ ၽႂ်ဢမ်ႇႁဵတ်းၸွမ်းပၵ်းပိူင်မၢႆမီႈၸိုင် တေဢဝ် လိူင်ႈပၼ်တူတ်ႈတၢမ်ႇ ၸွမ်းၼင်ႇပၵ်းပိူင် ၼႂ်းပိုၼ်ႉ တီႈဢွၵ်ႇဝႆႉၼၼ်ႉ ဝႃႈၼႆ။
မိူဝ်ႈဝၼ်းတီႈ 8/11/2020 ဝၼ်းပၢင်လိူၵ်ႈတင်ႈၼၼ်ႉ ၵူၼ်းမႃးတွတ်ႈၶႅပ်းၵၢင်ၸႂ်တီႈ ဢိူင်ႇၼွင်ပိင်လူင် ၸႄႈဝဵင်းၵျွၵ်ႉမႄး ၼၼ်ႉ မီးၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ-19 ၵေႃႉၼိုင်ႈ။ ပဵၼ် ၵူၼ်းႁေႃႈၵႃး။ ဝၢႆးလင်ၵူတ်ႇထတ်းထူပ်းႁၼ်တၢင်းပဵၼ်တီႈမၼ်းၸၢႆးယဝ်ႉ ၽူႈ ၵွၼ်းႁူင်းတွတ်ႈၶႅပ်းၵၢင်ၸႂ်တင်း ၽူႈမီးပုၼ်ႈၽွၼ်း လႆႈထုၵ်ႇၵုမ်းတူဝ်ဝႆႉ တႃႇႁူဝ်ၵူၼ်း 40 ပၢႆ ၼႆယဝ်ႉ။
