ပၢင်လိူၵ်ႈတင်ႈပွၵ်ႈၼႆႉ ၼေႃႇတႅၼ်းၽွင်း ပႃႇတီႇႁူဝ်သိူဝ် ၸႄႈဝဵင်းၼမ်ႉတူႈ ဢွင်ႇပေႉ 2 တီႈ၊ ၼူၵ်ႉယုင်းပေႉ 1 တီႈ။
ဝၼ်းမိူဝ်ႈၼႆႉ 10/11/2020 ၽွၼ်းၵၢၼ်လိူၵ်ႈတင်ႈ ဢၼ်ၶွမ်ႊမသျိၼ်ႊ ၵၢၼ်လိူၵ်ႈတင်ႈ မိူင်းႁူမ်ႈတုမ် ၸတ်းႁဵတ်းၼႂ်းဝၼ်းတီႈ 08/11/2020 ၼၼ်ႉ ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇၼၼ်ႉ ယူႇတီႈပႃႇတီႇႁူဝ်သိူဝ် (SNLD) ဢွင်ႇပေႉ 2 တီႈၼင်ႈ၊ ပႃႇတီႇၼူၵ်ႉယုင်း (NLD) ပေႉ 1 တီႈၼင်ႈ- ၼႆယဝ်ႉ။
ၽူႈတူင်ႉၼိုင်ၸုမ်းပွင်ၵၢၼ် ပႃႇတီႇႁူဝ်သိူဝ် ၼမ်ႉတူႈ ၵေႃႉၼိုင်ႈလၢတ်ႈဝႃႈ “တီႈၼႂ်းၼမ်ႉတူႈတႄႉ ပႃႇတီႇႁူဝ်သိူဝ် ႁဝ်းၶႃႈပေႉဝႆႉ 2 တီႈၼင်ႈ၊ တီႈၼင်ႈသၽႃးၵူၼ်းမိူင်း တင်းတီႈၼင်ႈသၽႃးၸႄႈမိူင်းမၢႆ 2 ၊ တီႈၼင်ႈ သၽႃးၸႄႈမိူင်းမၢႆ 1 တႄႉဢမ်ႇလႆႈ။ တီႈၼင်ႈၽူႈတႅၼ်းၸိူဝ်ႉၸၢတ်ႈ ၵေႃႈႁဝ်းၵေႃႈလႆႈၶႅပ်းၵၢင်ၸႂ် ၼမ်ဝႆႉ၊ မိူဝ်ႈလဵဝ်တႄႉ ၽွင်းတႅၼ်းႁဝ်းၶႃႈ ပႂ်ႉလူင်းလၢႆးမိုဝ်းသေ ၸင်ႇပိုၼ်ၽၢဝ်ႇပဵၼ်တၢင်းၵၢၼ်” ဝႃႈၼႆ။
ၸႄႈဝဵင်းၼမ်ႉတူႈၼႆႉ ပႃႇတီႇႁူဝ်သိူဝ် ၼေႃႇၽူႈတႅၼ်းသၽႃးၵူၼ်းမိူင်း ပဵၼ်ၼၢင်းၶမ်းဢေး၊ ၼေႃႇတႅၼ်းၽွင်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ (1) ၼၢင်းၸၢမ်ႁွမ်၊ ၼေႃႇတႅၼ်းၽွင်း သၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ (2) ၸၢႆးၵျေႃႇၺုၼ်ႉ၊ ၼေႃႇတႅၼ်းၽွင်းသၽႃးၸိူဝ်ႉၸၢတ်ႈ ၶဵတ်ႇလိူၵ်ႈတင်ႈမၢႆ (1) ပဵၼ်ၸၢႆးမျႃႉထုၼ်းသွႆႈႁိူင်း။
ပၢင်လိူၵ်ႈတင်ႈ 2020 ဢၼ်ၸတ်းမိူဝ်ႈ 08/11/2020 ၼႆႉ ၼႂ်းၵၢၼ်ႁႃသဵင်ၶွင်ပႃႇတီႇ ႁူဝ်သိူဝ်ၼၼ်ႉ မီးၵႂၢမ်းၶႂၼ်ဝႆႉဝႃႈ “တႃႇသုၼ်ႇလႆႈထၢင်ႇႁၢင်ႈတိူဝ်းလိူဝ် ၽွမ်ႉသဵင်ပၼ်ႁႅင်းၸုမ်းႁူဝ်သိူဝ်” ၼႆယဝ်ႉ။
ပႃႇတီႇႁူဝ်သိူဝ်ၼႆႉ မီးယိူင်းဢၢၼ်းပိူင်လူင် ႁဵတ်းသၢင်ႈပိူဝ်ႈတႃႇႁႂ်ႈၵူႈၸၢဝ်းၶိူဝ်း မီးသုၼ်ႇလႆႈတႅပ်းတတ်း တူဝ်ၵဝ်ႇႁင်းၶေႃ၊ ႁႂ်ႈၵူႈၸၢဝ်းၶိူဝ်းမီးသုၼ်ႇလႆႈ ၽဵင်ႇပဵင်းၵၼ်၊ ၶတ်းသၢင်ႈႁၢင်ႈပွင် ၵၢၼ်ၽွမ်ႉႁူမ်ႈ ၸိူဝ်ႉၶိူဝ်းတႆး၊ ၵၢၼ်ၽွမ်ႉႁူမ်ႈၸၢဝ်းၶိူဝ်းၸိုင်ႈတႆး ဢိၵ်ႇတင်း ၵၢၼ်ၵေႃႇတင်ႈ မိူင်းႁူမ်ႈတုမ်ၾႅတ်ႊၻရႄႊ ၸိုၼ်ႈၸၢင်ႇ ၸွမ်းလွၵ်းပိူင်ၻီႊမူဝ်ႊၶရေႊသီႊ ၸိူဝ်းၼႆႉ။
ပၢင်လိူၵ်ႈတင်ႈ ပီ 2015 လႄႈ ပၢင်လိူၵ်ႈတင်ႈသွမ်ႈ 2017 ႁူမ်ႈၵၼ် ယူႇတီႈပႃႇတီႇႁူဝ်သိူဝ် SNLD လႆႈတီႈၼင်ႈၼႂ်းသၽႃး တင်းမူတ်း 46 တီႈၼင်ႈ။ ၼႂ်း 46 တီႈၼင်ႈၼၼ်ႉ ၽူႈတႅၼ်းသၽႃးၸႄႈမိူင်း 28 တီႈၼင်ႈ၊ ၽူႈတႅၼ်းသၽႃးၵူၼ်းမိူင်း 14 တီႈၼင်ႈလႄႈ ၽူႈတႅၼ်းသၽႃးၸိူဝ်ႉၸၢတ်ႈ 3 တီႈၼင်ႈ ဢိၵ်ႇပႃး ၸႄႈမိူင်းၶၢင် ထႅင်ႈ 1 တီႈၼင်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ