တွၼ်ႈတႃႇ ပၢင်လိူၵ်ႈတင်ႈ ပေႃးတေပဵၼ်ထမ်း မီးလွင်ႈၽဵင်ႇပဵင်းၼႆသေ SSPP ႁၢမ်ႈၵူၼ်းသိုၵ်းၵူႈၵေႃႉ ၶဝ်ႈၸမ် ႁူင်းတွတ်ႈၶႅပ်းၵၢင်ၸႂ် ၼႂ်းပိုၼ်ႉတီႈ ဢၼ်ၵုမ်းၵမ်ဝႆႉ ၸိူဝ်းၼၼ်ႉ ဝႃႈၼႆ။
မိူဝ်ႈၽုၵ်ႈ ဝၼ်းတီႈ 8/11/2020 လိူၼ် 11 လွင်ႈ 8 ၶမ်ႈ ဝၼ်းတိတ်ႉ ယၢမ်းၵၢင်ၼႂ် 6 မူင်း ထိုင် 4 မူင်းႁူဝ်ၶမ်ႈ ယူႇတီႈၶွမ်ႊ မသျိၼ်ႊၵမ်ၵၢၼ် လိူၵ်ႈတင်ႈ မိူင်းႁူမ်ႈတုမ် တေၸတ်းႁဵတ်းပၢင်လိူၵ်ႈတင်ႈ ၵူႈလွင်ႈလွင်ႈပတ်းပိုၼ်ႉ မိူင်းႁူမ်ႈတုမ်ၼၼ်ႉ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ၸီႉသင်ႇဝႆႉၼႂ်းၼႃႈတီႈၵုမ်းၵမ်တူင်ႉၼိုင်ၵူႈတီႈဝႃႈ ၼင်ႇႁိုဝ်ၵူၼ်းမိူင်းတေၸၢင်ႈတွတ်ႈၶႅပ်းၵၢင်ၸႂ်လႆႈလွတ်ႈလႅဝ်းထၢင်ႇႁၢင်ႈၼၼ်ႉ ႁၢမ်ႈၵူၼ်းသိုၵ်း ဝၢၼ်ႈႁႆးၵူႈၵေႃႉ ၶဝ်ႈၸမ်ႁူင်း တွတ်ႈၶႅပ်းၵၢင်ၸႂ် ၼႆယဝ်ႉ။
ၸဝ်ႈႁၢၼ် ၸၢႆးတၢၼ်းဢွင်ႇ ၽူႈၶၢၼ်ပၢၵ်ႇ SSPP လၢတ်ႈဝႃႈ – “ ပၢင်လိူၵ်ႈတင်ႈပီၼႆႉ ႁဝ်းၶႃႈ တိုၼ်းဢမ်ႇပၼ် ၵူၼ်းသိုၵ်းႁဝ်းၶႃႈ ၵူႈၵေႃႉ ၵႂႃႇၵၢႆၸမ်သေဢိတ်း။ လွင်ႈဢဝ်ႁူမ်ႇလူမ်ႈ ႁူင်းတွတ်ႈၶႅပ်းၸိူဝ်းၼၼ်ႉတႄႉ ယူႇတီႈၽူႈမီး ပုၼ်ႈၽွၼ်းၵၢၼ်လိူၵ်ႈတင်ႈၶဝ် ၸတ်းမႃးမူတ်းမူတ်းၵူၺ်းယဝ်ႉၶႃႈ” – ဝႃႈၼႆ။
ၼႂ်းငဝ်ႈငုၼ်းဝၢၼ်ႈႁႆး SSPP ၼႆႉ ပိုတ်ႇဝႆႉပၼ်ႁူင်းတွတ်ႈၶႅပ်းၵၢင်ၸႂ် တင်းမူတ်းမီး 3 တီႈ။ တီႈႁူင်းႁဵၼ်းၸၼ်ႉသုင် တီႈၼိုင်ႈ၊ ဝၢၼ်ႈပၢင်လေႃႉ တီႈၼိုင်ႈလႄႈ တီႈဝၢၼ်ႈပႃၶီး တၢင်းၽႄၵႂႃႇ မိူင်းသူႈ တီႈၼိုင်ႈ။ လိူဝ်ၼၼ်ႉ တၢင်ႇဢွင်ႈတီႈ ၼႂ်းပိုၼ်ႉတီႈ SSPP ၵုမ်းၵမ်ဝႆႉၸိူဝ်းၼၼ်ႉၵေႃႈ ပၼ်တမ်းပုင်း ပိုတ်ႇပၼ်ႁူင်းတွတ်ႈၶႅပ်းမူတ်းမူတ်းယူႇ ဝႃႈၼႆ။
“တႃႇပၢင်လိူၵ်ႈတင်ႈၼႆႉတႄႉ ႁဝ်းၶႃႈ တိုၵ်းသူၼ်းထိုင်ၵူၼ်းမိူင်းၼႂ်းပိုၼ်ႉတီႈႁဝ်းၶႃႈ ၵုမ်းၵမ်သေဢမ်ႇၵႃး ယဝ်ႉၵေႃႈ ၵူၼ်းသိုၵ်းႁဝ်းၶႃႈ ၸိူဝ်းမီးသုၼ်ႇတွတ်ႈၶႅပ်းၵၢင်ၸႂ် ၸိူဝ်းၼၼ်ႉ ႁႂ်ႈၵႂႃႇတွတ်ႈၶႅပ်းၵၢင်ၸႂ်ၵၼ်သေၵမ်း” – ၸဝ်ႈႁၢၼ် ၸၢႆး တၢၼ်းဢွင်ႇ လၢတ်ႈၼႄၼင်ႇၼႆ။
ၼႂ်းပိုၼ်ႉတီႈ SSPP ၵုမ်းၵမ်ဝႆႉၼႆႉ ၵူၼ်းမိူင်း ၸဵမ်ၵူၼ်းသိုၵ်း ၸိူဝ်းမီးသုၼ်ႇတွတ်ႈၶႅပ်းၵၢင်ၸႂ် ႁူဝ်ၵူၼ်းတေမီး 2 သႅၼ်ပၢႆ ၸဝ်ႈသိုၵ်း ၸၢႆးသူႉ ၽူႈၶၢၼ်ပၢၵ်ႇ SSPP ယၢမ်ႈလၢတ်ႈဝႆႉတီႈၽူႈတွႆႇႁွၵ်ႈ မိူဝ်ႈႁူဝ်လိူၼ်ဢေႃႊၵတ်ႊသ် 2020 ပူၼ်ႉမႃး ၼႆႉ။
မိူဝ်ႈပီ 2010 တင်း 2015 ၼၼ်ႉၵေႃႈ ၼႂ်းပိုၼ်ႉတီႈ SSPP ၵုမ်းၵမ်ဝႆႉၸိူဝ်းၼၼ်ႉ ၸတ်းႁဵတ်းပၢင်လိူၵ်ႈတင်ႈၵူႈတီႈ တမ်း ပုင်း တွတ်ႈၶႅပ်းၵၢင်ၸႂ် ပၼ်ႁႂ်ႈၵူၼ်းမိူင်း ၵူၼ်းသိုၵ်း ၸိူဝ်းမီးသုၼ်ႇတွတ်ႈၶႅပ်းၵၢင်ၸႂ် တွတ်ႈၶႅပ်းၵၼ် လွတ်ႈလွတ်ႈလႅဝ်း လႅဝ်း ဝႃႈၼႆ။
