ၶၢဝ်ႇၽႄႈလၢမ်းၼိူဝ်ဢွၼ်ႊလၢႆႊ ဢၼ်ဝႃႈ ပႃႇတီႇႁူဝ်သိူဝ် ႁူမ်ႈၵၼ်တင်း ပႃႇတီႇသၢင်ႇသီႈ ဢၼ်ဝႃႈၼၼ်ႉပဵၼ်ၶၢဝ်ႇပွမ်ၵူၺ်း ဝႃႈၼႆ။
ဝၼ်းတီႈ 7/11/2020 မီးၶႅပ်းႁၢင်ႈဢၼ်ပဵၼ်လိၵ်ႈၵိၼ်ၵႅၼ်ႇပႃႇတီႇႁူဝ်သိူဝ် SNLD လႄႈ ပႃႇတီႇသၢင်ႇသီႈ USDP ႁူမ်ႈၵၼ်မိူဝ်ႈဝၼ်းတီႈ 25/10/2020 ၊ သင်ဝႃႈဢွင်ႇပေႉၸိုင်တေၸႅၵ်ႇမႅင်ႈတီႈၼင်ႈၵၼ်ၼႂ်းသၽႃးၸိူင်ႉႁိုဝ်ၸဵမ်ၸိူဝ်းၼႆႉ လၢမ်းၽႄႈၼိူဝ် ၾေႉသ်ပုၵ်ႉ။ တီႈလိၵ်ႈၵိၼ်ၵႅၼ်ႇ ၼၼ်ႉမီး ဢူးတၢၼ်းထေး ႁူဝ်ပဝ်ႈပႃႇတီႇသၢင်ႇသီႈ ၼေႇပျီႇတေႃႇလႄႈ လုင်းၸၢႆးၺုၼ်ႉလုၼ်ႇ (လုင်းၸၢႆးၼုတ်း) ၵႅမ်ႁူဝ်ပဝ်ႈပႃႇတီႇႁူဝ်သိူဝ် လူင်းလၢႆးမိုဝ်းဝႆႉပႃး။
ၵဵဝ်ႇၵပ်းလွင်ႈၼႆႉ လုင်းၸၢႆးလဵၵ်ႉ ၽူႈၶၢၼ်ပၢၵ်ႇ ပႃႇတီႇႁူဝ်သိူဝ် SNLD လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်ၶၢဝ်ႇပွမ်ၵူၺ်းၶႃႈ။ ႁဝ်းၶႃႈလႆႈလၢတ်ႈဝႆႉတီႈၸုမ်းထတ်းထွင်ၶၢဝ်ႇယဝ်ႉ။ ယူႇတီႈၸုမ်းထတ်းထွင်ၶၢဝ်ႇ တေပိုၼ်ၽၢဝ်ႇယူႇၵူၺ်း။ ၶၢဝ်းၶိဝ်းၼႆႉတႄႉၶၢဝ်ႇၼႆႉထုၵ်ႇလႆႈထတ်းထွင်တူၺ်းလီလီ၊ ယႃႇပေလႃႈလီယုမ်ႇမႅၼ်ႈၶႃႈ။”- ဝႃႈၼႆ။
ၵဵဝ်ႇၵပ်းလွင်ႈၶၢဝ်ႇပွမ်ဢွၵ်ႇၽႄႈၼႆႉၾၢႆႇတၢင်း ပႃႇတီႇႁူဝ်သိူဝ်ၵေႃႈ လႆႈပွင်ႇၶၢဝ်ႇဝႆႉၸူး ငဝ်ႈၸုမ်း ၾဵတ်ႉသ်ပုၵ်ႉဝႆႉယဝ်ႉ ဝႃႈၼႆ။
