ရူတ်ႉၵႃး ၽူႈၵွၼ်းၸႄႈတွၼ်ႈလၢင်းၶိူဝ်း ဢၼ်ပႃးၶွမ်ႊမသျိၼ်ႊၵမ်ၵၢၼ်လိူၵ်ႈတင်ႈ ၺႃးယိုဝ်းၾၢႆႇၸၢၼ်းဝဵင်းယဝ်ႉ သိုၵ်းလူင်ပွင်ၸိုင်ႈမၢၼ်ႈ တူင်ႉၼိုင်ၵႂႃႇမႃးလႄႈ ၽူႈတႅၼ်းသိူဝ်ၽိူၵ်ႇလၢတ်ႈဝႃႈ “သင်ဝႃႈ ပၼ်ႁႃသုၵ်ႉယုင်ႈလိူဝ်ႁႅင်းမႃး တႄႉ ပၢင်လိူၵ်ႈတင်ႈတေဢမ်ႇၸၢင်ႈပဵၼ်လႆႈၼၼ်ႉၶႃႈယဝ်ႉ” – ဝႃႈၼႆ။

ရူတ်ႉၵႃး ၽူႈၵွၼ်းၸႄႈတွၼ်ႈလၢင်းၶိူဝ်း ၺႃးယိုဝ်းၼႂ်းၵႄႈဝၢၼ်ႈၼႃးဝွၼ် – ဝၢၼ်ႈႁူၺ်ႈၸွႆး ၾၢႆႇၸၢၼ်းဝဵင်းမိူင်းပၼ်ႇ မိူဝ်ႈဝၼ်းတီႈ 27/10/2020 ယဝ်ႉ သိုၵ်းလူင်ပွင်ၸိုင်ႈမၢၼ်ႈတူင်ႉၼိုင် ၵႂႃႇမႃးလၢႆတီႈ၊ ၼိူဝ်တၢင်း လၢင်းၶိူဝ်း – မိူင်းပၼ်ၵေႃႈ ပၵ်းပႂ်ႉလၢႆတီႈ ၊ ပၼ်ႁႃ ဢၼ်ၵိူတ်ႇၶိုၼ်ႈမႃးၼၼ်ႉ ၽူႈတႅၼ်းသိူဝ်ၽိူၵ်ႇလၢတ်ႈဝႃႈ ၶႂ်ႈႁႂ်ႈသွင်ၾၢႆႇ (ၾၢႆႇ RCSS တင်း သိုၵ်းမၢၼ်ႈ) ႁူပ်ႉဢုပ်ႇၵႄႈလိတ်ႈၵၼ်၊ ပေႃးဢမ်ႇၵႄႈလိတ်ႈ ၸၢင်ႈတုမ်ႉတိူဝ်ႉ ၵၢၼ်လိူၵ်ႈတင်ႈ၊ ၵူဝ်ၵူၼ်းမိူင်း 2 ႁဵင်ပၢႆ ႁၢမ်းသုၼ်ႇတွတ်ႈၶႅပ်းၵၢင်ၸႂ် – ဝႃႈၼႆ။

ၸၢႆးၼွင်ႉ (ႁိုဝ်) ၸၢႆးၼီႉ ၽူႈတႅၼ်းသၽႃးၸႄႈမိူင်း ပႃႇတီႇသိူဝ်ၽိူၵ်ႇ မိူင်းပၼ်ႇ၊ ဢၼ်တေၶဝ်ႈၶႅင်ႇၶိုၼ်း တီႈၼင်ႈ ၸဝ်ႈၵဝ်ႇၼၼ်ႉ လၢတ်ႈဝႃႈ –“ယၢမ်းလဵဝ်ၼႆႉ ႁဝ်းၶႃႈ မႆႈၸႂ်ဝႆႉ ၼႂ်းၶဵတ်ႇသဵင်မၢႆ 2 ဢၼ်ပဵၼ်ပၼ်ႁႃ တၢင်းၾၢႆႇ ၸၢၼ်းဝဵင်း ၼၼ်ႉဝႆႉယူႇၶႃႈ။ သင်ဝႃႈ သိုၵ်းတင်းသွင်ၾၢႆႇ ငူပ်ႉငီႉဢုပ်ႇဢူဝ်းၵၼ်လႆႈတႄႉ ပၢင်လိူၵ်ႈတင်ႈတေၸၢင်ႈ ဢွင်ႇမၢၼ် ၵႂႃႇယူႇၶႃႈ။ သင်ဝႃႈ မီးပၼ်ႁႃသုၵ်ႉယုင်ႈလိူဝ်ႁႅင်းမႃး တႄႉ ပၢင်လိူၵ်ႈတင်ႈတေဢမ်ႇၸၢင်ႈပဵၼ်လႆႈၼၼ်ႉၶႃႈယဝ်ႉ” – ဝႃႈၼႆ။

ဢိင်ၼိူဝ် RCSS/SSA လႆႈယိုဝ်းမႅၼ်ႈၵႃး ၽူႈၵွၼ်းၸႄႈတွၼ်ႈလၢင်းၶိူဝ်းယဝ်ႉ ၼႂ်း 2-3 ဝၼ်းၼႆႉ ၵူၼ်းဝၢၼ်ႈ ၵူၼ်းမိူင်း ၸိူဝ်းလုၵ်ႉ ၼႂ်းဝဵင်းမိူင်းပၼ်ႇ ပွၵ်ႈမိူဝ်းဝၢၼ်ႈၵဝ်ႇ – ၶၢမ်းႁႆႈ ၶၢမ်းသူၼ် ယူႇတီႈဝၢၼ်ႈႁူၺ်ႈၸွႆး၊ ဝၢၼ်ႈၼႃးဝွၼ် ၸိူဝ်းၼၼ်ႉ ၵူဝ်ၺႃးၸၢၵ်ႇသိုၵ်းလႄႈ ၵိုတ်းၵၢၼ်သူၼ်ၵၢၼ်ႁိူၵ်ႈ ပၢႆႈၶဝ်ႈဝဵင်းၶိုၼ်း။

ၸၢႆးၵျေႃႇၶၢႆႇ ၼေႃႇၽူႈတႅၼ်းသၽႃးၵူၼ်းမိူင်း SNLD ၸႄႈဝဵင်းမိူင်းပၼ်ႇ တႄႉလၢတ်ႈဝႃႈ – “ပေႃးတူၺ်းငဝ်းလၢႆး ယၢမ်း လဵဝ် ၼႆႉ ပၢင်တိုၵ်းၵေႃႈ ဢမ်ႇပဵၼ် ပၢင်လိူၵ်ႈတင်ႈၵေႃႈ ဢမ်ႇမီးလွင်ႈတုမ်ႉတိူဝ်ႉသင်ၶႃႈ ၼႂ်းပိုၼ်ႉတီႈ ၵတ်းယဵၼ် ဝႆႉယူႇၶႃႈ၊ ႁဝ်းၶႃႈတူၺ်းတႄႉ ဢမ်ႇမႆႈၸႂ်ႁႅင်းၵႃႈႁိုဝ်ၶႃႈ”– ဝႃႈၼႆ။

ထုင်ႉၼႆႉ မိူဝ်ႈပၢင်လိူၵ်ႈတင်ႈ ပီ 2015 ၸၢႆးၼွင်ႉ ၽူႈတႅၼ်းသၽႃးၸႄႈမိူင်း ပႃႇတီႇသိူဝ်ၽိူၵ်ႇဢွင်ႇပေႉပၢင်လိူၵ်ႈတင်ႈဝႆႉ။ ပၢင်လိူၵ်ႈတင်ႈ ဢၼ်တေၸတ်းႁဵတ်းဝၼ်းတီႈ 8/11/2020 ၼႆႉ ၼႂ်းပိုၼ်ႉတီႈၼႆႉ မီးပႃႇတီႇသိူဝ်ၽိူၵ်ႇ SNDP ၊ ပႃႇတီႇ ႁူဝ်သိူဝ် SNLD ၊ ပႃႇတီႇၼူၵ်ႉယုင်း NLD ၊ ပႃႇတီႇသၢင်ႇသီႈ USDP တေၶဝ်ႈၶေႉၶဵင်ႇၵၼ်။