လူင်ပွင်ၸိုင်ႈၾၢႆႇပၢႆးယူႇလီမိူင်းႁူမ်ႈတုမ်ပိုၼ်ၽၢဝ်ႇႁူဝ်ၼပ်ႉၵူၼ်းၸပ်းတၢင်းပဵၼ်ၶူဝ်ႊဝိတ်ႉ-19 ၼႂ်းၼၼ်ႉပႃးၵူၼ်းမိူင်းတႆးပွတ်းဢွၵ်ႇထႅင်ႈၵေႃႉၼိုင်ႈ ။
မိူဝ်ႈဝႃး ဝၼ်းတီႈ 26/10/2020 ယၢမ်းဝၢႆးဝၼ်း 3 မူင်းၶိုင်ႈႁွင်ႈၵၢၼ်ပၢႆးယူႇလီ မိူင်းႁူမ်ႈတုမ် ပိုၼ်ၽၢဝ်ႇ ထူပ်းႁၼ် ၵူၼ်းမိူင်းယၢင်း ၸိုင်းတႆးပွတ်းဢွၵ်ႇၶူင်း တိတ်း ၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ထႅင်ႈၵေႃႉၼိုင်ႈ လႄႈယၢမ်းလဵဝ် ၵူၼ်းမိူင်းတႆး သၢမ်ပွတ်းတွၼ်ႈ ဢၼ်တိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တင်းမူတ်းမီးၵႂႃႇ 125 ၵေႃႉယဝ်ႉ။ ပွတ်းၸၢၼ်း မီး 78 ၵေႃႉ။ ပွတ်းႁွင်ႇ မီး 36 ၵေႃႉလႄႈ ပွတ်းဢွၵ်ႇၶူင်းသမ်ႉပဵၼ် 11 ၵေႃႉ ၼႆယဝ်ႉ။
ၼႂ်းၼၼ်ႉလူႉတၢႆ 1 ၵေႃႉ၊ လႆႈၶႂၢင်ႉလူင်းႁူင်းယႃ 61 ၵေႃႉ ၊ ယၢမ်းလဵဝ်တိုၵ်ႉယူတ်းယႃတူဝ်ဝႆႉတီႈႁူင်းယႃမီး 63 ၵေႃႉ။
ၻွၵ်ႊတိူဝ်ႊ တူႇသႃႇၶျိတ်ႉတိၼ်ႇ ၾၢႆႇပၢႆးယူႇလီ ၸႄႈမိူင်းတႆး လၢတ်ႈဝႃႈ – “ၼႂ်းမိူင်းတႆး ပွတ်းဢွၵ်ႇၼႆႉ တင်းမူတ်းမီးၵူၼ်း ၸပ်းတၢင်းပဵၼ် 11 ၵေႃႉ၊ တႃႇ 9 ၵေႃႉတႄႉ လႆႈၶႂၢင်ႉႁူင်းယႃယဝ်ႉ။ ၵိုတ်းထႅင်ႈ 2 ၵေႃႉ ပႆႇလူင်းႁူင်းယႃၶႃႈ။ ဢၼ်ၵိုတ်း 2 ၵေႃႉၼၼ်ႉတႄႉ ၵူၼ်းမိူင်းပဵင်း ၵေႃႉၼိုင်ႈလႄႈ ၵူၼ်းမိူင်းယၢင်း ၵေႃႉၼိုင်ႈ၊ ယဝ်ႉၵေႃႈ တၢင်းပွတ်းၸၢၼ်း လႆႈၶႂၢင်ႉလူင်း ႁူင်းယႃ 55 ၵေႃႉ ၵိုတ်း 23 ၵေႃႉ” – ဝႃႈၼႆ။
ယၢမ်းလဵဝ် ၵူၼ်းမိူင်းႁူမ်ႈတုမ် ဢၼ်တိတ်း ၸပ်းတၢင်းပဵၼ်ၶူဝ်ႊဝိတ်ႉ 19 သမ်ႉ မီး 46,200 ၵေႃႉ၊ ယူတ်းယႃ 19,071 ၵေႃႉ၊ လူႉတၢႆ 1,122 ၵေႃႉလႄႈ ယႃၶႅၼ်း 26,007 ၵေႃႉ ႁွင်ႈၵၢၼ်ပၢႆးယူႇလီ မိူင်းႁူမ်ႈတုမ် ပိုၼ်ၽၢဝ်ႇဢွၵ်ႇဝႆႉ။
