ပႃႇတီႇသိူဝ်ၽိူၵ်ႇ SNDP ဢၼ်မီးၸိုဝ်ႈဝႃႈ တီႇမူဝ်ႇၶရႅတ်ႉတိတ်ႉပႃႇတီႇၸၢဝ်းၶိူဝ်းတႆးၼႆႉ ပၢင်လိူၵ်ႈတင်ႈ ဢၼ်တေၸတ်းၼႂ်းဝၼ်းတီႈ 8 /11/2020 ၼႆႉၼၼ်ႉ တီႈဝဵင်းလူင်တူၼ်ႈတီး ငဝ်ႈဝဵင်းၸိုင်ႈတႆး တေၶဝ်ႈၶေႉတီႈၼင်ႈ သၽႃးၸေႈမိူင်းတီႈလဵဝ်ၵူၺ်းဝႃႈၼႆ။
ၼေႃႇၽူႈတႅၼ်းပႃႇတီႇသိူဝ်ၽိူၵ်ႇ ဢၼ်တေၶေႉၶဵင်ႇတီႈၼင်ႈသၽႃးၸေႈမိူင်းၶဵတ်ႇလိူၵ်ႈတင်ႈမၢႆ 1 တီႈဝဵင်းတူၼ်ႈတီးၼႆႉ ပဵၼ်ၸဝ်ႈမဵဝ်းတိၼ်ႉ (လုၵ်ႈၸၢႆးၸဝ်ႈၾႃႉလူင် ၸဝ်ႈၶုၼ်ၵျီႇ ၸၢမ်ၵႃး) ။
မၼ်းၸဝ်ႈၼႆႉပဵၼ်ၶူးသွၼ်ၵဝ်ႇ(လိုဝ်ႈၵၢၼ်) ႁူင်းႁဵၼ်းလူင်ပွင်ၸိုင်ႈ ၊ ယၢမ်းလဵဝ်သမ်ႉ ႁဵတ်းၵၢၼ်တီႈႁူင်းႁဵၼ်းသုၼ်ႇတူဝ်(DNNA Private School Taunggyi) ၊ ယိူင်းဢၢၼ်းမၼ်းၸဝ်ႈ ဢၼ်လႆႈၶဝ်ႈၶေႉၶဵင်ႇပၢင်လိူၵ်ႈတင်ႈတႄႉ တေၶႆႈယုၵ်ႉမုၼ်းလႅၵ်ႈလၢႆႈပိူင်ပၢႆးပၺ်ၺႃ ဝႃႈၼႆ။
“တီႈထုင်ႉႁဝ်းၶႃႈၼႆႉ ၵူၼ်းၼုမ်ႇၵမ်ႈၼမ် ဢမ်ႇလႆႈႁဵၼ်းလိၵ်ႈလၢႆးပၢႆပေႇ တေႃႇပေႃးသုတ်း။ ၶဝ်ၵေႃႈဢမ်ႇလႆႈႁူႉၼမ်ႉလႅမ်ႉပၢႆးပၺ်ၺႃလီလီ။ ၶႃႈၶႂ်ႈပိုတ်ႇႁူင်းသဝ်းပၼ်ၶဝ် ႁႂ်ႈလႆႈယူႇၾရီး (ဢမ်ႇသဵင်ႈၵႃႈၸႂ်ႉၸၢႆႇ သင်) တႃႇႁဵၼ်းလိၵ်ႈလၢႆး ”- ၸဝ်ႈမဵဝ်းတိၼ်ႉ လၢတ်ႈတီႈၽူႈတွႆႇႁွၵ်ႈၼင်ႇၼႆ။
ယၢမ်းလဵဝ် ပၢႆးပၺ်ၺႃ လူင်ပွင်ၸိုင်ႈၼႆႉ မီးဢၼ်ႁဵၼ်းဢဝ်ၼႂ်းလၵ်းသုတ်ႇႁူင်းႁဵၼ်းၵူၺ်း ။ ဢမ်ႇမီးလွင်ႈလူင်းမိုဝ်းႁဵတ်းသၢင်ႈလႄႈ ၶႂ်ႈႁႂ်ႈလုၵ်ႈလၢင်းၵူၼ်းၼုမ်ႇ လႆႈႁဵၼ်းလိၵ်ႈလႄႈၵၢၼ်လူင်းမိုဝ်း ႁဵတ်းသၢင်ႈၸွမ်းၵၼ် ဝႃႈၼႆ။
“ၾၢႆႇၼိုင်ႈ ၶႂ်ႈႁႃပၼ်လွၵ်းၵၢတ်ႇ တႃႇၸဝ်ႈသူၼ်ၸဝ်ႈႁႆႈ၊ ၶႂ်ႈၶိုင်ပၼ်ၵၢၼ်ငၢၼ်းၵူၼ်းၼႂ်းပိုၼ်ႉတီႈ။ ၵွပ်ႈၼႆလႄႈ ဢွင်ႇပေႉ ဢမ်ႇဢွင်ႇပေႉ ပၢင်လိူၵ်ႈတင်ႈၼႆႉ မၼ်းဢိင်ၼိူဝ်ၵူၼ်းမိူင်းလိူၵ်ႈၶႃႈဢေႃႈ။ တႃႇႁဝ်းၶႃႈတေၸၢင်ႈႁဵတ်းၵၢၼ်ပၼ်ၵူၼ်းမိူင်းတႄႉ ႁဝ်းၶႃႈလူဝ်ႇလႆႈယူႇၼႂ်းသၽႃးၵွၼ်ႇၶႃႈဢေႃႈ။ ၵူၺ်းၵႃႈ ၶႃႈတႄႉ သင်ဝႃႈ ဢွင်ႇပေႉၵေႃႈ တေယူႇၼွၵ်ႈသၽႃးသေၸွႆႈထႅမ်ႁဵတ်းသၢင်ႈၵႂႃႇယူႇ” ၸဝ်ႈမဵဝ်းတိၼ်ႉလၢတ်ႈထႅင်ႈၼင်ႇၼႆ။
ပၢင်လိူၵ်ႈတင်ႈပတ်းပိုၼ်ႉၸိုင်ႈမိူင်း 2020 ဢၼ်တေၸတ်းၼႂ်းဝၼ်းတီႈ 8/11/2020 ၼႆႉယူႇတီႈပႃႇတီႇသိူဝ်ၽိူၵ်ႇသေ တေၶဝ်ႈၶေႉၶဵင်ႇၼႂ်းမိူင်းတႆး 39 ၸႄႈဝဵင်း။ ၽူႈတႅၼ်းသၽႃးၸိူဝ်ႉၸၢတ်ႈ 10 ၵေႃႉ၊ သၽႃးၵူၼ်းမိူင်း 32 ၵေႃႉ၊ သၽႃးၸႄႈမိူင်း 64 ၵေႃႉ။ လိူဝ်ၼၼ်ႉ ၽွင်းလူင် ၾၢႆႇၸၢဝ်းၶိူဝ်း သမ်ႉတေၶေႉၶဵင်ႇၼႂ်းတိူင်းတႃႈလိူဝ်ႇ(မၼ်းတလေး)လႄႈ ၸႄႈမိူင်းၶၢင်။ ႁူမ်ႈၼေႃႇၽူႈတႅၼ်းတင်းမူတ်းမီး 108 ၵေႃႉ။
ပႃႇတီႇသိူဝ်ၽိူၵ်ႇၼႆႉမိူဝ်ႈပၢင်လိူၵ်ႈတင်ႈ 2010 ၼၼ်ႉဢွင်ႇပေႉတီႈၼင်ႈ ၼႂ်းသၽႃး 58 တီၼင်ႈ၊ တီႈၼင်ႈၽွင်းလူင်ၼႂ်းၸႄႈမိူင်း 6 ၵေႃႉ။ မိူဝ်ႈပၢင်လိူၵ်ႈတင်ႈ 2015 တႄႉ ဢွင်ႇပေႉတီႈၼင်ႈ ၽူႈတႅၼ်းသၽႃးၸႄႈမိူင်း ၸႄႈဝဵင်းမိူင်းပၼ်ႇ တီႈလဵဝ်။
Ying Tai တႅမ်ႈ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ