ပၢင်လိူၵ်ႈတင်ႈ ပွၵ်ႈၵမ်း 2 ဢၼ်သိုၵ်းမၢၼ်ႈယိုတ်းမိူင်း ၸတ်းႁဵတ်းၵႂႃႇၼႆႉ တီႈၼႂ်းၸႄႈဝဵင်းၵုၼ်ႁဵင် ၸိုင်ႈတႆးပွတ်းၸၢၼ်း  ပႃႇတီႇသိူဝ်ၽိူၵ်ႇ  ဢွင်ႇပေႉ တင်းသၢမ်တီႈ ဝႃႈၼႆ။

ပၢင်လိူၵ်ႈတင်ႈ တွၼ်ႈသွင်ၼႂ်းမိူင်းတႆး 17 ၸႄႈဝဵင်းၼႆ့ ပႃႇတီႇသိူဝ်ၽိူၵ်ႇ ဢွင်ႇပေႉတီႈ မိူင်းတႆး 3 ၸႄႈဝဵင်း ၵုၼ်ႁဵင် ၊ လၢႆးၶႃႈ ၊ မိူင်းၵိုင် – ၼႆယဝ်ႉ ။  

 တီႈဝဵင်းၵုၼ်ႁဵင်ၼႆႉ ပဵၼ် လုင်းၸၢႆးၸိင်ႇပၢင့်  တႅၼ်းၽွင်းသၽႃးၸိူဝ်ႉၸၢတ်ႈ ၊ လုင်းၸၢႆးၵျေႃႇလႃ့   တႅၼ်းၽွင်းသၽႃးၵူၼ်းမိူင်း ၊ လုင်းဝိၼ်းလႅင်ႇ တီႈ တႅၼ်းၽွင်းသၽႃးၸႄႈမိူင်း  ဢွင်ႇပေႉလႆႈၶႅပ်းမႄးၼမ် ။

ၽူႈတူင်ႉၼိုင်ၼႂ်းတူင်ႇဝူင်းၵူၼ်း ၸႄႈဝဵင်းၵုၼ်ႁဵင်ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ တီႈၵုၼ်ႁဵင်ၼႆႉ သိူဝ်ၽိူၵ်ႇဢွင်ႇ​​ပေႉတၢင်း 3 တီႈၼင်ႈၶႃႈဝႃႇ ၊ တိုၵ်ႉလႆႈႁူႉၵူၺ်း ၵႃလိၼႆႉၵူၼ်းသႂ်ႇသိူဝ်ၽိူၵ်ႇၼမ်ၼႃႇ ယွၼ်ႉၼၼ်ဢွင်ႇပေႉတင်းသၢမ်တီႈ ” – ဝႃႈၼႆ ။

ပႃႇတီႇဢၼ်ၶဝ်ႈလိူၵ်ႈတင်ႈ တီႈဝဵင်းၵုၼ်ႁဵင်ၼႆႉ မီး 2 ဢၼ် ၊ ပဵၼ်ပႃႇတီႇ သၢင်ႇသီႈ (USDP) လႄႈ ပႃႇတီႇသိူဝ်ၽိူၵ်ႇ (SNDP)   ။  ႁူင်းပၼ်သဵင် တင်းသဵင်ႈမီးယူႇ 47 တီႈ။ သဵၼ်ႈမၢႆႁူဝ်ၼပ်ႉၵူၼ်း  မီးသုၼ်ႇပၼ်သဵင် ဢၼ်သိုၵ်းမၢၼ်ႈ ပိုၼ်ၽၢဝ်ႇဝႆႉ မီးယူႇ 35221 ၵေႃႉ ။ 

တွၼ်ႈတႃႇ ၼေႃႇတႅၼ်းၽွင်းသၽႃးၵူၼ်းမိူင်း တီႈဝဵင်းၵုၼ်ႁဵင်ၼႆႉ ပႃႇတီႇသိူဝ်ၽိူၵ်ႇ လႆႈ 9371 ၶႅပ်း သင်ႇသီႈၶဝ်လႆႈ 8858 ၊ ၼေႃႇတႅၼ်းၽွင်းသၽႃးၸႄႈမိူင်း ပႃႇတီႇသိူဝ်ၽိူၵ်ႇလႆႈ 9137 သေ ပႃႇတီႇသၢင်ႇသီႈ 8399 ။တႅၼ်းၽွင်းသၽႃးၸိူဝ်ႉၸၢတ်ႈ တႄႉဝၼ်းတီႈ 25/1/2026 ၼႆႉ ၸွင်ႇလႆႈႁူႉ ၊ ယွၼ်ႉတေလႆႈဢဝ်ၵူႈၸႄႈဝဵင်းမႃးႁူမ်ႈၵၼ်ၸွင်ႇၵႆႈႁူႉဝႃႈၼႆ ။

လုင်းၸၢႆးၵျေႃႇလႃ့ တႅၼ်းၽွင်းသၽႃးၵူၼ်းမိူင်း ဝဵင်းၵုၼ်ႁဵင် လၢတ်ႈၽူႈတွႆႇႁွၵ်ႈဝႃႈ – “ၶေႃႈတႅပ်းတတ်းတိုၵ်ႉဢွၵ်ႇမႃးမိူဝ်ႈ 12 မူင်း ၊ ၶႅပ်းၵၢင်ၸႂ်လူင်ႈၼႃႈတႄႉလုၵ်ႈသိုၵ်းၶဝ်မီး 1300 ၊ ၶဝ်လႆႈ 800 ပၢႆ ၵေႃႈ ၶႃႈတိုၵ်ႉလႆႈ 2-3 မႄးၵူၺ်း ။ ၶႅပ်းၵၢင်ၸႂ်လူင်ႈၼႃႈၼႆႈဢမ်ႇလႆႈသေပွၵ်ႈ တွၼ်ႈတႃႇႁဝ်းဢမ်ႇၸႂ်ႈ ၊ သိုၵ်းမၢၼ်ႈၼႆႉတႄႉ ႁွင်ႈၵၢၼ်ၾၢႆႇၽွင်းငမ်းၵူႈလွင်ႈၵေႃႈပဵၼ်ၶဝ်မူတ်းၵူၺ်း ၊ မိူၼ်ၼင်ႇမေႃသွၼ်ၶူးသွၼ် ႁွင်ႈၵၢၼ်ၾၢႆႇပၢႆးပၺ်ႇၺႃႇၼႆႉၵေႃႈၶဝ်မူတ်း”- ဝႃႈၼႆ ။

လိူဝ်ၼၼ်ႉ မၼ်းၸၢႆးသိုပ်ႇလၢတ်ႈထႅင်ႈဝႃႈ – ၵူၼ်းမိူင်းဢၼ်မႃးတွတ်ႈၶႅပ်းၵၢင်ၸႂ်တႄႉတႄႉဢမ်ႇမီးၼမ်။ ပေႃးဢွၵ်ႇဝႃႈ မီးႁူဝ်ၼပ်ႉၵႃႈၼၼ်ႉၵႃႈၼႆႉမၼ်းဢမ်ႇမႅၼ်ႈလႆႈ ယွၼ်ႉသင်ၼႆ ၼႂ်းသဵၼ်ႈမၢႆၼႆႉ ဢၼ်တၢႆၵေႃႈပႃး ၊ ဢၼ်ၵႂႃႇမိူင်းထႆးၵေႃႈပႃး ၊ ၵူၼ်းဢမ်ႇမႃးသႂ်ႇၵေႃႈမီး ၵူၼ်းဢၼ်ၶႂ်ႈသႂ်ႇသမ်ႉ ဢမ်ႇပႃးသဵၼ်ႈၸိုဝ်ႈၵေႃႈပႃး ။ ၼႂ်းငဝ်းလၢႆးၸိူင်ႉၼႆ ပႃႇတီႇသိူဝ်ၽိူၵ်ႇဢွင်ႇပေႉမႃးလႆႈလီငၢမ်း – ဝႃႈၼႆ ။

မိူၼ်ၼင်ၼႆ တီႈဝဵင်းမိူင်းၵိုင်ၵေႃႈ ပႃႇတီႇသိူဝ်ၽိူၵ်ႇ ဢွင်ႇပေႉ တၢင်းသၢမ်တီႈ ဝႃႈၼႆ ။

ၼေႃႇၽူႈတႅၼ်းပႃႇတီႇသိူဝ်ၽိူၵ်ႇ တီႈဝဵင်းမိူင်းၵိုင်ၼႆႉပဵၼ် ၼၢင်းတၢၼ်းတၢၼ်းမူၺ်း ပဵၼ်သၽႃးၵူၼ်းမိူင်း ၊ တႅၼ်းၽွင်းၸႄႈမိူင်းပဵၼ် သြႃႇမ ၼၢင်းမၢတ်ႈၼူၼ်း ၊ ဢၼ်ၶဝ်ႈၶေႉတီႈ PR ပဵၼ် ၼၢင်းလႃႉၸိင်ႇ သၽႃးၸိူဝ်ႉၸၢတ်ႈပဵၼ် ၼၢင်းၶမ်းယိၼ်ႇဢွင်ႇ ။

တီႈဝဵင်းမိူင်းၵိုင်ၼႆႉ ႁူင်းတွတ်ႈၶႅပ်းၵၢင်ၸႂ် မီး 35 ႁူင်း ။ ႁူဝ်ၼပ်ႉၶႅပ်းပႃႇတီႇသိူဝ်ၽိူၵ်ႇ ၼမ်လိူဝ်ၶႅပ်းၵၢင်ၸႂ် ပႃႇတီႇသၢင်ႇသီႈဝႆႉ 3000 ပၢႆ ။

ဢၼ်ပႆႇလႆႈဢဝ်မႃးၼပ်ႉႁူမ်ႈၵၼ်ၼႆႉတေပဵၼ်ႁူင်းတွတ်ႈၶႅပ်းတီႈဝၢၼ်ႈႁမ်းငၢႆး၊ ႁူဝ်ၶၢႆး၊ ၼွင်ႁွႆ၊ ပၢင်သပ်း၊ ၼွင်ၸၢမ်ႁူး၊ မိူင်းယွၼ်း၊ ၶိူဝ်းဢူင်ႇဢူၺ်ႈ၊ ၵုင်းလူမ်း၊ ဝၢၼ်ႈသၢင်ႇႁႃႈ လႄႈ ပွၵ်ႉၼိုင်ႈ ဢိၵ်ႇ ပွၵ်ႉႁူၵ်း ၸိူဝ်းၼႆႉ ၼႆယဝ်ႉ ။

မိူဝ်ႈဝႃး ဝၼ်းတီႈ 11/1/2026  ပၢင်လိူၵ်ႈတင်ႈ ၵမ်းထီႉသွင်ၼႆႉ ၸႄႈဝဵင်းၸိူဝ်းတေလႆႈၸတ်းႁဵတ်းပၢင်လိူၵ်ႈတင်ႈ ၼႂ်းမိူင်းတႆး ပဵၼ် 17 ၸႄႈဝဵင်း။ မိူင်းတႆးပွတ်းၸၢၼ်း ပဵၼ်ၸႄႈဝဵင်းယႂႃႇငၢၼ်ႇ၊ ၸႄႈဝဵင်းသီႇသႅင်ႇ၊ ၸႄႈဝဵင်း ၵၢတ်ႇလေႃႉ၊ ၸႄႈဝဵင်းလွၵ်ႉၸွၵ်ႇ၊ ၸႄႈဝဵင်းၵုၼ်ႁဵင်၊ ၸႄႈဝဵင်းမိူင်းပၼ်ႇ၊ ၸႄႈဝဵင်းမွၵ်ႇမႂ်ႇ၊ ၸႄႈဝဵင်းမိူင်းၵိုင် ၊ ၸႄႈဝဵင်းလၢႆးၶႃႈ ပဵၼ် 9 ၸႄႈဝဵင်း – ဝႃႈၼႆ ။