ၵူၼ်းမိူင်းၸိူဝ်းႁၢမ်းသုၼ်ႇလႆႈ တွတ်ႈၶႅပ်းၵၢင်ၸႂ် ၼႂ်းၸႄႈဝဵင်းၵျွၵ်ႉမႄး တုၵ်းယွၼ်းလွင်ႈၽဵင်ႇပဵင်း၊ လွင်ႈႁူမ်ႇလူမ်ႈ၊ ႁႂ်ႈမီးလွင်ႈငမ်းယဵၼ် ႁႂ်ႈလႆႈႁပ်ႉၶိုၼ်းသုၼ်ႇလႆႈတွတ်ႈၶႅပ်းၵၢင်ၸႂ်။
ဝၼ်းတီႈ 22/10/2020 မိူဝ်ႈၼႆႉ ၵၢင်ၼႂ် ၵူၼ်းဝၢၼ်ႈၵူၼ်းမိူင်း ၵမ်ႈၽွင်ႈသၢၼ်မိုဝ်းၵၼ် တူင်ႉၼိုင် ၼႄၵၢင်ၸႂ် တုၵ်းယွၼ်းၶိုၼ်း သုၼ်ႇလႆႈ လၢႆၸိူဝ်ႉလၢႆယၢင်ႇ ပႃးၸဵမ်တႃႇလႆႈတွတ်ႈၶိုၼ်းၶႅပ်းၵၢင်ၸႂ်၊ ပၢင်တူင်ႉ ၼိုင်ၼႆႉ ၸတ်းႁဵတ်းတီႈ ၵၢင်ဝၢၼ်ႈ ဢိူင်ႇပုင်ႇဝူဝ်း ဢၼ်မီး ၾၢႆႇၸၢၼ်းဝဵင်းၵျွၵ်ႉမႄး။
မီးၵူၼ်းမႃးၶဝ်ႈႁူမ်ႈမွၵ်ႈ 30 ပၢႆ။ လၢႆးၵၢၼ်ၼႂ်းပၢင်ၵႅဝ်ႈတႄႉ မွၵ်ႇႁွင်ႉ ၽူႈယႂ်ႇၵူၼ်းလူင် မွၵ်ႇလၢတ်ႈၶေႃႈၵႂၢမ်း ၵဵဝ်ႇၵပ်းငဝ်းလၢႆး ၼႂ်းပိုၼ်ႉတီႈ၊ ၽူႈတၢင်တူဝ်ၵူၼ်း ၼုမ်ႇမွၵ်ႇလၢတ်ႈၶေႃႈၵႂၢမ်းၵဵဝ်ႇၵပ်းသုၼ်ႇလႆႈ၊ ယုၵ်ႉပၢႆႉ တုၵ်းယွၼ်း ၼႄၵၢင်ၸႂ် ၶႂ်ႈလႆႈလွင်ႈၽဵင်ႇပဵင်း၊ ဢမ်ႇၶႂ်ႈၶႆႈမၢၵ်ႇၵွင်ႈ၊ တုၵ်းယွၼ်းႁႂ်ႈလႆႈတွတ်ႈၶႅပ်းၵၢင်ၸႂ်၊ တုၵ်းယွၼ်းႁႂ်ႈဝၢၼ်ႈမိူင်းၵတ်းယဵၼ် – ၸဵမ်ၸိူဝ်း ၼႆႉ။
“ၵူၼ်းမိူင်းၵမ်ႈၼမ်တႄႉ ၶဝ်ႈဢမ်ႇႁူႉဝႃႈတေဢမ်ႇလႆႈတွတ်ႈၶႅပ်းၵၢင်ၸႂ်၊ ဢမ်ႇလႆႈလိူၵ်ႈၽူႈတႅၼ်း ယဝ်ႉၼႆ။ ႁဝ်းၶႃႈၸတ်းပၢင် သပ်းလႅင်းၼႄ ၸင်ႇပွင်ႇၸႂ်မႃး။ ၵူၼ်းမိူင်းၵေႃႈ ဢမ်ႇၶႂ်ႈႁႂ်ႈပဵၼ်ပၢင်တိုၵ်း၊ ႁဝ်းၶႃႈၵူၼ်းမိူင်း ၶႂ်ႈလႆႈလွင်ႈငမ်းယဵၼ် ႁႂ်ႈလႆႈႁပ်ႉသုၼ်ႇလႆႈ ၽဵင်ႇပဵင်း သေ လႆႈတွတ်ႈၶႅပ်းၵၢင်ၸႂ်ဢေႃႈ၊ လိူဝ်ၼၼ်ႉၵေႃႈ ယိၼ်းၸူမ်းၶွပ်ႈၸႂ်ထိုင် ပီႈၼွင်ႉတီႈၸမ်တီႈၵႆ ၸိူဝ်းၸွႆႈထႅမ်မႃးတင်းသဵင်ႈၶႃႈ” – ၼႆ ၸၢႆးၸွမ်မိူင်းၸုမ်းၵူၼ်းၼုမ်ႇၵျွၵ်ႉမႄး ၽူႈဢွၼ်ႇႁူဝ် တူင်ႉၼိုင် ၼၼ်ႉလၢတ်ႈၼႄ ၼင်ႇၼႆ။
ၵူၼ်းဝၢၼ်ႈဢၼ်မႃးၶဝ်ႈႁူမ်ႈပၢင်ၵႅဝ်ႈၼၼ်ႉတႄႉ မီးၵူၼ်းဝၢၼ်ႈ ၼမ်ႉမၢၵ်ႇႁိၼ်၊ ဝၢၼ်ႈၶၢင်ႈၶၢႆး၊ ၼွင်ႇသိမ်ႇ၊ ၵုင်းၸူင် ၸိူဝ်းၼႆႉ မႃးၶဝ်ႈႁူမ်ႈၸွမ်း။ ယွၼ်ႉပိူဝ်ႈငဝ်းလၢႆးပၢင်တိုၵ်းသိုၵ်းသိူဝ်လႄႈၵူၼ်းမိူင်းတိုၵ်ႉၵႂႃႇမႃးယၢပ်ႇၵေႃႈပိူင်ႈၼိုင်ႈ၊ ယွၼ်ႉတၢင်းပဵၼ်ၶူဝ်ႊဝိတ်ႉ-19 ၽႄႈလၢမ်းႁႅင်းလႄႈ လႆႈႁဵတ်းၸွမ်းၶေႃႈၸိသင်ႇၾၢႆႇပၢႆးယူႇလီၵေႃႈပိူင်ၼိုင်ႈလႄႈ ၸင်ႇလႆႈၸတ်းဢဝ်လၢႆးၵႅပ်ႈ လၢႆးဝႆးလႄႈလၢႆးၵတ်းယဵၼ်ၵူၺ်း – ၸၢႆးၸွမ်မိူင်းလၢတ်ႈၼင်ႇၼႆ။
ၸၢႆၸွမ်မိူင်းလၢတ်ႈဝႃႈ – ၶႂ်ႈတုၵ်းယွၼ်းမွၵ်ႇလၢတ်ႈထိုင် ပီႈၼွင်ႉၵူၼ်းမိူင်းတႆးလၢႆလၢႆၸႄႈဝဵင်း ၸိူဝ်းႁႃး တတ်းႁၢမ်ႈသုၼ်ႇလႆႈၵူၼ်းမိူင်းၼၼ်ႉၶႅၼ်းတေႃႈလုၵ်ႉမႃး တုၵ်းယွၼ်း တူင်ႉၼိုင်ၶတ်းၸႂ် ၸင်ႇတေၸၢင်ႈလႆႈၶႃႈသုၼ်ႇလႆႈၵူၼ်းမိူင်းဢၼ်ၺႃးပိူၼ်ႈတတ်းပိူၼ်ႈႁၢမ်ႈၼၼ်ႉ -ဝႃႈၼႆ။
ႁူဝ်လိူၼ်ဢွၵ်ႇထူဝ်ႊပိူဝ်ႊၼႆႉ သိုၵ်းလူင်ပွင်ၸိုင်ႈမၢၼ်ႈ ႁႅၼ်းသိုၵ်းလေႃႇတိုၵ်း တပ်ႉသိုၵ်းၸိုင်ႈတႆး RCSS/SSA ၼႂ်းၸႄႈဝဵင်းၵျွၵ်ႉမႄး၊ ၵူၼ်းဝၢၼ်ႈၵူၼ်းမိူင်း ၼပ်ႉႁူဝ်ႁဵင် လႆႈပၢႆႈယၢၼ်ႁိူၼ်း ယေးတီႈ ယူႇ။ ဢိင်ဢဝ်တိုဝ်ႉတၢင်းၼႆႉသေ ၶွမ်ႊမသျိၼ်ၵၢၼ်လိူၵ်ႈတင်ႈ ပိုၼ်ႇၽၢဝ်ႇယုၵ်ႉလိူၵ်ႈ ပႅတ်ႈ ၼႂ်း ၸႄႈ ဝဵင်းၵျွၵ်ႉမႄး 12 ဢိူင်ႇ တေဢမ်ႇၸတ်းႁဵတ်းပၢင်လိူၵ်ႈတင်ႈ။
