ပၢင်လိူၵ်ႈတင်ႈ ဢၼ်သိုၵ်းမၢၼ်ႈယိုတ်းမိူင်း ၸတ်းႁဵတ်းၵမ်းထိ 1 ၼႂ်းဝၼ်းတီႈ 28/12/2025 ၼႆႉ ၵူၼ်းမိူင်းတႆးပွတ်းႁွင်ႇ၊ ပွတ်းၸၢၼ်း၊ ပွတ်းဢွၵ်ႇ လႆႈၵႂႃႇသႂ်ႇသဵင်ၵၢင်ၸႂ် လူၺ်ႈ ဢမ်ႇတဵမ်ၸႂ်တေႉတေႉ ၼႆယဝ်ႉ။

ၵူၼ်းမိူင်းၸိူဝ်းၵႂႃႇပၼ်သဵင်ၼႆႉ ၺႃးၶႃႈႁၢပ်ႇၵၢၼ်ၶုၼ် တႂ်ႈဢၢမ်းၼၢတ်ႈသိုၵ်းမၢၼ်ႈယိုတ်းမိူင်း လွၵ်ႇငိုတ်ႈ၊ တဵၵ်းတဵင် ၵူႈလၢႆးတၢင်း၊ တႃႇၵႂႃႇပၼ်သဵင် (တွတ်ႈၶႅပ်းမႄး) ၼႆႉ မၢင် ၸိူဝ်းထုၵ်ႇမႃးႁွင်ႉထိုင်ႁိူၼ်းထႅင်ႈလူး ၵွၼ်ႇၼႆယဝ်ႉ။

ၵူၼ်းမိူင်းပိုၼ်ႉတီႈၼႂ်းဝဵင်းမူႇၸေႊၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ “ၵူၼ်းၵႂႃႇတွတ်ႈမႄးၼႆႉ ပဵၼ်ၵူၼ်းၶၢဝ်ႉ၊ ၵူၼ်းၵႄႇ၊ ၵူၼ်းထဝ်ႈၵမ်ႈၼမ်ယဝ်ႉ။ ပီႈၼွင်ႉတႆးႁဝ်း တမ်ႉ ဢမ်ႇမေႃသႂ်ႇမႄး။ သႂ်ႇဢမ်ႇ သႂ်ႇၵေႃႈဢမ်ႇထူးသင်ၼႆ တဵၵ်းလူင်ၵႂႃႇတိၵ်းတိၵ်းယဝ်ႉဝႃႈ။ မၢင်ၸိူဝ်းဢမ်ႇမေႃၼဵၵ်း/တဵၵ်းလႄႈ သြႃႇမ ၶဝ် လႆႈမႃးၼဵၵ်းပၼ်။ ၶဝ်ၼဵၵ်းႁင်ပၼ်ၵႂႃႇၵေႃႈဢမ်ႇႁူႉ။ တဵၵ်းပၼ်သီၶဵဝ် တၢင်းၼိူဝ်ၼၼ်ႉ တိၵ်းတိၵ်းၼႃႇ” ဝႃႈၼႆ။

ၶၢဝ်းယၢမ်းပိုတ်ႇ – ပိၵ်ႉဢိုတ်း ႁူင်းပၼ်သဵင်ၼႆႉ ၶွမ်ႊမသျိၼ်ႊၵမ်ၵၢၼ်ပၢင်လိူၵ်ႈတင်ႈမိူင်းႁူမ်ႈတုမ် ၶဝ် မၵ်းတတ်းဝႆႉ ၶၢဝ်းယၢမ်း ၵၢင်ၼႂ် 6 မူင်းထိုင် တၢမ်းၶမ်ႈ 4 မူင်းသေတႃႉ ၼႂ်းဝဵင်းမူႇၸေႊတႄႉ သိုပ်ႇတိူဝ်းထႅင် 2 ၸူဝ်ႈမူင်း ၼႆယဝ်ႉ။

ဝၢႆးလင်သိုၵ်းမၢၼ်ႈယိုတ်းႁိမ်ဢဝ်ဢႃႇၼႃႇၸိုင်ႈမိူင်းလိပ်းလိပ်းလႅင်လႅင်ယဝ်ႉၼႆႉ ၵူၼ်းၼုမ်ႇၼႂ်းမိူင်းႁူမ်ႈ တုမ် ၼပ်ႉႁူဝ်ႁဵင်၊ ႁူဝ်မိုၼ်ႇၵေႃႉ ငိူင်ႉပၢႆႈဢွၵ်ႇဝဵင်းၵႂႃႇ တၢင်ႇဝၢၼ်ႈတၢင်ႇ မိူင်းဝႆႉ ႁၢၼ်ႉတေႃႇထိုင်ယၢမ်းလဵဝ် ၵေႃႈ ပႆႇၸၢင်ႈပွၵ်ႈၶိုၼ်းႁိူၼ်းယေး။

ၵွပ်ႈၼၼ် ပၢင်လိူၵ်ႈတင်ႈ ဢၼ်သိုၵ်းမၢၼ်ႈယိုတ်းမိူင်းၸတ်းႁဵတ်းပွၵ်ႈၼႆႉ ဢမ်ႇမီးၵူၼ်းၼုမ်ႇ ၵႂႃႇသႂ်ႇၶႅပ်းၵၢင်ၸႂ်ပၼ်တေႉတေႉဝႃႈဝႃႈ ၼႆယဝ်ႉ။