ၽူႈလၵ်ႉၸၵ်ႉၶုတ်ႈ တီႈလၢင်းၶိူဝ်းလိူင်ႇၼမ်မႃး ၵူၼ်းမိူင်းယူႇယၢပ်ႇၵိၼ်းၸႂ်

မိူဝ်ႈလဵဝ် ၵူၼ်းသၢဝ်းၼၢဝ်း  ၸုမ်းၼိုင်ႈ ယိပ်းၽႃႉယိပ်းမိတ်ႈၶိုၼ်ႈလွင်ႈ တီႈၼႂ်းသူၼ်ၼႂ်းႁိူၵ်ႈ ဝဵင်းလၢင်းၶိူဝ်း  ၊  ၶူဝ်းၶွင်ၵူၼ်းမိူင်းၼႂ်းသူၼ်ၼႂ်းႁႆႈႁၢႆ သၢႆၸႂ် ၵူၼ်းဝၢၼ်ႈၵူၼ်းသူၼ် ဢမ်ႇမီးလွင်ႈႁူမ်ႇလူမ်ႈ၊  ၵူၼ်းမိူင်းယၢပ်ႇၽိုတ်ႇလိူဝ်ႁႅင်း။

တင်ႈတႄႇလိူၼ် သႅပ်ႊထႅမ်ႊပိူဝ်ႊပူၼ်ႉမႃး တေႃႇထိုင်လိူၼ်ဢွၵ်ႊထူဝ်ႊပိူဝ်ႊ 2020 ၼႆႉ ၸိုင်ႈတႆး ပွတ်း ၸၢၼ်း ၸႄႈဝဵင်းလၢင်းၶိူဝ်းၼၼ်ႉ ၵူၼ်းဝၢၼ်ႈ 3 ဝၢၼ်ႈတွၼ်ႈၾၢႆႇတူၵ်းဝဵင်းၸိူဝ်းၼႆႉ ၶူဝ်းၶွင်ၼႂ်းသူၼ် ၼႂ်းႁိူၵ်ႈ ၵဵပ်းဝႆႉၼႂ်းထဵင် ၼိူဝ်ႁၢၼ်ႉ  မိူၼ်ၼင်ႇမေႃႈဝၢၼ်ႇ၊ ၸၢၵ်ႈထႆသူၼ်ၸိူဝ်းၼႆႉ ၺႃးလၵ်ႉၶုတ်ႈ ဢဝ်ၵႂႃႇ။

ၸၢႆးဢွင်ႇမဵဝ်းၵျေႃႇ ၽူႈတႅၼ်းၽွင်းသၽႃးၸႄႈမိူင်း ပႃႇတီႇႁူဝ်သိူဝ်  လၢင်းၶိူဝ်း လၢတ်ႈတီႈ ၽူႈတွႆႇႁွၵ်ႈဝႃႈ-“လွင်ႈၽူႈလၵ်ႉၶဝ် ၶိုၼ်ႈလွင်ႈၶဝ်ႈတဝ်သူၼ်၊ ၶူဝ်းႁိူၵ်ႈၶူဝ်းသူၼ်ႁၢႆ  ၶူဝ်းလဵင်းႁၢႆဝႃႇ ၸိူဝ်းၼႆႉ ငိၼ်းပေႃႈမႄႈၵူၼ်းမိူင်းလၢတ်ႈယူႇၶႃႈဢေႃႈ၊  ၸႂ်ႈလွင်ႈတႄႉယူႇၶႃႈ။ ၵူၺ်းၵႃႈ ဢၼ်ဝႃႈ ယိပ်းၽႃႉယိပ်းမိတ်ႈသေ ၸိူဝ်းၼႆႉတႄႉပႆႇငိၼ်းမႅၼ်ႈ။ မိူဝ်ႈလဵဝ် ၶႃႈႁဝ်းသမ်ႉတိုၵ်ႉသုၵ်ႉၸွမ်း လွင်ႈလူင်းႁႃသဵင်ၵၢၼ်လိူၵ်ႈတင်ႈယူႇလႄႈ ပႆႇလႆႈၸွပ်ႇတူၺ်းတႄႉတႄႉ၊ ဝၢႆးၼႆႉတေၸွပ်ႇတူၺ်းႁႂ်ႈႁူႉ လွင်ႈတႄႉယူႇ ” ဝႃႈၼႆ။

  မိူဝ်ႈဝႃး (20/10/2020)ၼႆႉ ၸၢၵ်ႈထႆသူၼ် ၵူၼ်းဝၢၼ်ႈပၢင်ႁုင်း ဢၼ်ဝႆႉတီႈသူၼ် ႁၢႆၵႂႃႇလမ်းၼိုင်ႈ။ ၵူၼ်းမိူင်းၼႆႉ ပၢႆလိူဝ်ထူပ်းတၢင်းယၢပ်ႇၽိုတ်ႇ ယွၼ်ႉတၢင်းပဵၼ်ၶူဝ်ႊဝိတ်ႉယဝ်ႉ သမ်ႉမႃးထူပ်းၽေး ၽူႈလၵ်ႉထႅင်ႈ၊ ပဵၼ်ဢၼ်လၵ်ႉလွမ်ၵူဝ်ႁႄမႆႈၸႂ်လွင်ႈႁူမ်ႇလူမ်ႈၼႂ်းဝၢၼ်ႈၼႂ်းသူၼ် ၼႆယဝ်ႉ။

ဝၢၼ်ႈဢၼ်  ၺႃးၽေးၽူႈလၵ်ႉၸၵ်ႉၶူဝ်းၼႂ်းသူၼ်ၼႆႉ ပဵၼ်ၵူၼ်းဝၢၼ်ႈလူင်ပွၵ်ႉတူၵ်း၊ ဝၢၼ်ႈလူင်ပွၵ်ႉဢွၵ်ႇ၊ ဝၢၼ်ႈပၢင်ႁုင်း 3 ဝၢၼ်ႈ (ဢၼ်မီးတွၼ်ႈၾၢႆႇတူၵ်းဝဵင်း)သေ  မီးတီႈလိၼ်သူၼ် ယူႇတိတ်းၸပ်းၵၼ်။ မိူဝ်ႈၵူႈပွၵ်ႈ ၵူၼ်းဝၢၼ်ႈၵူၼ်းသူၼ်ဢဝ်ရူတ်ႉၶိူင်ႈ၊ ရူတ်ႉထိပ်ႇ၊ ၸၢၵ်ႈထႆသူၼ် ၸိူဝ်းၼႆႉဝႆႉၼႂ်းႁိူၵ်ႈၼႂ်းသူၼ်   ဢမ်ႇတွၼ်ႉႁၢႆ၊ တေႃႈလဵဝ်ၼႆႉ ႁၢႆတိၵ်းတိၵ်း ထိုင်တီႈၵူၼ်းဝၢၼ်ႈပေႃးလႆႈၵႂႃႇၼွၼ်းပႂ်ႉသူၼ်ၵေႃႈမီး ။

ၵူၼ်းလၢင်းၶိူဝ်း (ပွၵ်ႉဝၢၼ်ႈလူင်)  ၵေႃႉၼိုင်ႈ လၢတ်ႈဝႃႈ- “ၽူႈလၵ်ႉပဵၼ်ၽႂ်ၼႆတႄႉ ဢမ်ႇပႆႇႁူႉ တႅတ်ႈတေႃးၶႃႈ။ ၵူၺ်းၵႃႈ ဢၼ်ပႅၵ်ႇႁူပႅၵ်ႇတႃ တႄႉမီးၵူၼ်း  ၸုမ်းၼိုင်ႈ။  ယိပ်းၽႃႉယိပ်းမိတ်ႈ သေၶိုၼ်ႈလူင်းၶဝ်ႈတဝ်သူၼ်။ မၢင်ပွၵ်ႈၵေႃႈ ၶီႇလူတ်ႉၶိူင်ႈသေလူးၵွၼ်ႇဢေႃႈ။ ၵူၺ်း ဢမ်ႇပႆႇႁၼ်တေႃႇ ၼႃႈတေႃႇတႃလႄႈ ပႆႇၸၢင်ႈတီႉၺွပ်းၶဝ်၊ ပႆႇၸၢင်ႈယိုၼ်ယၼ်ဝႃႈပဵၼ်ၶဝ်။ မၢၵ်ႇၶဝ်ႈတဝ်ႈၼမ်ႉဝႃႇ မႆႉသၼၢပ်ႈၶႃးဝႃႇၸိူဝ်းၼႆႉတႄႉ ၺႃးၵၢၼ်ႉႁၢၵ်းဢဝ်ပႃးၵိင်ႇ ပႃးတူၼ်ႈမၼ်းၶႃႈဢေႃႈ။ ပေႃးပဵၼ်ၼၢင်းယိင်း ၵေႃႉသွင်ၵေႃႉၵူၺ်းတႄႉ ဢမ်ႇၶႆႈႁတ်းၵႂႃႇသူၼ်ႁင်းၵူၺ်းယဝ်ႉၶႃႈ။  ၵူၼ်းၼႂ်းဝၢၼ်ႈႁဝ်း လႆႈၵႂႃႇၼွၼ်းပႂ်ႉ ၼႂ်းႁိူၵ်ႈၼႂ်း သူၼ်ၵေႃႈမီးဢေႃႈ။   ” ဝႃႈၼႆ။

 ၵူၼ်းဝၢၼ်ႈၵူၼ်းသူၼ်တႄႉ လႆႈၵႂႃႇၵဵပ်းၶူဝ်းၶွင်ၸႂ်ႉတိုဝ်းၵၢၼ်သူၼ်မႃးဝႆႉ တီႈႁိူၼ်း ၵမ်ႈၼမ်ယဝ်ႉသေတႃႉ မၢၵ်ႇၶဝ်ႈတဝ်ႈၼမ်ႉသမ်ႉပႆႇလႆႈဢဝ်လႄႈ ဢွၼ်ၵၼ်တုၵ်းယွၼ်း ၶႂ်ႈႁႂ်ႈၵူၼ်းလူင်ဝၢၼ်ႈလႄႈ ပလိၵ်ႈ ၽူႈမီးပုၼ်ႈၽွၼ်း သႂ်ႇၸႂ်လိုပ်ႈလမ်းတီႉၺွပ်းပၼ် ၽူႈလၵ်ႉႁႂ်ႈလႆႈသေၵမ်း ဝႃႈၼႆ။

 လၢင်းၶိူဝ်းၼႆႉ ပဵၼ်ဝဵင်းဢၼ်ပၵ်းလုမ်းၸႄႈတွၼ်ႈလႄႈ ၶႃႈႁၢပ်ႇၵၢၼ်ၶုၼ်ဢၼ်လုၵ်ႉတၢင်ႇတီႈ သီႇလႅၼ်မႃးၵေႃႈမီးၼမ်။ ၵူၼ်းႁဵတ်းၵၢၼ်သိူဝ်ႇတၢင်း ၵေႃႇသၢင်ႈၸွမ်းၼင်ႇၶူင်းၵၢၼ်လူင်ပွင်ၸိုင်ႈ ၵေႃႈမီးၼမ်။ မိူဝ်ႈပီၵၢႆၵေႃႈမီး ၵူၼ်းၸုမ်းၼိုင်ႈၶဝ်ႈလၵ်ႉၶူဝ်းၶွင်ၼႂ်းႁိူၼ်းယေးၵူၼ်းဝၢၼ်ႈ။ထို င်တီႈၵူၼ်းဝၢၼ်ႈႁူမ်ႈၵၼ်ပႂ်ႉတီႉၺွပ်းလႆႈ။