ၵူၼ်းမိူင်းသၢတ်ႇ – မိူင်းတူၼ် တိုၵ်ႉၵူဝ် ပႆႇႁတ်းဢွၵ်ႇႁိူၼ်းယေး ၵႂႃႇမႃးထၢင်ႇႁၢင်ႈမိူၼ်မိူဝ်ႈၵူႈပွၵ်ႈ ဝၢႆးထူပ်းႁၼ် ၵူၼ်း တိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 သၢမ်ၵေႃႉၼၼ်ႉမႃး တေႃႇထိုင်ယၢမ်းလဵဝ် ဝႃႈၼႆ။

တႄႇဢဝ် ဝၼ်းတီႈ 13 ဝၼ်းဢၼ်ၾၢႆႇပၢႆးယူႇလီပိုၼ်ၽၢဝ်ႇၵူၼ်းမိူင်းတူၼ်မီးတၢင်းပဵၼ်ၶူဝ်ႊဝိတ်ႉၼၼ်ႉမႃးတေႃႇထိုင် ယၢမ်းလဵဝ်ၼႆႉ ၵူၼ်းမိူင်းသၢတ်ႇ – မိူင်းတူၼ် ၼႂ်းၸႄႈဝဵင်းမိူင်းသၢတ်ႇ ၸိုင်ႈတႆး ပွတ်း ဢွၵ်ႇၶူင်း ဢွၼ်ၵၼ်ၵူဝ် ဢမ်ႇးႁတ်းဢွၵ်ႇႁိူၼ်းယေး။ ၼႂ်းၵၢင်ဝဵင်း ၼႂ်းၵၢတ်ႇ ၼႂ်းၵိဝ်ႇ သဵၼ်ႈတၢင်းလူင် ၸိူဝ်းၼႆႉ ယဵၼ်သီႇ ႁႅင်ႈႁႅတ်ႇဝႆႉ ဝႃႈၼႆ။  

ၵူၼ်းမိူင်းတူၼ်ဢၼ်တိတ်းၸပ်းၸိူဝ်ႉမႅင်း ၶူဝ်ႊဝိတ်ႉ 19 မီး 2 ၵေႃႉလႄႈ ၵူၼ်းမိူင်းသၢတ်ႇမီး 1 ၵေႃႉၼၼ်ႉ။

ၸၢႆးလူင် ၵူၼ်းမိူင်းသၢတ်ႇ လၢတ်ႈဝႃႈ – “ တီႈမိူင်းသၢတ်ႇႁဝ်းၶႃႈၼႆႉ ပေႃးယဵၼ်သီႇဝႆႉၶႃႈဢေႃႈ ဢမ်ႇမီးၽႂ် ႁတ်းဢွၵ်ႇႁိူၼ်း ယေးၵၼ်ၶႃႈ။ သင်ဢမ်ႇမီးလွင်ႈလမ်ႇလွင်ႈ  ဢမ်ႇဢွၵ်ႇၶႃႈ ။ ၵမ်ႈၼမ် မူၵ်းယူႇဝႆႉၼႂ်းႁိူၼ်းၽႂ် မၼ်း  ၶႃႈဢေႃႈ။  ႁၢၼ်ႉၶၢႆၶူဝ်း ၵေႃႈ ပိၵ်ႉ ၶႃႈဢေႃႈ။ ၼႂ်းၵၢတ်ႇၸိူဝ်းၼႆႉ ၵေႃႈ ယဵၼ်သီႇ ဢမ်ႇႁတ်း သိုဝ်ႉႁတ်းၸၢႆႇၵၼ်ၶႃႈယဝ်ႉ။ ဢမ်ႇႁူႉၼႄႇၼေႃႈ ၽႂ်မီးတၢင်းပဵၼ် ဢမ်ႇမီးဢၼ်ဝႃႈၼၼ်ႉ” – ဝႃႈၼႆ။

ယၢမ်းလဵဝ် ၸွမ်းၼႂ်းၵိဝ်ႇ ၼႂ်းသွႆး ၼႂ်းၵၢင်ဝဵင်း ၼႂ်းၵၢတ်ႇမိူင်းသၢတ်ႇၸိူဝ်းၼႆႉ ယဵၼ်သီႇ ဢမ်ႇပေႃးမီးၵူၼ်းၵိုၼ်းၶွၼ်ႈ မိူၼ် မိူဝ်ႈၵူႈပွၵ်ႈ။ လိူဝ်ၼၼ်ႉ တၢင်းၸႄႈဝဵင်းမိူင်းတူၼ်ၵေႃႈ ၵူၼ်းမိူင်းဢွၼ်ၵၼ်မူၵ်းယူႇဝႆႉၼႂ်းႁိူၼ်းယေးၽႂ်မၼ်း ဢမ်ႇပေႃး ႁတ်း ၵႂႃႇတၢင်းၼွၵ်ႈၵၼ် ၵႃႈႁိုဝ်။

ၼၢင်းဢွမ်ဝၼ်းသႅင် ၵူၼ်းမိူင်းတူၼ် လၢတ်ႈဝႃႈ – “ ယၢမ်းလဵဝ် ၼႂ်းမိူင်းတူၼ် ၼႆႉ ႁႂ်ႈ ၵူၼ်းၵိုၼ်းမိူၼ်မိူဝ်ႈၵူႈပွၵ်ႈတႄႉ ဢမ်ႇၵိုၼ်းယဝ်ႉၶႃႈ။   သင်ဝႃႈ မီးလွင်ႈလမ်ႇလွင်ႈလႄႈ ဢမ်ႇဢွၵ်ႇဢမ်ႇလႆႈၼႆၸိုင်  သႂ်ႇ Mask  သေဢွၵ်ႇၶႃႈဢေႃႈ။ ယဝ်ႉၵေႃႈ ႁႂ်ႈလၢင်ႉမိုဝ်းသေႇသေႇ” – ဝႃႈၼႆ။

ၵူၼ်းမိူင်းဢၼ်တိတ်းၸပ်းတၢင်းပဵၼ် တီႈမိူင်းတူၼ် 2 ၵေႃႉၼၼ်ႉသမ်ႉ ပဵၼ်ၵူၼ်းႁေႃႈၵႃး ၵေႃႉၼိုင်ႈလႄႈ ၽူႈႁၢပ်ႇၵၢၼ် ပၢႆးယူႇလီ ၵေႃႉၼိုင်ႈ။ လိူဝ်ၼၼ်ႉ ၼႂ်းၸႄႈဝဵင်းမိူင်းသၢတ်ႇသမ်ႉ ပဵၼ်ၵူၼ်းႁေႃႈၵႃးထႅင်ႈ ၵေႃႉၼိုင်ႈ ။ ၵူၼ်းမိူင်းတူၼ် 2 ၵေႃႉၼၼ်ႉ ၸဝ်ႈၵႃးတႄႉမီးတီႈႁူင်းယႃမိူင်းတူၼ်၊ ၸဝ်ႈၼႃႈတီႈၾၢႆႇပၢႆးယူႇလီတႄႉ မီးတၢင်းပဵၼ်ဝႆႉၼႂ်းတူဝ်လႄႈ လႆႈသူင်ႇယူတ်းယႃတူဝ်ဝႆႉတီႈႁူင်းယႃၵဵင်းတုင်၊ ၵူၼ်းတီႈမိူင်းသၢတ်ႇၼၼ်ႉတႄႉ ယူတ်းယႃတူဝ်ဝႆႉတီႈႁူင်းယႃ မိူင်းသၢတ်ႇၵူၺ်း။ ၸိူဝ်းၶဝ်ၶႅၼ်းၸိုၼ်ႈယဝ်ႉလႄႈ တေလႆႈလူင်းႁူင်းယႃၼႂ်းဝူင်ႈတေမႃးၼႆႉယဝ်ႉ မေႃယႃလူင်တီႈမိူင်းတူၼ်လၢတ်ႈ။ 

ၸၢႆးၶမ်းလူႇ ၼေႃႇၽူႈတႅၼ်းၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းမိူင်းတူၼ် လၢတ်ႈဝႃႈ – “ၼႂ်းဝဵင်းတႄႉ ဢမ်ႇၵိုၼ်း မိူၼ်မိူဝ်ႈၵူႈပွၵ်ႈယဝ်ႉၶႃႈ ၵူၼ်းၼႆႉ ယဵၼ်ၵႂႃႇၶႃႈဢေႃႈ။ ယဝ်ႉၵေႃႈ ၸဝ်ႈၵႃး တၢင်ႇၵုၼ်ၶဝ်ၵေႃႈ လိုဝ်ႈၵၼ်ဝႆႉ ၸိူင်ႉၼႆ ၶႃႈဢေႃႈ။ ၵမ်ႈၼမ် ဢွၼ်ၵၼ်ယူႇၼႂ်းႁိူၼ်းယေးၵၼ်ၵူၺ်းၶႃႈ။ သင်ဢွၵ်ႇတၢင်းၼွၵ်ႈၼႆၵေႃႈ မိူဝ်ႈၵူႈပွၵ်ႈတႄႉ ဢမ်ႇသႂ်ႇ Mask  ၼၼ်ႉၼႃႇ ၼေႃ။ ၵႃႈၸူဝ်ႈထူပ်းႁၼ် ၵူၼ်းၸပ်းတၢင်းပဵၼ်ၼႆႉမႃးၵေႃႈ ဢွၼ်ၵၼ်သႂ်ႇ Mask ၵၼ်ၵူႈၵေႃႉၶႃႈ ဢေႃႈ” – ဝႃႈၼႆ။

ဢိင်ၼိူဝ် ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ၼႆႉသေ ၵၢၼ်သူၼ်းတုမ် ႁႃသဵင် ၼႂ်းၸႄႈဝဵင်းမိူင်းတူၼ် – မိူင်းသၢတ်ႇ ၸိူဝ်းၼႆႉၵေႃႈ ယူႇတီႈပႃႇတီႇၵၢၼ်မိူင်းၶဝ် လႆႈၵိုတ်းယင်ႉဝႆႉ ပႆႇၸၢင်ႈသူၼ်းတုမ်ႁႃသဵင် ဝႃႈၼႆ။

“ယၢမ်းလဵဝ်ၼႆႉ ယူႇတီႈပႃႇတီႇၵၢၼ်မိူင်း တႃႇတေႁႃသဵင်သူၼ်းတုမ်ၼႆႉ ဢွၼ်ၵၼ်ၵိုတ်းယင်ႉၵၼ်ၶႃႈဢေႃႈ။ ယူႇတီႈ ၶွမ်ႊမသျိၼ်ႊၸႄႈဝဵင်း ဢမ်ႇၸီႉသင်ႇၵိုတ်းၵေႃႈ ၵူၼ်းမိူင်း ဢမ်ႇႁတ်းၵႂႃႇထွမ်ႇ ၶႃႈ။ ၵူဝ်တၢင်းပဵၼ်ၼၼ်ႉၶႃႈယဝ်ႉ” – ၸၢႆးလူင် ၵူၼ်းမိူင်းသၢတ်ႇ လၢတ်ႈၼႄၼင်ႇၼႆ။

ၼႂ်းၸႄႈမိူင်းတႆး  ယၢမ်းလဵဝ် ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 တင်းမူတ်း မီး 80 ၵေႃႉ။ လူႉတၢႆ 1 ၵေႃႉ၊ လႆႈၶႂၢင်ႉလူင်းႁူင်းယႃ 52 ၵေႃႉ။ ပွတ်းၸၢၼ်း 54 ၵေႃႉ၊ ပွတ်းႁွင်ႇ 16 ၵေႃႉလႄႈ ပွတ်းဢွၵ်ႇ 10 ၵေႃႉ။ ၼႂ်းမိူင်းႁူမ်ႈတုမ် သမ်ႉ ၵူၼ်းတိတ်းၸပ်း 38,502 ၵေႃႉ၊ ယႃၶႅၼ်း 18,147 ၵေႃႉ၊ လူႉတၢႆ 945 ၵေႃႉ ယူႇတီႈႁွင်ႈၵၢၼ်ပၢႆး ယူႇလီ မိူင်းႁူမ်ႈတုမ် ပိုၼ်ၽၢဝ်ႇဢွၵ်ႇဝႆႉ မိူဝ်ႈဝၼ်းတီႈ 20/10/2020 ယၢမ်းၵၢင်ၶမ်ႈ 8 မူင်း။