မိူဝ်ႈဝၼ်းတီႈ 25/3/2026 ၸုမ်းႁဵတ်းၵၢၼ်သုၼ်ႇလႆႈတႃႇမိူင်းႁူမ်ႈတုမ် Justic For Myanmar ႁဵတ်းၽိုၼ်လိၵ်ႈႁၢႆးငၢၼ်းဢွၵ်ႇဝႃႈ ၶူၼ်ႉသွၵ်ႈႁၼ်ၶေႃႈမုလ်း ၵဵဝ်ႇၵပ်း လွင်ႈႁဵတ်း သၢင်ႈတူင်ႉၼိုင် ၵူၼ်းၼႂ်းမုင်ႉႁေႃႁိူၼ်း မိၼ်းဢွင်ႇလၢႆႇ ၽူႈၼမ်းသိုၵ်းမၢၼ်ႈယိုတ်းမိူင်း ၵႂႃႇသိုဝ်ႉတီႈလိၼ်ဝၢင်း လႄႈ ႁိူၼ်း ဢၼ်မီးၵႃႈၶၼ်ယႂ်ႇ Issara Residence Rama 9 ၵိုင်ႇငိုၼ်းထႆး 98 လၢၼ်ႉၿၢတ်ႇ (ငိုၼ်းတေႃႊလႃႊ ၸမ် 3 လၢၼ်ႉ) တီႈၼႂ်းဝဵင်းၵုင်းထဵပ်ႈ မိူင်းထႆး ဝႃႈၼႆ။

ႁိူၼ်းၵႃႈၶၼ်ယႂ်ႇလူင်ၼၼ်ႉ ပီႈၼွင်ႉၸိူဝ်ႉၶိူဝ်း ၵူၼ်းၼႂ်းမုင်ႉႁေႃႁိူၼ်း မိၼ်းဢွင်ႇလၢႆႇ ၵႂႃႇသိုဝ်ႉဝႆႉမိူဝ်ႈပူၼ်ႉ မႃး ပီ 2022 ဝၢႆးလင် မိူင်းႁူမ်ႈတုမ် ၺႃးမိၼ်းဢွင်ႇလၢႆႇယိုတ်းဢဝ် ဢႃႇ ၼႃႇၸိုင်ႈမိူင်းသေ ပဵၼ်ၽွင်း သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းပိုၼ်ႉတီႈမီးၵူၼ်းမိူင်းယူႇသဝ်း ၸွမ်းႁူင်းႁဵၼ်း၊ ႁူင်းယႃ၊ ဝတ်ႉဝႃးၽႃႇသိူဝ်ႇ လႄႈ ဢွင်ႈတီႈပၢႆႈၽေးပၢင်တိုၵ်း ၸိူဝ်းၼႆႉသေ ၶႃႈႁႅမ်ၵူၼ်းမိူင်းတၢႆပဵၼ်ၵေႃႇပဵၼ်ၵွင် ပူၼ်ႉပႅၼ်သုၼ်ႇလႆႈၵူၼ်းႁၢဝ်ႈႁႅင်းယူႇ ဝႃႈၼႆ။

ၼႂ်းၽိုၼ်လိၵ်ႈႁၢႆးငၢၼ်းၼၼ်ႉ သပ်းၸႅင်ႈၼႄပႃးဝႆႉဝႃႈ – ပိူဝ်ႈတႃႇဝႄႈလွတ်ႈလႆႈ ပၵ်းပိူင်မိူင်းထႆး ၶေႃႈႁၢမ်ႈ ဢမ်ႇပၼ်ၵူၼ်းမိူင်းၼွၵ်ႈ သိုဝ်ႉတီႈလိၼ် လႄႈ ႁိူၼ်း ၼႂ်းမိူင်းထႆး ၼၼ်ႉသေ လပ်ႉပႅတ်ႈၶေႃႈမုၼ်း ၸိုဝ်ႈသဵင် ၵူၼ်းၵေႃႉသိုဝ်ႉတီႈလိၼ် လႄႈ ႁိူၼ်းၼၼ်ႉ ၸႂ်ႉတိုဝ်းၸိုဝ်ႈသဵင် ၶွမ်ႊပၼီႊ Emerald Princess Company Limited ႁဵတ်းၼႃႈတိူဝ်ႈ ႁပ်ႉပုၼ်ႈၽွၼ်းၸတ်းၵၢၼ်ၵႂႃႇဝႆႉ ဝႃႈၼႆ။

မရတၼႃႇမွင်ႇ ၽူႈၶၢၼ်ပၢၵ်ႇ ၸုမ်းႁဵတ်းၵၢၼ်သုၼ်ႇလႆႈတႃႇမိူင်းႁူမ်ႈတုမ် တွပ်ႇလၢတ်ႈဝႆႉဝႃႈ “ၽွင်းမိၼ်းဢွင်ႇလၢႆႇ ႁဵတ်းပူၼ်ႉပႅၼ်သုၼ်ႇလႆႈၵူၼ်းတေႃႇ ၵူၼ်းမိူင်းႁူမ်ႈတုမ် ႁၢဝ်ႈ ႁႅင်းယူႇၸိူင်ႉၼႆ ၵူၼ်းၼႂ်းမုင်ႉႁေႃႁိူၼ်းမၼ်းသမ်ႉ ဢဝ်ငိုၼ်းဢၼ်လႆႈမႃးလူၺ်ႈဢမ်ႇမီးလွင်ႈပူင်ႇသႂ်ၼၼ်ႉသေ ၵႂႃႇလူင်းတိုၼ်းလၢင်းဝႆႉ ၼႂ်းမိူင်းထႆးယူႇၼႆႉ လီၸၢၼ်ႈလီမိူဝ်ႇႁႅင်း ၼႃႇ” ဝႃႈၼႆ။

လႆႈႁူႉဝႃႈ ၸိုဝ်ႈၵူၼ်းၵေႃႉသိုဝ်ႉဢွင်ႈတီႈလိၼ် လႄႈ ႁိူၼ်းၵႃႈၶၼ်ယႂ်ႇ ၼႂ်းဝဵင်းလူင်ၵုင်းထဵပ်ႈ မိူင်းထႆးၼၼ်ႉ ပဵၼ်လုၵ်ႈပႂ်ႉမိၼ်းဢွင်ႇလၢႆႇ ၸိုဝ်ႈႁွင်ႉ – မဵဝ်းရတၼႃႇထၢႆႉ ၵေႃႉဢၼ်ပႆႇၺႃးလူင်ပွင်ၸိုင်ႈမိူင်းၼွၵ်ႈၶဝ် ဢဝ်တၢင်းၽိတ်းပၼ်တူတ်ႈတၢမ်ႇ ဢဝ်လိူင်ႈသင်သေလွင်ႈၼၼ်ႉ ဝႃႈၼႆ။

လိူဝ်ၼၼ်ႉ ၼင်ႇႁိုဝ် ပီႈၼွင်ႉၸိူဝ်ႉၶိူဝ်း ၵူၼ်းၼႂ်းမုင်ႉႁေႃႁိူၼ်း မိၼ်းဢွင်ႇလၢႆႇ ပေႃးတေသိုဝ်ႉလႆႈ ႁိူၼ်းလင်ၼၼ်ႉ ၼႂ်းမိူင်းထႆးၼႆႉ ၽူႈမၢၵ်ႈၵူၼ်းမီးလူင်ၵေႃႉႁဵတ်းၵၢၼ်ၽိတ်းပၵ်းပိူင်ႈ ႁူမ်ႈၸွမ်းသိုၵ်းမၢၼ်ႈ ထုၼ်းမိၼ်းလၢတ်ႉ ၵေႃႈၸွႆႈငူပ်ႉငီႉပၼ်ပႃး။ မိူဝ်ႈပီ 2017 ပူၼ်ႉမႃးၼၼ်ႉၵေႃႈ မၼ်းၸၢႆး ယၢမ်ႈၸွႆႈထႅမ် ငူပ်ႉငီႉၶိုင်ပွင် သိုဝ်ႉပၼ် ႁွင်ႈသဝ်း (တိုက်ခန်း) တႃႇလုၵ်ႈၸၢႆးမိၼ်းဢွင်ႇလၢႆႇ ၸိုဝ်ႈႁွင်ႉဝႃႈ ဢွင်ႇပျေႉၸူင်ႇၼႆၼၼ်ႉ တီႈ Belle Grand Rama 9 ၼၼ်ႉ ႁွင်ႈၼိုင်ႈ ဝႃႈၼႆ။

ၵဵဝ်ႇလူၺ်ႈလွင်ႈၵူၼ်းၼႂ်းမုင်ႉႁေႃႁိူၼ်း မိၼ်းဢွင်ႇလၢႆႇ ၵႂႃႇသိုဝ်ႉဢွင်ႈတီႈလိၼ် လႄႈ ႁိူၼ်း ၼႂ်းဝဵင်းၵုင်းထဵပ်ႈ ၼၼ်ႉသေ ၸုမ်းႁဵတ်းၵၢၼ်သုၼ်ႇလႆႈတႃႇမိူင်းႁူမ်ႈတုမ် တုၵ်းယွၼ်းထိုင် ၽူႈမီးပုၼ်ႈၽွၼ်း ၵူၼ်းၸိူဝ်းလႆႈ ဢႃႇၼႃႇဝႆႉ ၼႂ်းမိူင်းထႆးဝႃႈ – ငိုၼ်းတွင်းဢၼ်ၵူၼ်းၼႂ်းမုင်ႉႁေႃႁိူၼ်း ဢဝ်ၵႂႃႇသိုဝ်ႉႁိူၼ်းယေးဝႆႉတီႈမိူင်းထႆး ၼၼ်ႉ ပဵၼ်ငိုၼ်းဢၼ်လႆႈမႃးလူၺ်ႈဢမ်ႇမီးလွင်ႈပူင်ႇသႂ်လႄႈ ၶႂ်ႈႁႂ်ႈၸဝ်ႈၼႃႈတီႈၶဝ် ဢဝ်ပၵ်းပိူင်ၾိင်ႈမိူင်း ဢၼ်ၵဵဝ်ႇၵွင်ႉၸွမ်းၼၼ်ႉသေ ၵူတ်ႇထတ်း ဢဝ်လိူင်ႈပၼ်ၵႂႃႇ ဝႃႈၼႆ။