ၵူၼ်းၵျွၵ်ႉမႄး ႁူဝ်ၵူၼ်း ဢမ်ႇယွမ်းမိုၼ်ႇ ႁၢမ်းသုၼ်ႇတွတ်ႈၶႅပ်းၵၢင်ၸႂ် ယွၼ်ႉၼႂ်းပိုၼ်ႉတီႈ ဢမ်ႇၼိမ်သဝ်း/ ဢမ်ႇ မီးလွင်ႈ ႁူမ်ႇလူမ်ႈၼႆသေ ယူႇတီႈ UEC မိူင်းႁူမ်ႈတုမ် ပိုၼ်ၽၢဝ်ႇ ႁၢမ်ႈၸတ်းႁဵတ်း ပၢင်လိူၵ်ႈတင်ႈ ဝႃႈၼႆ။
ၵူၼ်းမိူင်း တႃႇ 12 ဢိူင်ႇ ႁူဝ်ၵူၼ်း ဢမ်ႇယွမ်းမိုၼ်ႇ ၼႂ်းၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ ဢၼ်ႁၢမ်းသုၼ်ႇတွတ်ႈ ၶႅပ်းၵၢင်ၸႂ်ၵၼ်ၼၼ်ႉသမ်ႉ ဢိူင်ႇၼွင်သိမ်ႇ၊ ၶိူဝ်းၼိမ်း၊ ပၢင်ႇလေႃႉ၊ ႁၢႆးၵုၺ်၊ ၵုၼ်ၵေႃႇ၊ ၵေႃပလၢဝ် ၊ ပၢင်မၢၵ်ႇမိုဝ်း၊ တေႃႉ သၢင်ႇ၊ ပႃႇလႅင်၊ ၵွင်းၸလၢမ်း၊ ဢိူင်ႇၶိုမ်းလႄႈ ဝၢၼ်ႈၸၢၵ်ႈ ၸိူဝ်းၼႆႉ ထုၵ်ႇၶွမ်ႊမသျိၼ်ႊၵၢၼ်လိူၵ်ႈတင်ႈမိူင်းႁူမ်းတုမ် ပိုၼ်ၽၢဝ်ႇ ႁၢမ်းၸတ်းႁဵတ်းပၢင်လိူၵ်ႈတင်ႈ မိူဝ်ႈဝၼ်းတီႈ 16/10/2020 ယၢမ်းၵၢင်ၶမ်ႈ 8 မူင်း ယွၼ်ႉၼႂ်းပိုၼ်ႉတီႈ ဢမ်ႇ မီးလွင်ႈၼိမ်သဝ်း/ ၵတ်းယဵၼ်လႄႈ ဢမ်ႇမီးလွင်ႈႁူမ်ႇလူမ်ႈ ဝႃႈၼႆ။
ၼၢင်းဢိမုၼ်ႇဢွင်ႇ(ႁွင်ႉ) ၼၢင်းလၢဝ်လၢဝ် ၼေႃႇၽူႈတႅၼ်းသၽႃး ၶဵတ်ႇလိူၵ်ႈတင်ႈမၢႆ 1 ၸႄႈဝဵင်းၵျွၵ်ႉမႄး လၢတ်ႈဝႃႈ – “ တီႈၶဵတ်ႇသဵင်ၶႃႈၼႆႉ ႁူဝ်ၵူၼ်း တေဢမ်ႇလႆႈတွတ်ႈၶႅပ်းၵၢင်ၸႂ် တေမီး 6 ႁဵင်ပၢႆ တႃႇ 4 ဢိူင်ႇၶႃႈဢေႃႈ။ ဢွင်ႈတီႈ ၸိူဝ်းၼႆႉ ဢမ်ႇမီးပၼ်ႁႃသင်ၶႃႈ။ တေမီးတီႈၼိုင်ႈၵူၺ်း တေပဵၼ်တီႈဢိူင်ႇၼွင်သိမ်ႇၼၼ်ႉ မီးသိုၵ်းမၢၼ်ႈၶဝ် ယူႇဝႆႉၵူၺ်း လွင်ႈ ယိုဝ်းၵၼ် ၸိူဝ်းၼၼ်ႉတႄႉ ဢမ်ႇမီး”- ဝႃႈၼႆ။
ၼႂ်း 4 ဢိူင်ႇ ဢၼ်ယူႇၼႂ်းၶဵတ်ႇလိူၵ်ႈတင်ႈ ၸႄႈမိူင်းမၢႆ 1 ၾၢႆႇၸၢၼ်းဝဵင်းၵျွၵ်ႉမႄးၼၼ်ႉသမ်ႉ တေပဵၼ်ဢိူင်ႇၼွင်သိမ်ႇ၊ ၶိူဝ်းၼိမ်း၊ ပၢင်ႇလေႃႉလႄႈ ႁၢႆးၵုၺ် ၸိူဝ်းၼႆႉ ႁူဝ်ၵူၼ်း တေမီးဢမ်ႇယွမ်း 6 ႁဵင်ပၢႆ။
ၼႂ်း 8 ဢိူင်ႇ ဢၼ်မီးၼႂ်းၶဵတ်ႇလိူၵ်ႈတင်ႈ ၸႄႈမိူင်းမၢႆ 2 ၾၢႆႇႁွင်ႇဝဵင်းၵျွၵ်ႉမႄးၼၼ်ႉသမ်ႉ တေပဵၼ် ဢိူင်ႇၵွင်းၸလၢမ်း ႁူဝ်ၵူၼ်း 797 ၵေႃႉ၊ ပႃႇလႅင် 998 ၵေႃႉ၊ ၵေႃပလၢဝ် 925 ၵေႃႉ၊ ၵုၼ်ၵေႃႇ 988 ၵေႃႉ၊ ဢိူင်ႇၶိုမ်း 2,000 ၵေႃႉ၊ တေႃႇသၢင်ႇ 1,390 ၵေႃႉ ဝၢၼ်ႈၸၢၵ်ႈ 1,200 ၵေႃႉ ၸိူဝ်းၼႆႉ ႁူမ်ႈၵၼ် 8,298 ၵေႃႉလႄႈ တီႈဢိူင်ႇပၢင်မၢၵ်ႇမိုဝ်းတႄႉ ပႆႇလႆႈႁူႉႁူဝ်ၵူၼ်း မီးၵႃႈႁိုဝ် သိုဝ်ႇၶၢဝ်ႇသူၺ်ႇပီႇမေႇဢွၵ်ႇဝႆႉ။
တႄႇဢဝ်ႁူဝ်လိူၼ်ဢွၵ်ႊထူဝ်ႊၿိူဝ်ႊ 2020 ၼႆႉမႃး သိုၵ်းလူင်ပွင်ၸိုင်ႈမၢၼ်ႈ ႁႅၼ်းသိုၵ်းလေႃႇတိုၵ်း RCSS/SSA ၾၢႆႇ ၸၢၼ်းဝဵင်းၵျွၵ်ႉမႄး ႁၢဝ်ႈႁႅင်းလႄႈ ၵူၼ်းမိူင်း ဢမ်ႇယွမ်း 4 ႁဵင် လႆႈဢွၼ်ၵၼ်ပၢႆႈယၢၼ်ႁိူၼ်းယေး တီႈယူႇတၼ်းသဝ်း ၵၼ်။ တႄႇဢဝ်ဝၼ်းတီႈ 10 ၼႆႉမႃး သဵင်ၵွင်ႈသဵင်မၢၵ်ႇယဵၼ်လူင်းသေ ၵူၼ်းပၢႆႈၽေးသိုၵ်း 4 ႁဵင်ပၢႆ ၸင်ႇၶိုၼ်းဢွၼ်ၵၼ် ပွၵ်ႈၶိုၼ်းယေးၵၼ် ၼႂ်းဝၼ်းတီႈ 16-17 ပူၼ်ႉမႃးၼႆႉ။
လိူဝ်ၼၼ်ႉ မိူဝ်ႈဝၼ်းတီႈ 13/10/2020 ယၢမ်းဝၢႆးဝၼ်းမွၵ်ႈ 1 မူင်း ထိုင် 3 မူင်းၼၼ်ႉၵေႃႈ သိုၵ်းလူင်ပွင်ၸိုင်ႈမၢၼ်ႈ လေႃႇ တိုၵ်းတပ်ႉသိုၵ်းတဢၢင်း TNLA တၢင်းပွတ်းမိူင်းငေႃႉ ဝၢၼ်ႈၶိုမ်းၵဝ်ႇ ၶိုမ်းမႂ်ႇ ႁၢဝ်ႈႁႅင်း။ ၵူၺ်းၵႃႈ ၵူၼ်းပၢႆႈၽေးသိုၵ်းတႄႉ ဢမ်ႇတၼ်းမီး ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ