ပၢင်တိုၵ်းတီႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇၼၼ်ႉ မၢၵ်ႇလူင်တူၵ်းသႂ်ႇႁိူၼ်းၵူၼ်းဝၢၼ်ႈ ႁိူၼ်းယေးရူတ်ႉၵႃးလုၵွႆ ၵူၼ်းမၢတ်ႇၸဵပ်းၵေႃႉၼိုင်ႈ သိုၵ်းလူင်ပွင်ၸိုင်ႈပိုၼ်ၽၢဝ်ႇဝႃႈ ပဵၼ် RCSS ယိုဝ်း လွင်ႈၼႆႉသိုၵ်းတႆးတွပ်ႇၵႄႈဝႃႈ ဢမ်ႇလႆႈယိုဝ်း။

မၢၵ်ႇလူင်ၼႆႉ တူၵ်းသႂ်ႇႁိူၼ်းၵူၼ်းဝၢၼ်ႈၶၢင်ႈၶၢႆး ဢိူင်ႇၶၢင်ႈၶၢႆး ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ မိူဝ်ႈဝၼ်းတီႈ 4/10/2020 ၽွင်းပၢင်တိုၵ်း သိုၵ်းလူင်ပွင်ၸိုင်ႈလႄႈ သိုၵ်း RCSS/SSA ။

 ဝၼ်းတီႈ 6/10/2020 ၼၼ်ႉ ယူႇတီႈႁွင်ႈၵၢၼ်ၾၢႆႇပိုၼ်ၽၢဝ်ႇ  တပ်ႉသိုၵ်းလူင်ပွင်ၸိုင်ႈမၢၼ်ႈ တႅမ်ႈဢွၵ်ႇၶၢဝ်ႇဝႃႈ မၢၵ်ႇလူင် တူၵ်းသႂ်ႇ ႁိူၼ်းယေးၵူၼ်းဝၢၼ်ႈၶၢင်ႈၶၢႆး ဢိူင်ႇၶၢင်ႈၶၢႆးသေ တႅၵ်ႇၽူင်ႉသႂ်ႇ လုင်းၵျႃႇဢေး ဢႃယု 45 ပီ လႆႈမၢတ်ႇၸဵပ်း ႁၢဝ်ႈႁႅင်းထိုင်တီႈ လႆႈႁၢမ်သူင်ႇယူတ်းယႃၼၼ်ႉ ပဵၼ်မၢၵ်ႇလူင်   RCSS/SSA   ယိုဝ်းသႂ်ႇ ဝႃႈၼႆ။

ၵဵဝ်ႇၵပ်းလွင်ႈၼႆႉ ၸဝ်ႈသိုၵ်း ဢုမ်ႈၶိူဝ်း ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇလူင်တူၵ်းသႂ်ႇ ၵူၼ်းမိူင်းမၢတ်ႇၸဵပ်းၼၼ်ႉ ထၢမ်တီႈၵူၼ်းဝၢၼ်ႈၵူၼ်း မိူင်းပိုၼ်ႉတီႈဢၼ်တူဝ်ထူပ်းတႃႁၼ် မီးသၢၵ်ႈသေႇၼၼ်ႉလႄႈ ၶဝ်တေႁူႉလီဝႃႈ ပဵၼ်ၽႂ် ယိုဝ်းသႂ်ႇ။ လွင်ႈၼႆႉ တပ်ႉမ တေႃႇၶဝ် မၢပ်ႇၼႄးသႂ်ႇႁဝ်းၶႃႈၵူၺ်း။ တပ်ႉမတေႃႇသိုၵ်းမၢၼ်ႈၼႆႉ လွင်ႈၼႄးသႂ်ႇပိူၼ်ႈ၊ တၢင်ႇတၢင်းၽိတ်းသႂ်ႇပိူၼ်ႈၼႆႉ ၶဝ်မေႃၼႃႇ ၶႅၼ်ႇၼႃႇ” – ဝႃႈၼႆ။

 တပ်ႉသိုၵ်းလူင်ပွင်ၸိုင်ႈမၢၼ်ႈဢွၵ်ႇၶၢဝ်ႇဝႆႉၼၼ်ႉဝႃႈ  ဝၼ်းတီႈ 4 ယၢမ်းဝၢႆးဝၼ်း ၽွင်းသိုၵ်းလူင်ပွင်ၸိုင်ႈ   ဢဝ်ႁူမ်ႇလူမ်ႈ ၵႂၢတ်ႇလၢင်ႉ  ပိုၼ်ႉတီႈ  တီႈဢၼ်သိုၵ်း RCSS/SSA  ပူၼ်ႉပႅၼ်ၶဝ်ႈမႃးတူင်ႉၼိုင်ၼၼ်ႉ   သွင်ၾၢႆႇလႆႈပဵၼ်ပၢင်တိုၵ်းၵၼ် တီႈႁိမ်းဝၢၼ်ႈၶၢင်ႈၶၢႆး ၾၢႆႇဢွၵ်ႇဝၢၼ်ႈ ယၢၼ်ၵႆ 3000 မီႊတိူဝ်ႊ။  မၢၵ်ႇလူင်သိုၵ်း RCSS ယိုဝ်းမႃးတူၵ်းသႂ်ႇ   ႁိူၼ်းပႃႈၶမ်းၼုမ်ႇသေ တႅၵ်ႇၽူင်ႉသႂ်ႇ ၸၢႆး ၵျႃႇဢေး လႆႈမၢတ်ႇၸဵပ်း  ဝႃႈၼႆ။

ၵဵဝ်ႇၵပ်းလွင်ႈၼႆႉ ပႃႈၶမ်းၼုမ်ႇ ၸဝ်ႈႁိူၼ်း လၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇၼႆႉ တူၵ်းသႂ်ႇႁိူၼ်းၶႃႈ 2 လုၵ်ႈ။ လုၵ်ႈၼိုင်ႈ တူၵ်းသႂ်ႇတီႈႁိူၼ်းယေး။ ထႅင်ႈ လုၵ်ႈၼိုင်ႈတူၵ်းတႅၵ်ႇၼႂ်းဝၢင်းႁိူၼ်းၶႃႈ။ မၢၵ်ႇဢၼ်တႅၵ်ႇသႂ်ႇတီႈႁိူၼ်းၼၼ်ႉ တႅၵ်ႇတိူဝ်ႉသႂ်ႇ ၵူၼ်းႁဵတ်းၵၢၼ် ႁဝ်း ၸၢႆး ၵျႃႇဢေး လႆႈမၢတ်ႇၸဵပ်းၵႂႃႇၶႃႈဢေႃႈ။ ဢၼ်တႅၵ်ႇတီႈၼႂ်းဝၢင်းႁိူၼ်းၼၼ်ႉ တိူဝ်ႉသႂ်ႇၸၢၵ်ႈထႆလူင် မၢၵ်ႇၸၢၵ်ႈပွင်ႇ၊ လေး လူင်းထူဝ်းၵေႃႈ ၵွႆၸွမ်းၵမ်ႈၽွင်ႈ။ ယဝ်ႉၵေႃႈ ရူတ်ႉၵႃး မၢၼ်ႇၾၢႆႇၼႃႈ/ လင် လႄႈ မၢၼ်ႇၽၵ်းတူ ၸိူဝ်းၼႆႉ တႅၵ်ႇမူတ်း ။   ” – ဝႃႈၼႆ။

မၼ်းၼၢင်းယင်းလၢတ်ႈထႅင်ႈဝႃႈ  ဝၢႆးလင်မၢၵ်ႇတူၵ်းသႂ်ႇႁိူၼ်းယဝ်ႈ သိုၵ်းမၢၼ်ႈမႃးတီႈႁိူၼ်းသေမႃးၵဵပ်းၸၢၵ်ႇမၢၵ်ႇ။ ဝၢႆးၸဝ်ႈႁိူၼ်းလႄႈၵူၼ်းမၢတ်ႇၸဵပ်း ပၢႆႈၽေးသိုၵ်းၵႂႃႇယူႇတီႈၵျွင်းမုၼ်ၸဝ်ႈ သိုၵ်းလူင်ပွင်ၸိုင်ႈမႃးယူႇသဝ်း ယႃႉတဝ် ဢဝ်ၵိၼ်ၶဝ်ႈၼမ်ႉတၢင်းၵိၼ် ၶူၼ်ႉသွၵ်ႈၶူဝ်းႁိူၼ်းပႃးထႅင်ႈ။ လိူဝ်ၼၼ်ႉ ႁႂ်ႈၵူၼ်းသိုၵ်း ပႂ်ႉယၢမ်းဝႆႉတီႈ ၽၵ်းတူႁိူၼ်းမၼ်းၼၢင်းသေ ၵူၼ်းဝၢၼ်ႈ၊ ၵူၼ်းႁိူၼ်း တေၶဝ်ႈႁိူၼ်း ယင်းဢမ်ႇပၼ်ၶဝ်ႈ ဝႃႈၼႆ။

ၸၢႆးၵျႃႇဢေး ဢႃယု 45 ပီ  ၼႆႉ ၸၢၵ်ႇမၢၵ်ႇတိူဝ်ႉ ၸွမ်းတူဝ် ၸွမ်းၶႃ ၸွမ်းမိုဝ်း လႄႈ ႁိမ်းႁူ မၼ်းၸၢႆး ၊  ယၢမ်းလဵဝ်ယူတ်းယႃတူဝ်ဝႆႉတီႈႁူင်းယႃ ၵျွၵ်ႉမႄး။

တႄႇဢဝ်ႁူဝ်လိူၼ်ဢွၵ်ႊထူဝ်ႊၿိူဝ်ႊ 2020 ၼႆႉမႃး သိုၵ်းလူင်ပွင်ၸိုင်ႈမၢၼ်ႈ တင်း RCSS ပဵၼ်ပၢင်တိုၵ်းၵၼ်မႃး တၢင်းၾၢႆႇ ၸၢၼ်း ဝဵင်းၵျွၵ်ႉမႄးႁၢဝ်ႈႁႅင်းသေ ႁဵတ်းႁႂ်ႈၵူၼ်းမိူင်းပိုၼ်ႉတီႈ လႆႈပၢႆႈၽေးသိုၵ်း ယၢၼ်ႁိူၼ်းယေးတီႈယူႇၵၼ် တင်းမူတ်း မွၵ်ႈ 3 ႁဵင်ၵေႃႉ။

ထႅင်ႈၾၢႆႇၼိုင်ႈၵေႃႈ သိုၵ်းလူင်ပွင်ၸိုင်ႈမၢၼ်ႈၼႆႉ မိူဝ်ႈဝၼ်းတီႈ 29/9/2020 ၼၼ်ႉ ပိုၼ်ၽၢဝ်ႇၵိုတ်းတိုၵ်းၾၢႆႇလဵဝ်ထႅင်ႈ တႃႇၼိုင်ႈလိူၼ်   ဝၼ်းတီႈ 1-31/10/2020  ။

  ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ၼႆႉ ပဵၼ်ၸုမ်းဢၼ်လူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ဝႆႉသေ ၶဝ်ႈပႃးၼႂ်းၵၢၼ်ၵေႃႇသၢင်ႈလွင်ႈငမ်းယဵၼ်ၸိုင်ႈမိူင်း ၵူႈၶၵ်ႉတွၼ်ႈ။