တင်ႈတႄႇ သိုၵ်းတဢၢင်း တင်း သိုၵ်းၵဝ်ႈၵၢင်ႉ ၽိတ်းမေႃးပဵၼ်ပၼ်ႁႃလိုပ်ႈလမ်းၵၼ်လွင်ႈၵၢၼ်ၽွင်းငမ်း ၼႂ်းဝဵင်းၵူတ်ႉၶၢႆ – ၶဵင်ႈၶႅင်ၵၢၼ်သိုၵ်းတေႃႇၵၼ် တတ်းသဵၼ်ႈတၢင်းၵႂႃႇမႃးၵၼ် တင်ႈတႄႇႁူဝ်လိူၼ်မၢတ်ႉၶျ်မႃးတေႃႇယၢမ်းလဵဝ် ပႆႇႁၼ်လၢႆးတၢင်းတႃႇၵႄႈလိတ်ႈပၼ်ႁႃၼႂ်းၵႄႈသွင်ၸုမ်း ။

မိူဝ်ႈဝၼ်းတီႈ 8 ယၢမ်းတၢမ်းၶမ်ႈ ၸုမ်းသိုၵ်းၶႄႇၵဝ်ႈၵၢင်ႉ ၸိူဝ်းပၼ်ႇၵၢၼ်ၽွင်းငမ်းလႄႈ တူင်ႉၼိုင်ယူႇသဝ်း ၼႂ်းဝဵင်းသႅၼ်ဝီ ၸတ်းဢဝ်ႁႅင်းသိုၵ်းမွၵ်ႈ 300 ၵေႃႉ ၶိုၼ်ႈၵႂႃႇဢဝ်တီႈယူႇၸွမ်းတူင်ႇတၢင်ႇ မၢၼ်ႈပဵင်း ၼိူဝ်သဵၼ်ႈတၢင်းလူင်ႁၢႆးဝေး ၵႄႈၵၢင်ဝဵင်းသႅၼ်ဝီ တင်း ဝဵင်းၵူတ်ႉၶၢႆၼၼ်ႉဝႃႈၼႆ။

ၵူၼ်းမိူင်း ဝဵင်းသႅၼ်ဝီ ၵေႃႉၵႆႉၶိုၼ်ႈၵႂႃႇဢႅဝ်ႇၸႂ်ႈပီႈၼွင်ႉၸိူဝ်ႉၶိူဝ်းၶဝ်တီႈဝဵင်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ “သိုၵ်းတင်းသွင်ၸုမ်း ၽႂ်ၵေႃႈဢမ်ႇပႆႇယွမ်းယွၼ်ႇပၼ်ၽႂ်တေႉတေႉ။ ၸွမ်းဝၢၼ်ႈ ဢၼ်မီးႁိမ်းၶၢင်ႈတၢင်းလူင် ၵႄႈၵၢင် သႅၼ်ဝီ တင်း ၵူတ်ႉၶၢႆၼႆႉ ၶဝ်ထႅမ်ႁႅင်းသိုၵ်းၶဝ်ဝႆႉ တင်းသွင်ၸုမ်းယဝ်ႉ။ သိုၵ်းၵဝ်ႈၵၢင်ႉၶဝ်ၵေႃႈ ႁွင်ႉဢဝ်ႁႅင်းၵူၼ်းသိုၵ်းၶဝ် ပႃးၵွင်ႈပႃးၵၢင်ႇႁႄ ၶိုၼ်ႈၵႂႃႇယူႇဝႆႉ ဢိူမ်ႈဝႆႉ ႁိမ်းဝဵင်းၵူတ်ႉၶၢႆ။ မိူဝ်ႈလဵဝ်ၼႆႉ ႁဝ်းၵူၼ်းမိူင်းတႄႉ မႆႈၸႂ်ၵူဝ်ၶဝ်ၼင်ႇၵၼ် ၶိုၼ်းၽိတ်းၵၼ်ႁႄ ယိုဝ်းၵၼ် သဵင်ၵွင်ႈတႅၵ်ႇပဵၼ်ပၢင်တိုၵ်း ၵၼ်ၶိုၼ်းၵူၺ်းယဝ်ႉ” ဝႃႈၼႆ။

ၾၢႆႇသိုၵ်းတဢၢင်း (TNLA) ၵေႃႈ ၽိူမ်ႉႁႅင်းသိုၵ်းၶဝ်ဝႆႉသေ ၶုတ်းလုၵ်းထႅၼ်ႈ (လုၵ်းပႅပ်ႉ) တင်ႈတပ်ႉပၢင်သဝ်းမႂ်ႇ ၸွမ်းပိုၼ်ႉတီႈဢၼ်ဢိူမ်ႈၸမ်ဝႆႉတင်း တပ်ႉပၢင်သဝ်း သိုၵ်းၶႄႇ ၵဝ်ႈၵၢင်ႉ (MNDAA) ဝႆႉလႄႈ ႁၢင်ႈႁႅၼ်းၵၢၼ်သိုၵ်းဝႆႉႁင်းၽႂ်မၼ်းယူႇၼႆ – ၵူၼ်းမိူင်းပိုၼ်ႉတီႈလၢတ်ႈ။

ပိူဝ်ႈတႃႇၵႄႈလိတ်ႈပၼ်ႁႃ လွင်ႈၵူၼ်းသိုၵ်းတဢၢင်း တင်း သိုၵ်းၵဝ်ႈၵၢင်ႉ ၽိတ်းမေႃးပေႃႉထုပ်ႉ လိုပ်ႈလမ်း ၵၼ်ဢွၵ်ႇၼႂ်းပိုၼ်ႉတီႈၸႄႈဝဵင်းၵူတ်ႉၶၢႆ လႄႈ ၸႄႈဝဵင်းသႅၼ်ဝီၼၼ်ႉ ၾၢႆႇသိုၵ်းတဢၢင်း တႅမ်ႈလိၵ်ႈ ယိုၼ်ႈသူင်ႇ တုၵ်းယွၼ်းထိုင်တီႈ ၽူႈၼမ်းသိုၵ်းၵဝ်ႈၵၢင်ႉသေတႃႉ ဢမ်ႇဢွင်ႇမၢၼ်မႃးသေၵမ်း။

ပူၼ်ႉမႃးဝၼ်းတီႈ 13/2/2026 ယၢမ်းၵၢင်ၶမ်ႈ မွၵ်ႈ 9 မူင်းပၢႆ သိုၵ်းတဢၢင်း (TNLA) လႄႈ သိုၵ်းၵဝ်ႈၵၢင်ႉ (MNDAA) ပဵၼ်ပၼ်ႁႃ လွင်ႈၵၢၼ်ၽွင်းငမ်းၵၼ် တီႈဝဵင်းၵူတ်ႉၶၢႆ ၊ ၽိတ်း ၵၼ်ထုပ်ႉၵၼ် ထိုင်တီႈပူၼ်ႉၶၵ်ႉမိုဝ်းပဝ်ႇ လၼ်ႇၵွင်ႈတေႃႇၵၼ်သေ ၵူၼ်းသိုၵ်းတင်းသွင်ၾၢႆႇ လႆႈဢွၵ်ႇလိူတ်ႈပဵၼ်ယၢင် ။

ၾၢႆႇၼိုင်ႈၵေႃႈယၢမ်းလဵဝ် သိုၵ်းၵဝ်ႈၵၢင်ႉ တင်ႈၵဵတ်ႉလၢၼ်ႇ ၽိူမ်ႉမႃးထႅင်ႈ ၼႂ်းဝဵင်းသႅၼ်ဝီသေ ပႂ်ႉၵူတ်ႇထတ်း ရူတ်ႉၵႃးၸိူဝ်းလတ်းၽၢၼ်ႇၵႂႃႇမႃး ၼႂ်းၸႄႈဝဵင်းသႅၼ်ဝီႁၢဝ်ႈႁႅင်း၊ ယၢမ်းလဵဝ်သမ်ႉ ႁၢမ်ႈဢိုတ်းပႃး ၵၢၼ်တေႃႉတၢင်ႇၶူဝ်းၵုၼ်ႇ သူင်ႇၶိုၼ်ႈၵႂႃႇတၢင်း ဝဵင်းၵူတ်ႉၶၢႆ၊ သင်ၶႂ်ႈတၢင်ႇၵုၼ်ႇၶဝ်ႈၵႂႃႇၼႂ်းဝဵင်းၵူတ်ႉၶၢႆၸိုင် တေလႆႈမီးပႃး ဝႂ်ၵမ်ႉယၼ် လိၵ်ႈႁပ်ႉ ႁွင်းတီႈၸဝ်ႈၼႃႈတီႈသိုၵ်းၵဝ်ႈၵၢင်ႉ ၸိူဝ်းၽွင်းငမ်းဝဵင်းယူႇဝႆႉ ၼႂ်းသႅၼ်ဝီလႄႈ ႁဵတ်းႁႂ်ႈၵူၼ်းမိူင်းပိုၼ်ႉတီႈ ဢွၵ်ႇၶၢဝ်းတၢင်း ၵႂႃႇမႃး ၵႃႉၶၢႆၶူဝ်းၵုၼ်ႇၵူႈလွင်ႈယၢပ်ႇၽိုတ်ႇလိူဝ်ၵဝ်ႇ ဝႃႈၼႆ။

ၵူၼ်းမိူင်းၵေႃႉယူႇဝႆႉၼႂ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈလဵဝ်ၸွမ်းတၢင်းလူင်ၵေႃႈ ၵႃးၵႂႃႇၵႃးမႃးဢမ်ႇပေႃးမီးၼမ်ယဝ်ႉ။ သိုၵ်းၵဝ်ႈၵၢင်ႉၶဝ်ၵေႃႈ ပိုတ်ႇပၢင်သွၼ်ၵၢၼ်သိုၵ်းထႅင်ႈ တီႈႁိမ်းဝၢင်းပိတ်ႉမၢၵ်ႇၼင်ၼၼ်ႉယူႇ။ မိူဝ်ႈဝႃး၊ မိူဝ်ႈသိုၼ်းၼႆႉ ၶဝ်မႃးႁႃၵူၼ်းတေၵႂႃႇၶိုၼ်ႈပၢင်သွၼ်ၾိုၵ်းၵၢၼ်သိုၵ်းၶဝ် ၸွမ်းဝၢၼ်ႈယူႇ။ ပၢင်သွၼ်ၶဝ်တႄႇမိူဝ်ႈဝႃး (10/3/2026) ။ ၽႂ်ၵေႃႈဢမ်ႇႁတ်းၵႂႃႇႁဵတ်း ဢမ်ႇတဵမ်ၸႂ်ႁဵတ်းယဝ်ႉလူး ပိူၼ်ႈၵူဝ်ဢိူဝ်ႈ။ ၵူၺ်းၶႄႇၼႆၼႃႇ ၶဝ်မီးငိုၼ်းၸႂ်ႉငိုၼ်းလႆႈလူး။ ၶဝ်မႃးၸၢင်ႈၵႂႃႇဢဝ် ၼိုင်ႈၵေႃႉၼႆႉ ၶဝ်ပၼ်ငိုၼ်း 120 သႅၼ်ပျႃးဢေႃႈ။ မိူဝ်ႈလဵဝ် သိုၵ်း PDF ၶဝ်ၵေႃႈ ၶိုၼ်းမႃးမီးဝႆႉယူႇတီႈၼႂ်းဝၢင်းႁူင်းႁဵၼ်းၸွမ်းဝၢၼ်ႈတႅင်ႇယႅတ်ႉၼၼ်ႉ ၵႃး 5 လမ်း တဵမ်တဵမ်” ဝႃႈၼႆ။

ယွၼ်ႉသိုၵ်းၵဝ်ႈၵၢင်ႉ တင်ႈၵဵတ်ႉလၢၼ်ႇသေ ပႂ်ႉၵူတ်ႇထတ်း ႁေႉႁၢမ်ႈၶူဝ်းၵုၼ်ႇ ၸွမ်းၼႂ်းၼႃႈတီႈၶဝ်ၵေႃႈပိူင် ၼိုင်ႈ၊ ယွၼ်ႉသိုၵ်း မိူင်းဢမႄႇရိၵၼ်ႇ တင်း မိူင်းဢီႇရၢၼ်ႇ လႄႈ မိူင်း ဢိတ်ႇသရေးၶဝ် ယိုဝ်းၵၼ်ႁၢဝ်ႈႁႅင်း ႁိုင်မႃး 10 ဝၼ်းပၢႆယဝ်ႉလႄႈ ၵူၼ်းမိူင်းၼႂ်းလၢႆလၢႆၸိုင်ႈမိူင်း ႁူပ်ႉတၢင်းယၢပ်ႇ ၼမ်ႉမၼ်းၸၢၵ်ႈ ႁၢဝ်ႈႁႅင်းယူႇၼၼ်ႉ မိူင်းတႆးပွတ်းႁွင်ႇသမ်ႉ လႆႈမႆႈၸႂ်ပႃး ၵူဝ်ၸုမ်းယိပ်းၵွင်ႈၵၢင်ႇၶဝ် ယိုဝ်းၵၼ်ၶိုၼ်းထႅင်ႈသေ ႁဵတ်းႁႂ်ႈ ၵူၼ်းမိူင်းယူႇယၢပ်ႇၵိၼ်းၸႂ်လိူဝ်ၵဝ်ႇထႅင်ႈ ၼႆယဝ်ႉ။