မိူင်းႁူမ်ႈတုမ်ပတ်းပိုၼ်ႉ ၵူၼ်းတိတ်းၸပ်းတၢင်းပဵၼ်ၸိူဝ်ႉမႅင်းၶူဝ်ႊဝိတ်ႉ 19 ၽႄႈလၢမ်းထိုင် ႁူဝ်မိုၼ်ႇယဝ်ႉလႄႈ ႁႂ်ႈၵႆယၢၼ်တၢင်းပဵၼ်ၼႆသေ မုၵ်ႉၸုမ်းလူင်သင်ႇၶႃႇၸိုင်ႈတႆး ဢွၵ်ႇလိၵ်ႈသင်ႇပိၵ်ႉ ၵၢၼ်သွၼ်ႁဵၼ်း တိူၵ်ႈသွၼ်လိၵ်ႈ ဝတ်ႉပိတၵၢတ်ႈ ဝဵင်းပၢင်လူင် ။

ဝၼ်းတီႈ 26/9/2020 ပူၼ်ႉမႃးၼႆႉ ယူႇတီႈၸဝ်ႈသြႃႇဝိၸႃႇရၼ ဝတ်ႉပိတၵၢတ်ႈ ငဝ်ႈငုၼ်းမုၵ်ႉၸုမ်း လူင်သင်ႇၶႃႇၸိုင်ႈတႆး ဝဵင်းပၢင်လူင် ဢွၵ်ႇလိၵ်ႈပိုၼ်ၽၢဝ်ႇ ပွင်ႇလႅင်းထိုင်သြႃႇသမ်းမႃး ပေႃႈမႄႈ ပီႈၼွင်ႉ ၸဝ်ႈၸၢင်း ၸဝ်ႈသၢင်ႇ ဢၼ်မႃး ႁဵၼ်းလိၵ်ႈတီႈတိူၵ်ႈသွၼ်လိၵ်ႈဝတ်ႉပိတၵၢတ်ႈ ဝဵင်းပၢင်လူင် သင်ႇၶႃႇၸဝ်ႈ 400 တူၼ်ပၢႆ တင်းသဵင်ႈဝႃႈ တေပိၵ်ႉႁပ်း ၵၢၼ်သွၼ်ႁဵၼ်းဝႆႉၸူဝ်ႈၶၢဝ်း ပိူဝ်ႈတႃႇၵႅတ်ႇၵင်ႈၵႆယၢၼ် တၢင်းပဵၼ်ၶူဝ်ႊဝိတ်ႉ 19 ။

ၸဝ်ႈၶူးၶေႇမႃႇၼၼ်ႇတႃႉ ႁူဝ်ပဝ်ႈ ၽူႈၼင်ႈလုမ်း ငဝ်ႈငုၼ်းမုၵ်ႉၸုမ်းလူင် သင်ႇၶႃႇ ၸိုင်ႈတႆး ၸုပ်ႈ 37 လၢတ်ႈဝႃႈ – “ ၸဝ်ႈ ႁဝ်းၶဝ်တီႈဝတ်ႉပိတၵၢတ်ႈတႄႉ ႁၼ်ထိုင်ဝႃႈ ယၢမ်းလဵဝ်သင်ၶၸဝ်ႈႁဝ်း ယူႇၸွမ်းၵၼ်ၼမ်ၼႃႇ၊ ရေႃးၵႃႇၼႆႉ ဢမ်ႇပႆႇပဵၼ် သေတႃႉ ပေႃးပဵၼ်မႃး မၼ်းတေၽႄႈငၢႆႈ ယႃႈယႃတႃႇယူတ်းယႃၵေႃႈ ဢမ်ႇမီး တႃႇလုမ်းလႃးၵၼ်ၵေႃႈ မၼ်းယၢပ်ႇ။ ၵွပ်ႈၼၼ် ၸင်ႇသင်ႇပိၵ်ႉၵၢၼ်သွၼ်ႁဵၼ်းဝႆႉ။ ၸိူဝ်းၶႂ်ႈယူႇၵေႃႈလႆႈ ၸိူဝ်းၶႂ်ႈပွၵ်ႈမိူဝ်းၶိုၼ်းႁိူၼ်းၵေႃႈလႆႈ” – ဝႃႈၼႆ။

ပီ 2020 ၼႆႉ မုၼ်ၸၢင်း တင်း ၸဝ်ႈသၢင်ႇ ဢၼ်မႃးၶိုၼ်ႈႁဵၼ်းတီႈတိူၵ်ႈသွၼ်လိၵ်ႈ ပိတၵၢတ်ႈဝဵင်းပၢင်လူင် တင်းမူတ်း မီး 424 တူၼ်။ တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်း လႄႈ တေၵိုတ်းဝႆႉ ၵၢၼ်သွၼ်ႁဵၼ်းတင်းသဵင်ႈ၊ ဢမ်ႇၼၼ်ပွၵ်ႈမိူဝ်း ဝၢၼ်ႈၽႂ် ၵျွင်းမၼ်းၵေႃႈလႆႈ။

ၸဝ်ႈၶူး ၶေႇမႃႇၼၼ်ႇတႃႉ သိုပ်ႇလၢတ်ႈဝႃႈ – “လွင်ႈသင်ႇပိၵ်ႉၵၢၼ်သွၼ်ႁဵၼ်းလိၵ်ႈသင်ႇၶၸဝ်ႈ တီႈငဝ်ႈငုၼ်းတႄႉ ပႆႇ ၸီႉသင်ႇဢွၵ်ႇလိၵ်ႈၸူးၵိင်ႇၽႄတိူၵ်ႈသွၼ်လိၵ်ႈတီႈလႂ်။ သင်ၸိူဝ်ႉဝႃႈတၢင်းပဵၼ်ၶူဝ်ႊဝိတ်ႉ 19 ၼႆႉ ႁၢႆႉႁႅင်းမႃးၸိုင် ယူႇ တီႈငဝ်ႈငုၼ်းတေဢုပ်ႇဢူဝ်းၵၼ်သေ ဢွၵ်ႇလိၵ်ႈၸူးပဵၼ်တၢင်းၵၢၼ် ႁႄႉႁၢမ်ႈၵႂႃႇယူႇ” – ဝႃႈၼႆ။

ယၢမ်းလဵဝ် တိူၵ်ႈသွၼ်လိၵ်ႈ ပိတၵၢတ်ႈ ဝဵင်းပၢင်လူင် ငဝ်ႈငုၼ်းမုၵ်ႉၸုမ်းလူင်သင်ႇၶႃႇၸိုင်ႈတႆး သင်ႇဢိုတ်းဝႆႉသေတႃႉ တၢင်ႇၸႄႈဝဵင်း ၼႂ်းၸိုင်ႈတႆး တႄႉ တိုၵ်ႉပိုတ်ႇပူင်သွၼ်ယူႇမိူၼ်ၵဝ်ႇ။ တိူၵ်ႈသွၼ်လိၵ်ႈ ပိတၵၢတ်ႈ ဝဵင်းပၢင်လူင်တႄႉ သင်ႇပိၵ်ႉၵၢၼ်ႁဵၼ်းယဝ်ႉလႄႈ  သင်ဝႃႈ သင်ၶႃႇ ႁဵၼ်းလိၵ်ႈၶဝ်ၸဝ်ႈ ပွၵ်ႇႁိူၼ်းၶိုၼ်း ဝႃႇသႃၶဝ်ႈၸဝ်ႈတေလူႉဢမ်ႇလူႉ ၼႆၼၼ်ႉတႄႉ ဢမ်ႇတူၵ်ႇပႃး။

ၸဝ်ႈၶူးၵုလိသ ၾၢႆႇယိပ်းငိုၼ်း လုမ်းသင်ႇၶႃႇၸိုင်းတႆး ပွတ်းဢွၵ်ႇၶူင်းဝႃႈ – “တီႈတိူၵ်ႈသွၼ်လိၵ်ႈထမ်ႇမူဝ်းတယ ၵဵင်းတုင် တႄႉ ဢမ်ႇပိၵ်ႉၵၢၼ်သွၼ်ႁဵၼ်း။ တိုၵ်ႉသွၼ်ဝႆႉ မိူၼ်ၵဝ်ႇယူႇ။ သင်ၶၸဝ်ႈဢၼ်မႃးႁဵၼ်းလိၵ်ႈၼႆႉၵေႃႈ ဢမ်ႇပၼ်ဢွၵ်ႇ ဝၢင်းၵျွင်း ႁႂ်ႈယူႇၼႂ်းဝၢင်းၵျွင်းၵူၺ်း။ ပေႃးတေပွႆႇမိူဝ်းႁိူၼ်းၼႆၵေႃႈ ၸဝ်ႈသၢင်ႇၶဝ် မၢင်ၸိူဝ်းသမ်ႉ ယူႇၵႆ မိူၼ်ၼင်ႇ ပွတ်း ႁွင်ႇ၊ ၸၢၼ်း၊ တႃႈၶီႈလဵၵ်း၊ ပၢင်သၢင်း ၸိူဝ်းၼႆႉၵေႃႈမီးလႄႈ ပေႃးမိူဝ်းယဝ်ႉ သမ်ႉတေမိူဝ်းပၼ် တၢင်းမႆႈၸႂ်ဢူႈမႄႈၶဝ် ထႅင်ႈလႄႈ ပွႆႇၶဝ်ယူႇဝႆႉၼႂ်းၵျွင်းဝႆႉ ႁၢမ်ႈဢမ်ႇပၼ်ၶဝ်ဢွၵ်ႇၵႂႃႇမႃးတၢင်းလႂ်ၼၼ်ႉၵူၺ်း” – ဝႃႈၼႆ။

လိူဝ်ၼၼ်ႉ တၢင်းတိူၵ်ႈသွၼ်လိၵ်ႈၸႄႈဝဵင်းၵျွၵ်ႉမႄးၵေႃႈ မိူၼ်ၵၼ် ဢမ်ႇပိၵ်ႉ တိုၵ်ႉသိုပ်ႇသွၼ်ၵႂႃႇယူႇ ၸဝ်ႈၶူး ၺၢၼ်ႇ ၼဝရ (ထမ်ႇမၸရိယ) B.A M.A ၵႅမ်ၽူႈၵွၼ်းဝတ်ႉၼမ်ႉၸဵတ်းလိၼ်း လၢတ်ႈၼႄၼင်ႇၼႆ။

“တီႈၵျွင်းၸဝ်ႈၶဝ်တႄႉ ပႆႇပိၵ်ႉ တိုၵ်ႉသိုပ်ႇသွၼ်ၵႂႃႇ မိူၼ်ၵဝ်ႇယူႇ။ ၼႂ်းၸႄႈဝဵင်းၵျွၵ်ႉမႄးႁဝ်းၶႃႈၼႆႉ ဢၼ်တိူၵ်ႉသွၼ် လိၵ်ႈ ဝႆႉ ၵေႃႈ တိုၵ်ႉမီးလၢႆလၢႆၵျွင်းယူႇ ယင်းပႆႇပိၵ်ႉဢိုတ်း။ ယၢမ်းလဵဝ် ၸဝ်ႈၶဝ်ၵေႃႈ ပႂ်ႉတူၺ်းငဝ်းလၢႆး တၢင်းပဵၼ်ၶူဝ်ႊဝိတ်ႉ 19 ၼႆႉယူႇ တေပိၵ်ႉ ဢမ်ႇပိၵ်ႉဢၼ်ဝႃႈၼၼ်ႉ”- ဝႃႈၼႆ။

တိူၵ်ႈသွၼ်လိၵ်ႈ ဢၼ်ယူႇတႂ်ႈ ငဝ်ႈငုၼ်းမုၵ်ႉၸုမ်းလူင်သင်ၶႃႇၸိုင်ႈတႆး ၼႆႉ မီးၵူႈဝဵင်း ပတ်းပိုၼ်ႉၸိုင်ႈတႆး၊ သင်ႇၶႃႇလုၵ်ႈႁဵၼ်းၼမ်လိူဝ်ပိူၼ်ႈတႄႉ ပဵၼ်တီႈ ဝိႁၢရ် ပိတၵၢတ်ႈ ဝဵင်းပၢင်လူင်၊ ပီၼႆႉမီး 400 တူၼ်ပၢႆၼႆႉ လႆႈဢေႇလိူဝ်ၵူႈပီ။

ပတ်းပိုၼ်ႉမိူင်းႁူမ်ႈတုမ်မၢၼ်ႈ ၼႆႉတၢင်းပဵၼ်ၶူဝ်ႊဝိတ်ႉၽႄႈလၢမ်း ၼႂ်းမိူင်းတႆးၵေႃႈ ၵူၼ်းၸပ်းတၢင်းပဵၼ် ၶူဝ်ႊဝိတ်ႉ 19 မီး 14 ၵေႃႉ တၢႆၵေႃႉၼိုင်ႈ လူင်းႁူင်းယႃႇ 4 ၵေႃႉ ၵိုတ်းၵဝ်ႈၵေႃႉ။ ပတ်းပိုၼ်ႉမိူင်းႁူမ်ႈတုမ်မၢၼ်ႈသမ်ႉ 10734 ၵေႃႉ၊ ယႃၶႅၼ်း 2862 ၵေႃႉ၊ လူႉတၢႆ 226 ၵေႃႉ။ ပတ်းပိုၼ်ႉလုမ်ႈၾႃႉတႄႉ ၵူၼ်းၸပ်းတၢင်းပဵၼ် မီးၸမ် 3.5 လၢၼ်ႉ၊ တၢႆ လၢၼ်ႉပၢႆ။