ဝဵင်းမိူင်းယၢင်း ၵိုတ်းၵၢၼ်တေႃႉသူင်ႇ ၵူၼ်းမိူင်း ၵုမ်းၵၵ်းတူဝ် တင်းဝဵင်း

သဵၼ်ႈတၢင်းတိတ်းတေႃႇ တေႃႉသူင်ႇ ၵဵင်းတုင် – မိူင်းၶၢၵ်ႇ – မိူင်းယၢင်း ပိၵ်ႉႁပ်းဢမ်ႇပၼ်ၵူၼ်းမိူင်းၵႂႃႇမႃး၊ ၵၢတ်ႇသႃး ႁၢၼ်ႉတၢင်းၶၢႆ ၼႂ်းဝဵင်းမိူင်းယၢင်း ပိၵ်ႉဢိုတ်းသဵင်ႈ ၵူၼ်းမိူင်းၵေႃႈ ၵုမ်းၵၵ်းတူဝ်ၵဝ်ႇ ယူႇၼႂ်းႁိူၼ်းယေးၽႂ်မၼ်းသေ ငိူင်ႉဝႄႈ ၽေးတၢင်းပဵၼ်ၵႃႇလ ၶူဝ်ႊဝိတ်ႉ 19 တင်းဝဵင်း။

တင်ႈဢဝ် ဝၼ်းတီႈ 5/9/2020 မႃး တေႃႇထိုင်ဝၼ်းမိူဝ်ႈၼႆႉ – ၵူၼ်းမိူင်းရၶႅင်ႇ ဢၼ်မႃးၵိၼ်ၸၢင်ႈႁဵတ်းၵၢၼ် တၢင်းမိူင်း ယၢင်း သိူဝ်လိုဝ်း ၼၼ်ႉ ၸပ်းတၢင်းပဵၼ်ၶူဝ်ႊဝိတ်ႉ 19 သၢမ်ၵေႃႉ၊ ဢဝ်တူဝ်ၶဝ် သူင်ႇယူတ်းယႃတူဝ် ဝႆႉတီႈ ႁူင်းယႃၵဵင်း တုင်၊ တင်ႈဢဝ်ၼၼ်ႉမႃး တတ်းၶၢတ်ႇၵၢၼ်တေႃႉသူင်ႇၵူၼ်း၊ ၼႂ်းဝဵင်းၵေႃႈ ၶဵင်ႈၶႅင် လွင်ႈႁူမ်ႇလူမ်ႈ ႁႂ်ႈၵႆယၢၼ်တၢင်း ပဵၼ်ၶူဝ်ႊဝိတ်ႉ 19  ၊ ၵူၼ်းမိူင်း ငိူင်ႉဝႄႈ ၵၢၼ်ဢွၵ်ႇႁိူၼ်း၊ ႁၢမ်ႈပိုတ်ႇၵၢတ်ႇ၊ ႁၢမ်ႈပိုတ်ႇႁၢၼ်ႉတၢင်းၵိၼ် ။

ၸၢႆးမိၼ်ႉတဵင်း ၼေႃႇၽူႈတႅၼ်းသၽႃးၵူၼ်းမိူင်း ပႃႇတီႇႁူဝ်သိူဝ် ၸႄႈဝဵင်းမိူင်းယၢင်းဝႃႈ – “ ယၢမ်းလဵဝ် တီႈမိူင်းယၢင်းႁဝ်း တႄႉ Lockdown ဝႆႉမူတ်းၶႃႈယဝ်ႉ။ ၵူၼ်းမိူင်းၵေႃႈ ယူႇႁိူၼ်းၽႂ်မၼ်း stay at home ၼၼ်ႉၼႃႇ။ ဝဵင်းပေႃးယဵၼ်ဢေႃႈ။ ၵၢတ်ႇၵေႃႈ ဢိုတ်းဝႆႉမူတ်းၶႃႈ။ ႁၢၼ်ႉၶၢႆၶူဝ်းၸွမ်းတၢင်းၸိူဝ်းၼႆႉၵေႃႈ ပိုတ်ႇၵမ်ႈၽွင်ႈၵူၺ်း။ ဢိုတ်း ဝႆႉတင်းၼမ်ၶႃႈ။ ပေႃးၵႂႃႇသိုဝ်ႉၶူဝ်းၼႆ တေဢမ်ႇလႆႈၶဝ်ႈၼႂ်းႁၢၼ်ႉ တေလႆႈယူႇတၢင်းၼွၵ်ႈ သေ ယိုၼ်ႈငိုၼ်း၊ ယိုၼ်ႈဢဝ်ၶူဝ်းၶွင်ပၼ်ၵၼ် ၸိူဝ်းၼႆႉၵူၺ်း” – ဝႃႈၼႆ။

တီႈဝဵင်းမိူင်းယၢင်းၼၼ်ႉ ၵူၼ်းမိူင်းယူႇႁိူၼ်း၊ ႁၢမ်ႈဢွၵ်ႇတၢင်းၼွၵ်ႈသေ ဢမ်ႇၵႃး ရူတ်ႉၵႃး ဢၼ်တေႃႉတၢင်ႇၵူၼ်း၊ မိူင်းယၢင်း – သိူဝ်လိုဝ်း – မိူင်းလႃး ၊ မိူင်းယၢင်း – မိူင်းၶၢၵ်ႇ – ၵဵင်းတုင် ၊ မိူင်းယၢင်း ၶဝ်ႈဢွၵ်ႇ တၢင်း မိူင်းၽႅၼ် – ႁူဝ်တဝ်း – မိူင်းပွၵ်ႉ ၸိူဝ်းၼႆႉၵေႃႈ ဢိုတ်းသဵင်ႈ။

ၸၢႆးၵႅဝ်ႈ ၵူၼ်းၵႃႉၶၢႆ ၵဵင်းတုင် – မိူင်းၶၢၵ်ႇ – မိူင်းယၢင်း လၢတ်ႈဝႃႈ – “ တႄႇဢဝ် ႁူဝ်လိူၼ်ၼႆႉမႃး မွၵ်ႈၶၢဝ်းတၢင်း 1 ဝူင်ႈၼႆႉ ရူတ်ႉၵႃးႁပ်ႉၸၢင်ႈ တၢင်ႇၵူၼ်း တၢင်ႇၵုၼ်ႇ ဢၼ်လႅၼ်ႈတၢင်း ၵဵင်းတုင် – မိူင်းၶၢၵ်ႇ – မိူင်းယၢင်းၼႆႉ ၵိုတ်းယင်ႉပႅတ်ႈမူတ်း ယဝ်ႉ ဢမ်ႇလဵၼ်ႈ ၵၼ်ယဝ်ႉ။ သဵၼ်ႈတၢင်းမိူင်းၶၢၵ်ႇ – မိူင်းယၢင်း ၵၢႆႇၸူးၵၼ်ၼၼ်ႉၵေႃႈ ထုၵ်ႇပိၵ်ႉဢိုတ်းဝႆႉ တင်ႈတႄႇ ထူပ်းႁၼ် ၵူၼ်းတိတ်းၸပ်း တၢင်းပဵၼ်ၶူဝ်ႊဝိတ်ႉၼၼ်ႉမႃးၶႃႈယဝ်ႉ။ ဢမ်ႇပၼ်ၵူၼ်းၶဝ်ႈ/ဢွၵ်ႇ”- ဝႃႈၼႆ။

ဢိင်ၼိူဝ်လွင်ႈၵူၼ်းမိူင်းယၢင်း ထုၵ်ႇၵုမ်းၵၵ်းတူဝ်ယူႇဝႆႉ ၼႂ်းႁိူၼ်းယေးၸိူဝ်းၼႆ ၵူၼ်းမိူင်းၵမ်ႈၼမ် ဢွၼ်ၵၼ်ထူပ်းတၢင်း ပဵၼ် ၽိုတ်ႇတႃႇၵၢၼ်ႁႃၵိၼ်လဵင်ႉတွင်ႉ၊ ၵူၼ်းဝႃႈလႆႈပွၵ်ႈပဵၼ် တၼ်းၵဵပ်းသိုဝ်ႉ ၵဵပ်းပႅင်း  ၶဝ်ႈသၢၼ် ၼမ်ႉမီႇ ၼမ်ႉမၼ်းဝႆႉ ဢမ်ႇႁူပ်ႉတၢင်းယၢပ်ႇသေတႃႉ ၵူၼ်းႁႃၸဝ်ႈၵိၼ်ၶမ်ႈတေႉၵိၼ်းၸႂ်၊ သေဢမ်ႇၵႃး ၼေႃႈၽူႈတႅၼ်းၵေႃႈ ဢမ်ႇၸၢင်ႈ လူင်းပိုၼ်ႉတီႈ ႁႃသဵင်။

ၸၢႆးမိၼ်ႉတဵင်း သိုပ်ႇလၢတ်ႈဝႃႈ “ယၢမ်းလဵဝ် ၵူၼ်းမိူင်းႁဝ်းၶႃႈ ဢွၼ်ၵၼ်ထူပ်းတၢင်းယၢပ်ႇၽိုတ်ႇၵၼ်ၶႃႈဢေႃႈ။ တႃႇ တေ ၵႂႃႇတၢင်းၼွၵ်ႈ ၵႂႃႇႁဵတ်းၵၢၼ် ႁႃၵိၼ်လဵင်ႉတွင်ႉ ၸိူဝ်းၼႆႉ ယၢပ်ႇၽိုတ်ႇၵၼ် ဢမ်ႇၸၢင်ႈဢွၵ်ႇၵႂႃႇတၢင်းလႂ် ဢမ်ႇၸၢင်ႈ ႁဵတ်းသင်လႆႈတႄႉတႄႉ ယွၼ်ႉတၢင်းပဵၼ်ၶူဝ်ႊဝိတ်ႉ 19 ၼႆႉသေ တွၼ်ႈတႃႇ ၵၢၼ်လူင်းသူၼ်းတုမ်ႁႃသဵင်ၼႆႉ ၵေႃႈၶႃႈ ႁဝ်းပႆႇၸၢင်ႈလူင်းသူၼ်းတုမ်သင်လႆႈၶႃႈ လႆႈထုၵ်ႇၵုမ်းၵၵ်းတူဝ်ယူႇဝႆႉၼႂ်းႁိူၼ်းၵူၺ်းၶႃႈဢေႃႈၼႆႉ” – ဝႃႈၼႆ။ 

ၵူၼ်းတၢင်းမိူင်းရၶႅင်ႇ ၸပ်းတၢင်းပဵၼ် ၶူဝ်ႊဝိတ်ႉ 19 ႁွတ်ႈထိုင်မိူင်းတႆး ပွတ်းဢွၵ်ႇၶူင်းၼႆႉ တုမ်ႉယွၼ်ႈ ထိုင်လၢႆဝဵင်း၊ တူဝ်ၵူၼ်းပဵၼ် ယူႇဝႆႉတီႈ ႁူင်းယႃ ၵဵင်းတုင်လႄႈ ၵူၼ်းမိူင်းၵဵင်းတုင်ၵေႃႈမႆႈၸႂ်၊ တေႃႈဢမ်ႇသင် တၢင်းဝဵင်းတႃႈၶီႈလဵၵ်း ၵေႃႈ ယင်းတုမ်တိူဝ်ႉထိုင်။

ၸၢႆးၼုမ်ႇတုၺ်ႈ ၵူၼ်းတႃႈၶီႈလဵၵ်း လၢတ်ႈဝႃႈ –“တႄႇလႆႈႁူႉတီႈမိူင်းယၢင်းၸပ်းတၢင်းပဵၼ်မႃးၵေႃႈ တီႈၵဵတ်ႉမၢၵ်ႇယၢင်း တၢင်းၶဝ်ႈတႃႈၶီႈလဵၵ်းၼႆႉ ၽူႈမီးပုၼ်ႈၽွၼ်းၶဝ် ၵူတ်ႇထတ်းၵူၼ်းၵႂႃႇမႃးႁၢဝ်ႈႁႅင်းၶႃႈဢေႃႈ။ တႃႇတေႁႄႉၵင်ႈတၢင်းပဵၼ် ၶူဝ်ႊဝိတ်ႉ 19 ပေႃးတေဢမ်ႇၽႄႈလၢမ်းႁၢဝ်ႈႁႅင်းၼၼ်ႉၶႃႈယဝ်ႉ” – ဝႃႈၼႆ။

တႄႇဢဝ် ႁူဝ်လိူၼ်သႅပ်ႊထႅမ်ႊၿိူဝ်ႊၼႆႉမႃး ၼႂ်းမိူင်းတႆး 50 ၸႄႈဝဵင်းပၢႆ သင်ၽႂ်/ ၵေႃႉလႂ် ဢွၵ်ႇတႃႈပႆတၢင်း ၵႂႃႇမႃးတီႈလႂ် ၼႆ တေလႆႈမီးဝႂ်ၵမ်ႉပၢႆးယူႇလီ၊ လိၵ်ႈၵမ်ႉၼႂ်းပွၵ်ႉယွမ်ႇဝၢၼ်ႈဢိူင်ႇ ၸိူဝ်းၼႆႉသေ ၸင်ႇတေၵႂႃႇမႃးၶဝ်ႈဢွၵ်ႇဝဵင်းလႆႈ ဝႃႈၼႆ။

ယၢမ်းလဵဝ် ၵူၼ်းတိတ်းၸပ်းတၢင်းပဵၼ်ၸိူဝ်ႉမႅင်းၶူဝ်ႊဝိတ်ႉ 19 ၼႂ်းမိူင်းတႆး တင်းမူတ်းမီးၵႂႃႇ 9 ၵေႃႉ။ ယူတ်းယႃတူဝ် တီႈ ႁူင်းယႃလူင် ၸဝ်ႈၸၢမ်ႇထုၼ်း တူၼ်ႈတီး 2 ၵေႃႉ၊ ၵၢတ်ႇလေႃႉ 2 ၵေႃႉ၊ ၼမ်ႉၸၢင် 1 ၵေႃႉလႄႈ ၵဵင်းတုင် 3 ၵေႃႉ၊ တီႈဝဵင်း မူႇၸေႊၵေႃႈမီးၵူၼ်းၸပ်းတၢင်းပဵၼ်သေ ယူတ်းယႃဝႆႉယူႇၵေႃႈၼိုင်ႈ။ ပတ်းပိုၼ်ႉမိူင်းႁူမ်ႈတုမ် တႄႉ ၵူၼ်းၸပ်းမီး 4 ႁဵင် ပၢႆ ၊ လူႉတၢႆ 61 ၵေႃႉ။