ၵူၼ်းပိုၼ်ႉတီႈလႄႈ ၵူၼ်းတၢင်ႇတီႈ ၸိူဝ်းယူႇသဝ်း ၵႂႃႇမႃး  ၶဝ်ႈဢွၵ်ႇ ဝဵင်းမူႇၸေႊ ၽႂ်ဢမ်ႇၸွမ်းပၵ်းပိူင် ၵႅတ်ႇၵင်ႈၵႆယၢၼ် တၢင်းပဵၼ် ၶူဝ်ႊဝိတ်ႉ 19 ၸိုင် တေၺႃး တူတ်ႈတၢမ်ႇငိုၼ်း၊ ပေႃးပူၼ်ႉပႅၼ်ထိုင်ၵမ်းထူၼ်ႈသၢမ် တေႃၺႃးတၢမ်ႇၶွၵ်ႈ႞လိူၼ် လႆႈႁူႉၸွမ်းၶၢဝ်ႇပိုၼ်ႉတီႈၼင်ႇၼႆ။

ၼႂ်းဝူင်ႈၼႆႉ ၵူၼ်းမိူင်းမၢၼ်ႈ ၸိူဝ်းၶၢႆႉႁႃႁဵတ်းၵၢၼ် တၢင်းမိူင်းၶႄႇ ၸပ်းတၢင်းပဵၼ်ၶူဝ်ႊဝိတ်ႉ 19 သေ သူင်ႇပွၵ်ႈၶိုၼ်း တၢင်းမူႇၸေႊ၊ ၾၢႆႇၼိုင်ႈ ပတ်းပိုၼ်ႉမိူင်းႁူမ်ႈတုမ်ၵေႃႈ ၵူၼ်းၸပ်းတၢင်းပဵၼ်ၶူဝ်ႊဝိတ်ႉ ၽႄႈၸပ်းၵၼ် ႁၢဝ်ႈႁႅင်း ပိူဝ်ႈတႃႇ ၵႅတ်ႇၵင်ႈ ၵုမ်းၵမ်လႆႈတၢင်းပဵၼ်ၶူဝ်ႊဝိတ်ႉ 19 ၼၼ်ႉ ၶွမ်ႊမတီႊႁႄႉၵင်ႈၶူဝ်ႊဝိတ်ႉ ဝဵင်းမူႇၸေႊ တင်ႈလၢၼ်ႇ ၵူတ်ႇထတ်း၊ ပူၼ်ႉပႅၼ် ၵမ်းတီႈၼိုင်ႈ၊ ၵမ်းတီႈသွင်ၺႃးတၢမ်ႇငိုၼ်း၊ ပေႃးၽိတ်းၵမ်းသၢမ်တႄႉ ၺႃးတၢမ်ႇၶွၵ်ႈ ဝႃႈၼႆ။

ၸၢႆးမျၢတ်ႈဢွင်ႇ ၽူႈၸွႆႈၵႅတ်ႇၵင်ႈတၢင်းပဵၼ်ၶူဝ်ႊဝိတ်ႉ 19 ပွၵ်ႉၸၢၼ်း မူႇၸေႊဝႃႈ – “ ၼႂ်း 2- 3 ဝၼ်းၼႆႉ ႁဝ်းၶႃႈ လႆႈပၼ် တၢမ်ႇ ၵူၼ်းၸိူဝ်းဢမ်ႇသႂ်ႇၽႃႈတူမ်းပၢၵ်ႇ Mask ၼႂ်းပွၵ်ႉႁဝ်းၶႃႈၼႆႉၵူၺ်း လႆႈငိုၼ်း 7 မိုၼ်ႇပျႃးပၢႆၶႃႈဢေႃႈ။ သင်ဝႃႈ ၶဝ်ႈ မႃး ၼႂ်းပွၵ်ႉၸၢၼ်းႁဝ်းၶႃႈသေ ဢမ်ႇသႂ်ႇ Mask မႃးသၢမ်ပွၵ်ႈၸိုင် ႁဝ်းၶႃႈတေၵုမ်းတူဝ် သူင်ႇတီႈလုမ်းပလိၵ်ႈ/ ယေး သေ ယဵတ်ႈၶွၵ်ႈဢေႃႈ” – ဝႃႈၼႆ။

ပိူင်ဢၼ်တီႈဝဵင်းမူႇၸေႊ တမ်းဝႆႉ ႁႂ်ႈၵူၼ်းမိူင်း ၵႆယၢၼ်တၢင်းပဵၼ်ၶူဝ်ႊဝိတ်ႉ 19 ၼၼ်ႉ ပေႃးဢမ်ႇသႂ်ႇၽႃႈတူမ်းပၢၵ်ႇသေ ဢွၵ်ႇတၢင်းၼွၵ်ႈ ပေႃးတီႉလႆႈ ၵမ်းတီႈၼိုင်ႈ တေၺႃးတၢမ်ႇငိုၼ်း 1 ႁဵင်၊ ပေႃး ႁူပ်ႉႁၼ် ၵမ်းသွင် ဢမ်ႇသႂ်ႇ ၽႃႈတူမ်းသူပ်း သေဢွၵ်ႇတၢင်းၼွၵ်ႈထႅင်ႈ မႂ်ငိုၼ်း 2 ႁဵင်၊ ပေႃးၺႃးၵမ်းသၢမ်တႄႉ ထုၵ်ႇၵုမ်းတူဝ်သူင်ႇတပ်ႉပလိၵ်ႈ ယဵတ်ႈၶွၵ်ႈၼိုင်ႈ လိူၼ်။ လွင်ႈၼႆႉ ၾၢႆႇၵွၼ်းၸေႊဝဵင်းၵေႃႈ ဢွၵ်ႇလိၵ်ႈပိုၼ်ၽၢဝ်ႇဝႆႉ ၸဵမ်မိူဝ်ႈႁူဝ်လိူၼ်ၼႆႉယဝ်ႉဝႃႈၼႆ ။

ၸၢႆးမၢဝ်း ၵူၼ်းမူႇၸေႊဝႃႈ – “ယၢမ်းလဵဝ် တီႈမူႇၸေႊႁဝ်းၶႃႈ ယၢမ်းၵၢင်ၶမ်ႈ 7-8 မူင်းၼႆႉ ယဵၼ်သီႇဝႆႉၶႃႈဢေႃႈ။ ၵူၺ်းၵႃႈ ၵၢင်ဝၼ်းတႄႉ ၵူၼ်းၵႂႃႇမႃးၵိုၼ်းယူႇသေတႃႉ လွင်ႈသိုဝ်ႉလွင်ႈၸၢႆႇၼႆႉ ဢွၼ်ၵၼ်ပႅင်းၵိၼ်ပႅင်းၸၢႆႇၵၼ်မႃးတႄႉတႄႉၶႃႈ ယဝ်ႉ။ တၢၼ်ႇၸၢႆႇၼမ်ၵေႃႈ ၸၢႆႇဢေႇသေ တၢၼ်ႇၸၢႆႇဢေႇၵေႃႈ ဢမ်ႇၸၢႆႇသေ ႁဵတ်းၼႆၵၼ်ယဝ်ႉၶႃႈ” – ဝႃႈၼႆ။

ယၢမ်းလဵဝ် ၵူၼ်းတိတ်းၸပ်းတၢင်းပဵၼ်ၸိူဝ်ႉမႅင်းၶူဝ်ႊဝိတ်ႉ 19 ၼႂ်းမိူင်းတႆး တင်းမူတ်းမီးၵႂႃႇ 9 ၵေႃႉ။ ယူတ်းယႃတူဝ် တီႈ ႁူင်းယႃလူင် ၸဝ်ႈၸၢမ်ႇထုၼ်း တူၼ်ႈတီး 2 ၵေႃႉ၊ ၵၢတ်ႇလေႃႉ 2 ၵေႃႉ၊ ၼမ်ႉၸၢင် 1 ၵေႃႉလႄႈ ၵဵင်းတုင် 3 ၵေႃႉ၊ တီႈဝဵင်းမူႇၸေႊၵေႃႈမီးၵူၼ်းၸပ်းတၢင်းပဵၼ်သေ ယူတ်းယႃဝႆႉယူႇၵေႃႈၼိုင်ႈ။ ပတ်းပိုၼ်ႉမိူင်းႁူမ်ႈတုမ် တႄႉ ၵူၼ်းၸပ်းမီး 4 ႁဵင်ပၢႆ ၊ လူႉတၢႆ 57 ၵေႃႉ ။