ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး SSPP/SSA ၶဵင်ႈၶႅင်လွင်ႈႁူမ်ႇလူမ်ႈ ၵူတ်ႇထတ်းပၢႆးယူႇလီၵူၼ်းမိူင်း ၼိူဝ်သဵၼ်ႈတၢင်း ၶဝ်ႈဢွၵ်ႇ ငဝ်ႈငုၼ်း ဝၢၼ်ႈႁႆး ၵူႈသဵၼ်ႈၵူႈသၢႆ ပိူဝ်ႈတႃႇၵႅတ်ႇၵင်ႈတၢင်းပဵၼ်ၶူဝ်ႊဝိတ်ႉ 19။
တၢင်းပဵၼ်ၶူဝ်ႊဝိတ်ႉ 19 ၽႄႈ ၸပ်းၵၼ်ပတ်းပိုၼ်ႉမိူင်း ၼိုင်ႈဝၼ်း လၢမ်းၶိုၼ်ႈ ၼပ်ႉႁူဝ်ပၢၵ်ႇၵေႃႉလႄႈ တႃႇႁႂ်ႈၵူၼ်းမိူင်း ၵူၼ်းသိုၵ်း ၵႆယၢၼ်တၢင်းပဵၼ်ၼႆသေ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ငဝ်ႈငုၼ်းဝၢၼ်ႈႁႆး ၶဵင်ႈၶႅင် ၵူတ်ႇထတ်းပၢႆးယူႇလီ ၼိူဝ်သဵၼ်ႈတၢင်းၶဝ်ႈဢွၵ်ႇ ဝၢၼ်ႈႁႆး ၵူႈႁူးၵူႈတၢင်း။
ၸဝ်ႈႁၢၼ်တၢၼ်းဢွင်ႇ ၽူႈၶၢၼ်ပၢၵ်ႇ SSPP/SSA လၢတ်ႈဝႃႈ- “တႃႇၵႅတ်ႇၵင်ႈတၢင်းပဵၼ်ၶူဝ်ႊဝိတ်ႉၼႆႉ ပဵၼ်ပုၼ်ႈၽွၼ်းၵူၼ်းမိူင်းၵူႈၵေႃႉ၊ ဢမ်ႇၸႂ်ႈၵေႃႉၼိုင်ႈၵေႃႉလဵဝ်၊ ၸုမ်းၼိုင်ႈၸုမ်းလဵဝ်။ ယူႇတီႈငဝ်ႈငုၼ်း ဝၢၼ်ႈႁႆးတႄႉ လွင်ႈႁၢင်ႈႁႅၼ်းပၼ်ၵူၼ်းမိူင်းၼႆႉ မီးဢွင်ႈတီႈၶဝ်ႈၵဵပ်းတူဝ် Quarantine ၊ သမ်ႉတင်းၽႃႈ တူမ်းပၢၵ်ႇ/ၶူႈၼင်၊ ၼမ်ႉယႃႈလၢင်ႉမိုဝ်း၊ ပႂ်ႉၵူတ်ႇထတ်းပၢႆးယူႇလီ တၢင်းၶဝ်ႈဢွၵ်ႇဝၢၼ်ႈႁႆး ၸိူဝ်းၼႆႉ။ ၶူဝ်းၶွင်ၸိူဝ်းၼႆႉ ယူႇတီႈမူႇၸုမ်းဢွၵ်ႇဝႆႉၵေႃႈမီး၊ တၢင်ႇမူႇတၢင်ႇၸုမ်း ၸွႆႈမႃးၵေႃႈမီး။” – ဝႃႈၼႆ။
ဝၼ်းတီႈ 13/09/2020 ပူၼ်ႉမႃးၼႆႉ ပႃႇတီႇမႂ်ႇသုင်ၸိုင်ႈတႆး ဢွၵ်ႇလိၵ်ႈပိုၼ်ၽၢဝ်ႇ ပၼ်ၾၢင်ႉ ၵူၼ်းမိူင်း ၵူၼ်းသိုၵ်း ႁႂ်ႈႁၵ်ႉသႃပၢႆးယူႇလီ ႁႂ်ႈသႂ်ႇၽႃႈတူမ်းသူပ်း တူမ်းပၢၵ်ႇ ၸွႆႈၵၼ် ၵုမ်းၵမ် ၵႅတ်ႇၵင်ႈ တၢင်းပဵၼ် ၶူဝ်ႊဝိတ်ႉ 19 ။ တႄႇ ၼၼ်ႉမႃး ၵူတ်ႇထတ်း ၵူၼ်းၵႂႃႇၵူၼ်းမႃးၵူႈဝၼ်း တေႃႇထိုင်ဝၼ်းမိူဝ်ႈၼႆႉ။
တင်ႈၵဵတ်ႉထတ်းပၢႆးယူႇလီ ၼိူဝ်သဵၼ်ႈ တၢင်းၶဝ်ႈဢွၵ်ႇ ငဝ်ႈငုၼ်းဝၢၼ်ႈႁႆး 6 သဵၼ်ႈ။ တီႈၵဵတ်ႉ ၵူတ်ႇထႆး ပၢႆးယူႇလီၼၼ်ႉ မီးၾၢႆႇမေႃယႃ၊ ၵူၼ်းၼုမ်ႇ၊ ၾၢႆႇႁူမ်ႇလူမ်ႈ ႁူမ်ႈၵၼ် 3 ၸုမ်း ပႂ်ႉၵူတ်ႇထတ်း၊ တႅၵ်ႈလူမ်းမႆႈ၊ တူၺ်းပၢႆးယူႇလီ ထတ်းငဝ်းလၢႆးတၢင်းပဵၼ်ၶူဝ်ႊဝိတ်ႉ 19 ယႃႇႁႂ်ႈတၢင်းပဵၼ်ၽႄႈၸပ်းၵၼ်။
ၸၢႆးလႅင်း ၵူၼ်းၼုမ်ႇဝၢၼ်ႈႁႆး လၢတ်ႈဝႃႈ- “ဝၢႆးသေၶေႃႈပိုၼ်ၽၢဝ်ႇဢွၵ်ႇမႃးၼႆႉ တေႃႇထိုင်ယၢမ်းလဵဝ် ၵူၼ်းၶဝ်ႈဢွၵ်ႇဝၢၼ်ႈႁႆး လူတ်းယွမ်းၵႂႃႇ ႁၢင်ႇၵႂႃႇ။ ပေႃးဢမ်ႇမီးၵၢၼ်ၸမ်ပဵၼ် ႁိပ်ႈၼႅတ်ႈ ဢမ်ႇလႆႈ ဢွၵ်ႇႁိူၼ်း၊ ယူႇတီႈၾၢႆႇပၢႆးယူႇလီ တီႈငဝ်ႈငုၼ်းဝၢၼ်ႈႁႆးၼႆႉၵေႃႈ တၢင်းၶဝ်ႈဝၢၼ်ႈႁႆး မီး 6 သဵၼ်ႈ ဢွၼ်ၵၼ်ပႂ်ႉၵုမ်းတူၺ်းၵူတ်ႇထတ်းပၼ်ၵူႈသဵၼ်ႈ။ ႁၢင်ႈႁႅၼ်းဝႆႉပၼ်ပႃး ၽႃႈတူမ်းပၢၵ်ႇ/ၶူႈၼင် Mask ပၼ်တီႈၵူၼ်းမိူင်း၊ ၽႃႈတူမ်းပၢၵ်ႇၼႆႉ ပဵၼ်သႅၼ်းၸႂ်ႉလႆႈလၢႆလၢႆပွၵ်ႈ၊ လွႆးယဝ်ႉၶိုၼ်းၸႂ်ႉလႆႈထႅင်ႈၼၼ်ႉ” ဝႃႈၼႆ။
လိူဝ်သေၼၼ်ႉ ယူႇတီႈငဝ်ႈငုၼ်းဝၢၼ်ႈႁႆး SSPP/SSA ယင်းႁၢင်ႈႁႅၼ်း ဝႆႉပၼ်ပႃးဢွင်ႈတီႈၵုမ်း/ၵဵပ်းတူဝ် ႁူင်းလိုဝ်ႈသဝ်း Quarantine တႃႇၵူၼ်းမိူင်း ၸိူဝ်းလုၵ်ႉတီႈၵႆ တၢင်ႇဝၢၼ်ႈတၢင်ႇဝဵင်း တၢင်ႇမိူင်း ၸိူဝ်းၼႆႉ ၶဝ်ႈမႃးတီႈၼႂ်း ဝၢၼ်ႈႁႆး၊ ၶၢဝ်းတၢင်း 21 ဝၼ်း၊ ပဵၼ်တီႈ ၵိင်ႇၽႄ ႁူင်းႁဵၼ်းၸၼ်ႉသုင် ၼႆယဝ်ႉ။
ဢွၼ်ၼႃႈၼႆႉၵေႃႈ ယူႇတီႈလုမ်းၾၢႆႇၽွင်းငမ်း/ လုမ်းဢုပ်ႉပိူင်ႇငဝ်ႈငုၼ်း SSPP/SSA ဢွၵ်ႇၶေႃႈ ပိုၼ်ၽၢဝ်ႇ ၵၢၼ်ႁႄႉႁၢမ်ႈတၢင်းပဵၼ်ၶူဝ်ႊဝိတ်ႉ 19 ဝႆႉ တင်းမူတ်း 9 ၶေႃႈ။ ၼႂ်းၼၼ်ႉ ပႃးၸဵမ် တေဢမ်ႇလႆႈႁဵတ်းပွႆးႁဵတ်းလၢမ်း၊ တေဢမ်ႇလႆႈၼင်ႈၵိၼ်တၢင်းၵိၼ် ၸွမ်းႁၢၼ်ႉ၊ ပေႃးဢွၵ်ႇတၢင်းၼွၵ်ႈ တေလႆႈသႂ်ႇၽႃႈတူမ်းပၢၵ်ႇၵူႈၵေႃႉ၊ ပေႃးႁၼ်ၵူၼ်းပဵၼ်လၢၵ်ႇလၢႆး တေလႆႈပွင်ႇၶၢဝ်ႇၶိုတ်းတၼ်း ပၼ်ၽူႈမီးပုၼ်ႈၽွၼ်း ဝၢၼ်ႈ/ၸုမ်း/ဢိူင်ႇ/ ၸႄႈဝဵင်း/ၸႄႈတွၼ်ႈ လႄႈတီႈလုမ်းၾၢႆႇၽွင်းငမ်းဝႆးဝႆး ၸိူဝ်းၼႆႉ။
