ပႃႇတီႇႁူဝ်သိူဝ်ဝဵင်းမူႇၸေႊ ယၢပ်ႇၽိုတ်ႇငိုၼ်းတွင်း တႃႇႁႃသဵင်/တႃႇလူင်းပိုၼ်ႉတီႈ လႄႈ ပိုၼ်ၽၢဝ်ႇ ႁပ်ႉတၢင်းၸွႆႈထႅမ် ၼႂ်းၶၢဝ်းတၢင်း 4-5 ဝၼ်းၼႆႉ မီးၵူၼ်းမိူင်း ၵမ်ႉၸွႆႈ တင်းမူတ်း လႆႈငိုၼ်း 200 သႅၼ်ပျႃးပၢႆ ယဝ်ႉဝႃႈၼႆ။

ဝၼ်းတီႈ 10/9/2020 ၼႆႉမႃး တေႃႇထိုင်ဝၼ်းမိူဝ်ႈၼႆႉ ပႃႇတီႇ ႁူဝ်သိူဝ် ဝဵင်းမူႇၸေႊ ပိုၼ်ၽၢဝ်ႇ ႁပ်ႉတၢင်းၸွႆႈ တီႈၵူၼ်းမိူင်း။ တုၵ်းယွၼ်းႁႂ်ႈၵမ်ႉထႅမ်ငိုၼ်းတွင်း တႃႇလူင်းႁႃသဵင်၊ ၵၢၼ်ၸႂ်ႉရူတ်ႉၵႃး၊ ပႃးၸဵမ်တႃႇၵိၼ်တႃႇယမ်ႉ ႁူပ်ႉတၢင်းယၢပ်ႇ ၽိုတ်ႇငိုၼ်းၵွင်ၵၢၼ်လၢႆလွင်ႈ။ ၶၢဝ်းတၢင်း 4-5 ဝၼ်းၼႆႉ သုၼ်ႇတူဝ်ၵူၼ်းမိူင်း၊ သုၼ်ႇၼႃႈဝၢၼ်ႈတႃသူၼ်၊ သုၼ်ႇပွၵ်ႉယွမ်ႇ ဢိူင်ႇထုင်ႉ ဢွၼ် ၵၼ်ၸွႆႈထႅမ် လႆႈငိုၼ်း 200 သႅၼ်ပၢႆယဝ်ႉဝႃႈၼႆ။

 ၼၢင်းသေႃးမျႃႉ ၽူႈႁပ်ႉပုၼ်ႈၽွၼ်းၾၢႆႇၸွႆႈႁႃငိုၼ်းၵွင်ၵၢင် ၸုမ်းၼၢင်းယိင်းပႃႇတီႇႁူဝ်သိူဝ် ဝဵင်းမူႇၸေႊ လၢတ်ႈဝႃႈ – “ မိူဝ်ႈဝႃး ပီႈၼွင်ႉပွၵ်ႉၸၢၼ်းႁဝ်း ၸွႆႈထႅမ်မႃး 40 သႅၼ်ပၢႆၶႃႈ။ မိူၼ်ၼင်ႇ တင်း 19 မၢၼ်ႈ ႁဝ်းၶႃႈၵေႃႈ ဢွၼ်ၵၼ်ၵမ်ႉထႅမ်မႃး ၼိုင်ႈဝၢၼ်ႈလႂ် 10 သႅၼ်ၶႃႈ ဢေႃႈ။ ယူႇတီႈပီႈၼွင်ႉႁဝ်းၶႃႈ ၵမ်ႉထႅမ်ၶဝ်ႈမႃး ၵေႃႉဢိတ်းၵေႃႉဢွတ်း ၵႃႈၼင်ႇပွင်ႇပဵၼ်လႆႈ ၸိူဝ်းၼၼ်ႉၵေႃႈမီးဢေႃႈ။ ယၢမ်းလဵဝ်ၼႆႉ လႆႈငိုၼ်းၵမ်ႉထႅမ် တီႈပီႈၼွင်ႉ ႁဝ်းၶႃႈမီး 200 သႅၼ်ပၢႆၼႆႉၶႃႈ” – ဝႃႈၼႆ။

ပႃႇတီႇႁူဝ်သိူဝ် SNLD ဢၼ်တေၶဝ်ႈၶဵင်ႇ ၼႂ်းၸႄႈဝဵင်းမူႇၸေႊ ၼေႃႇၽူႈတႅၼ်း သၽႃးၵူၼ်းမိူင်း ပဵၼ် ၼၢင်းထူၺ်ႈမုင်ႇ၊ ၸၢႆးၵျေႃႇတဵင်း (ၽူႈတႅၼ်းပၢၼ်တလဵဝ်) တေၶဝ်ႈၶႅင်ႇၶိုၼ်း တီႈၼင်ႈသၽႃး ၽူႈတႅၼ်းၸႄႈမိူင်း ၶဵတ်ႇလိူၵ်ႈတင်ႈမၢႆ 1 လႄႈ ၸၢႆးၵျေႃႇဝိၼ်း ၶဵတ်ႇလိူၵ်ႈတင်ႈမၢႆ 2 ။ သၽႃးၸိူဝ်ႉၸၢတ်ႈ ၼႂ်းၸႄႈတွၼ်ႈမူႇၸႄႈတႄႉ ပဵၼ် ၸၢဝ်းၶိူဝ်းၶၢင် ၸိုဝ်ႈႁွင်ႉ မေႃႇထုၼ်းဢွင်ႇ – ၵေႃႉယဝ်ႉၸၼ်ႉၶူး MA တီႈမိူင်းဢမေႊရီႊၵၼ်ႊ USA မႃး။

ၵူၼ်းတၢင်းဢိူင်ႇ 19 ဝၢၼ်ႈ ၵေႃႈလၢတ်ႈဝႃႈ – “လႆႈငိၼ်းတၢင်းယၢပ်ႇပႃႇတီႇႁူဝ်သိူဝ် လၢႆလွင်ႈ ၵွပ်ႈၼၼ် ၼင်ႇၵႃႈပဵၼ်လႆႈ ၸင်ႇႁူမ်ႈငိုၼ်းၵၼ်သေ ထႅမ်” – ဝႃႈၼႆ။ “ၼႂ်းပႃႇတီႇႁဝ်းၶႃႈၼႆႉ ဢမ်ႇမီးငိုၼ်းတွင်းၼႆ ၵူၼ်းမိူင်းၵေႃႈႁူႉ၊ ၶဝ်ႈဝႃႈႁႂ်ႈ ဢွၵ်ႇလိၵ်ႈၸူး၊ ၽွင်းဢွၵ်ႇႁႃသဵင် ၽႅဝ်ဝၢၼ်ႈလႂ် ပွၵ်ႉလႂ်ၵေႃႈ တေမႃးၸွႆႈထႅမ်” – ၼႆ ၼၢင်းသေႃးမျႃႉ ၵေႃႈလၢတ်ႈထႅင်ႈၼင်ႇၼႆ။

ၸႄႈဝဵင်းမူႇၸေႊၼႆႉဢၼ်တေၶႅင်ႇၵၼ် တႄႉ မီး –  (1) ပႃႇတီႇႁူဝ်သိူဝ် SNLD၊ (2) ပႃႇတီႇသိူဝ်ၽိူၵ်ႇ SNDP၊ ပႃႇတီႇမၢၼ်ႈ ဢၼ်ဢဵၼ်ႁႅင်းယႂ်ႇတႄႉ (3) ပႃႇတီႇသၢင်ႇသီႈ USDP ဢၼ်တၢင်းၼမ်ႁူႉဝႃႈ ပႃႇတီႇသိုၵ်းမၢၼ်ႈ၊  (4) ပႃႇတီႇၼူၵ်ႉယၢင်း NLD ဢၼ်တၢင်းၼမ်ႁူႉဝႃႈ ပႃႇတီႇ တေႃႇဢွင်ႇသၢၼ်းသူႉၵျီႇ ဢၼ်ပဵၼ်လူင်ပွင်ၸိုင်ႈယူႇယၢမ်းလဵဝ်၊ (5) ပႃႇတီႇတဢၢင်း TNP (တအာင်း/ ပလောင် အမျိုးသားပါတီ) ၊ ပႃႇတီႇၶၢင်၊ ဢိၵ်ႇထႅင်ႈလၢႆလၢႆပႃႇတီႇ တေၶဝ်ႈၶႅင်ႇၵၼ်။