သိုၵ်းမၢၼ်ႈလႄႈၾၢႆႇပလိၵ်ႈၼႂ်းဝဵင်းမူႇၸေႊ ပွႆႇပၼ်ၵူၼ်း ၵျႃႊၽႅၼ်ႉ 600 ပၢႆ ဢၼ်ၶဝ်တီႉလႆႈဝႆႉ ၶၢဝ်းတၢင်းပီပၢႆ – ဝႃႈၼႆ။  

ၵူၼ်းၵျႃႊၽႅၼ်ႉၸိူဝ်းၼႆႉ သိုၵ်းမၢၼ်ႈပွႆႇပၼ်ၶိုၼ်း မိူဝ်ႈဝၼ်းတီႈ 16/10/2025။ ၵမ်ႈၽွင်ႈပဵၼ်ၵူၼ်းၺႃးတီႉဝႆႉၸဵမ်မိူဝ်ႈပီၵၢႆ ၵမ်ႈၽွင်ႈၺႃးတီႉမိူဝ်ႉႁူဝ်ပီၼႆႉ။

ၵူၼ်းမူႇၸေႊၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ- “ ၶဝ်ပွႆႇၵမ်းၸုပ်ႈၸုပ်ႈ – ၼိုင်ႈၸုပ်ႈၼိုင်ႈၸုပ်ႈၼႆႉမွၵ်ႈ သီႇႁႃႈသိပ်းၼႆႉၼေႈ။ တေႃႇထိုင်ဝၼ်းတီႈ 16 ၼႆႉၶဝ်ပွႆႇယဝ်ႉ 600 ၼႆႉယဝ်ႉလႆႈႁူႉၼင်ႇၼႆ။ ဢၼ်ပွႆႇဢွၵ်ႇၼႆႉပဵၼ်ၸၢဝ်းၶႄႇဢၼ်ယိပ်းမၢႆၾၢင်မၢၼ်ႈ လႄႈတင်း ၵူၼ်းမိူင်းမၢၼ်ႈတူင်ႈပဵင်း တင်းမူတ်း ။ ၸိူဝ်းၸဝ်ႈပဵၼ်ၵူၼ်းၸွႆႈၼႂ်းၵၢၼ်ၵျႃႊၽႅၼ်ႉ။ ပေႃးပဵၼ်တၢင်ႇၸၢဝ်းၶိူဝ်းတႄႉ ပဵၼ်ၵူၼ်းၸွႆႈႁဵတ်းလွင်ႈမူတ်းသႂ် ဢဝ်ႁူမ်ႇလူမ်ႈ တူမ်ႈၶဝ်ႈတူမ်ႈၽၵ်းလႄႈလုမ်းလႃး ၵူၼ်းႁဵတ်းၵၢၼ်ၵူၺ်း”- ဝႃႈၼႆ။

မိူဝ်ႈၵၢင်ပီ 2024 ၼႆႉ ယွၼ်ႉလူင်ပွင်ၸိုင်ႈမိူင်းၶႄႇမိပ်ႇဢီးလႄႈ သိုၵ်းမၢၼ်ႈတင်းၾၢႆႇပလိၵ်ႈၶဝ် လူင်းပိုၼ်ႉတီႈၼႂ်းၸႄႈဝဵင်းမူႇၸေႊယဝ်ႉ ၶူၼ်ႉသွၵ်ႈတဝ်တီႉၺွပ်း ၵူၼ်းႁဵတ်းၵၢၼ် လွၵ်ႇလႅၼ်ငိုၼ်းၼိူဝ်ဢွၼ်ႊလၢႆႊ ၸုမ်းၵျႃႊၽႅၼ်ႉၸိူဝ်းၼႆႉတင်းၼမ်။ ၵူၺ်းၵႃႈ တေႃႇထိုင်ယၢမ်းလဵဝ် ၸုမ်းၵျႃႊၽႅၼ်ႉၸိူဝ်းၼႆႉ ဢမ်ႇမူတ်းသဵင်ႁၢႆလၢႆၵူၺ်းဢမ်ႇၵႃး တိုၵ်ႉသိုပ်ႇႁဵတ်းၵၢၼ်မိူၼ်ၵဝ်ႇဝႆႉယူႇၼႆ ၵူၼ်းမိူင်းဝဵင်းမူႇၸေႊ လၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈၼင်ႇၼႆ။

ဝဵင်းမူႇၸေႊၼႆႉ ပဵၼ်ဝဵင်းဢၼ် လွတ်ႈၽေးၽႅၼ်ယၼ်ႇသိုၵ်း 1027  ဝဵင်းလဵဝ်ၼႂ်းမိူင်းတႆးပွတ်းႁွင်ႇ။ တေႃႇထိုင်ယၢမ်းလဵဝ်သိုၵ်းမၢၼ်ႈတိုၵ်ႉၵုမ်းဝႆႉ။ ၵူၺ်းၵႃႈ ပျီႇတူႉၸိတ်ႉ ၸုမ်းယိပ်းၵွင်ႈၵၢင်ႇၵေႃႈလိူင်ႇၼမ် ၊ လွင်ႈတေႃႇလွင်း ယႃႈမဝ်းၵမ်ၵေႃႈလိူင်ႇၼမ် ၊ ၼႂ်းပီၼႆႉသမ်ႉ ၸုမ်းႁဵတ်းၵၢၼ်ၵျႃႊၽႅၼ်ႉ လွၵ်ႇလႅၼ်ၵိၼ်ငိုၼ်းၵေႃႈလိူင်ႇၼမ်။ ဢမ်ႇမီးၽႂ်ၸုမ်းလႂ်ဢဝ်ႁူမ်ႇလူမ်ႈပၼ်ၵူၼ်းမိူင်းလႆႈ။