ၵူၼ်းဢဝ်ၶၢဝ်ႇ 2 ၵေႃႉ ႁွတ်ႈၵဵင်းတုင် လႅပ်ႈမိူၼ်ၾၢင်ႁၢင်ႈတၢင်းပဵၼ်ၶူဝ်ႊဝိတ်ႉ 19 လႄႈ ယၢမ်းလဵဝ် ၵုမ်းၵၵ်းတူဝ်ဝႆႉတီႈႁူင်းယႃလူင်ၵဵင်းတုင်ယဝ်ႉ ။
ၵူၼ်းႁဵတ်းၵၢၼ်ၶၢဝ်ႇ တီႈႁွင်ႈၵၢၼ်ၶၢဝ်ႇ Frontier Myanmar 2 ၵေႃႉပဵၼ်ၽူႈၸၢႆး ဢႃယု 27 ပီလႄႈ 23 ပီ ။ ဝၼ်းတီႈ 31/8/2020 မိူဝ်ႈဝႃးၼႆႉ မီးၾၢင်ႁၢင်ႈၶူဝ်ႊဝိတ်ႉ 19 – မိူၼ်ၼင်ႇ ဢမ်ႇလႆႈယိၼ်းသႅဝ်ဢၢႆမဵၼ်/ႁွမ် သေဢမ်ႇၵႃးလူမ်းမႆႈၶိုၼ်ႈသုင် လႄႈ ၾၢႆႇႁူင်းယႃလူင်ၵဵင်းတုင် ၵၵ်းၶင်တူဝ်ၶဝ်ဝႆႉသေ လုမ်းလႃးယူတ်းယႃပၼ်ဝႆႉယူႇ ။ လိူဝ်ၼၼ်ႉ ၽူႈၸၢႆး ၵေႃႉၼိုင်ႈ ဢႃယု 47 ပီ ယူႇဝၢၼ်ႈႁူဝ်ၶူဝ်၊ ဢိူင်ႇၼွင်ၵၢင် ဝဵင်းၵဵင်းတုင် ပဵၼ်ၵူၼ်းႁေႃႈရူတ်ႉၵႃးပၼ်ၶဝ် ၼၼ်ႉၵေႃႈ ထုၵ်ႇၵၵ်းတူဝ်ဝႆႉတီႈႁူင်းယႃ ၵဵင်းတုင် မိူၼ်ၵၼ်။
တွၵ်ႊတိူဝ်ႊၵျေႃႇမျိၼ်ႉ ၽူႈၵွင်းႁူင်းယႃ ၵဵင်းတုင်လၢတ်ႈတီႈၶၢဝ်ႇ ၵမ်ႇပေႃးၸ ဝႃႈ – ၵူၼ်းၸိူဝ်းဢၼ် လႆႈႁူပ်ႉထူပ်း ၊ ၵႂႃႇမႃးၸွမ်းၵၼ်တင်း ၼၵ်းၶၢဝ်ႇ 2 ၵေႃႉၼၼ်ႉၵေႃႈ ၾၢႆႇပၢႆးယူႇလီတိုၵ်ႉ ထတ်းထွင် တူၺ်းသေ ၸႂ်ႉၵၵ်းတူဝ်ဝႆႉတီႈႁိူၼ်းၽႂ်မၼ်းယူႇ။ လိူဝ်ၼၼ်ႉ ၵူၼ်းဢၼ်ၶီႇၶိူင်ႈမိၼ်မႃးၸွမ်းၵၼ်တင်းၶႃ 2 ၵေႃႉၼၼ်ႉၵေႃႈ တိုၵ်ႉၵူတ်ႇထတ်းသွၵ်ႈႁႃ တႃႇႁႂ်ႈၶဝ်ၵႂႃႇၵူတ်ႇထတ်းပၢႆးယူႇလီယူႇ- ဝႃႈၼႆ။
ၵဵဝ်ႇၵပ်းလွင်ႈၵူၼ်းႁဵတ်းၵၢၼ်ၶၢဝ်ႇ 2 ၵေႃႉၼႆႉ တီႈႁွင်ႈၵၢၼ်ၶၢဝ်ႇၶဝ်လၢတ်ႈဝႃႈ – ၸဵမ်မိူဝ်ႈပႆႇမႃးၵဵင်းတုင်ၼၼ်ႉ ၶႃဢမ်ႇယူႇလီလႄႈ လႆႈၶဝ်ႈယူတ်းယႃတူဝ်တီႈႁူင်းယႃယဝ်ႉ။ ဢၼ်ၶႃမႃးတီႈ ၵဵင်းတုင် ၼႆႉၵေႃႈ တႃႇမႃးထၢႆႇႁၢင်ႈၶူၼ်ႉၶႂႃႉလွင်ႈယူႇသဝ်းၵိၼ်သၢင်ႈ ၸၢဝ်းၶိူဝ်းၼႂ်းပိုၼ်ႉတီႈ- ဝႃႈၼႆ။
ၵူၼ်းႁဵတ်းၵၢၼ်ၶၢဝ်ႇ 2 ၵေႃႉၼႆႉ လုၵ်ႉတႃႈၵုင်ႈ ၶီႇၶိူင်ႈမိၼ် မႃးလူင်းၵဵင်းတုင် မိူဝ်ႈဝၼ်းတီႈ 29/8/2020 ။ ၵွပ်ႈၼႆလႄႈ ၸိူဝ်းလုၵ်ႉတႃႈၵုင်ႈ ၶီႇၶိူင်ႈမိၼ်မႃးၸွမ်းၵၼ်တင်း ၶႃသွင်ၵေႃႉဝၼ်းၼၼ်ႉ ႁႂ်ႈဢွၼ်ၵၼ်သူင်ႇၶၢဝ်ႇၸူး ၽူႈၵွၼ်းဝၢၼ်ႈဢိူင်ႇၽႂ်မၼ်းသေ ၵုမ်းၵၵ်းတူဝ် ယူႇႁိူၼ်းပႂ်ႉတူၺ်းငဝ်းလၢႆးယူႇ ၼႆ ၽူႈၵွၼ်းၸေႈတွၼ်ႈ ၵဵင်းတုင် ၵေႃႈ ပိုၼ်ၽၢဝ်ႇဝႆႉၼင်ႇၼႆ။
ဝၼ်းတီႈ31/8/2020 လႄႈ ဝၼ်းတီႈ 1/9/2020 ၼႆႉ ၾၢႆႇပၢႆးယူႇလီပိုၼ်ၽၢဝ်ႇဝႃႈ ၼႂ်းမိူင်းႁူမ်ႈတုမ် ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 ၼမ်မႃးထႅင်ႈ 100 ၵေႃႉ။ တင်းမူတ်း မီးၵူၼ်းတိတ်းၸပ်းတၢင်းပဵၼ် 887 ၵေႃႉယဝ်ႉ။
