သိုၵ်းလူင်ပွင်ၸိုင်ႈမၢၼ်ႈ ၼပ်ႉႁူဝ်ပၢၵ်ႇ ယိုၼ်ႈယွၼ်းတွတ်ႈၶႅပ်းၵၢင်ၸႂ် တီႈ UEC ဝဵင်းမူႇၸႄႈ

0
356

သိုၵ်းလူင်ပွင်ၸိုင်ႈမၢၼ်ႈ ႁႅင်းသိုၵ်းၼပ်ႉႁူဝ်ပၢၵ်ႇၵေႃႉ ၸိူဝ်းႁွတ်ႈထိုင်တူင်ႉၼိုင်ၵၢၼ်သိုၵ်း ၾၢႆႇႁွင်ႇၼမ်ႉမၢဝ်း၊ ၾၢႆႇၸၢၼ်းၼမ်ႉမၢဝ်း ၸိူဝ်းၼၼ်ႉ ယိုၼ်ႈယွၼ်း တွတ်ႈၶႅပ်းၵၢင်ၸႂ် ဝႆႉတီႈ ၶွမ်ႊမသျိၼ်ႊလိူၵ်ႈတင်ႈ ဝဵင်းမူႇၸႄႈ။

Photo Credit to BNI ႁူင်းတွတ်ႈၶႅပ်းၵၢင်ၸႂ် သိုၵ်းလူင်ပွင်ၸိုင်ႈ

ၼႂ်းၸႄႈတွၼ်ႈမူႇၸႄႈ မိူင်းတႆး ပွတ်းႁွင်ႇၼၼ်ႉ သိုၵ်းလူင်ပွင်ၸိုင်ႈမၢၼ်ႈ ပၵ်းသဝ်းတူင်ႉ ၼိုင်ယူႇ တႃႇသေႇ မီးႁႅင်းသိုၵ်း ႁိမ်း 10 တပ်ႉၵွင်၊ ဢၼ်မႃးထႅမ်ႁႅင်းသိုၵ်းမႂ်ႇမႂ်ႇ သမ်ႉ တပ်ႉၸုမ်းလူင် (တပ်ႉမ) 88 တပ်ႉမ 77 – တပ်ႉမ 11 သမ်ႉ မီးတၢင်း ဝဵင်းၼမ်ႉၶမ်း။ ၼႂ်းၼၼ်ႉ သိုၵ်းဢၼ်မႃးထႅမ်ႁႅင်းထႅင်ႈမႂ်ႇမႂ်ႇၼၼ်ႉ ယိုၼ်ႈယွၼ်းတွတ်ႈၶႅပ်းၵၢင်ၸႂ် တီႈၶွမ်ႊမသျိၼ်ႊလိူၵ်ႈတင်ႈ ၸႄႈဝဵင်းမူႇၸႄႈ မီး ႁႅင်းသိုၵ်း 400 ၵေႃႉ ဝႃႈၼႆ။

ၵူၼ်းၸမ်ၸႂ်ၶွမ်ႊမသျိၼ်ႊ ပၢင်လိူၵ်ႈတင်ႈ ဝဵင်းမူႇၸေႊ ဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈလၢတ်ႈဝႃႈ – “ဢၼ် ႁဝ်းၶႃႈ ႁူႉတႄႉ သိုၵ်းမၢၼ်ႈ ဢၼ်မႃးယိုၼ်ႈၸိုဝ်ႈဝႆႉ တီႈ UEC ဝဵင်းႁဝ်းၶႃႈၼႆႉ မီး 400 ပၢႆ ၼႆဢေႃႈ။ တၢင်ႇ ဝဵင်းၵေႃႈတေၶိုၼ်ႈမႃးၵႃႈႁိုဝ်ပႆႇႁူႉ၊ တီႈၼမ်ႉၶမ်း၊ တီႈၵူတ်ႉၶၢႆ သိုၵ်းသိုၵ်းတူင်ႉၼိုင် ႁွတ်ႈဝႆႉၵႃႈ ႁိုဝ် ၼႆ ၼၼ်ႉၼႃႇၼေႃႇ – ၼႂ်းၸႄႈတွၼ်ႈမူႇၸႄႈတင်းမူတ်းတႄႉ သိုၵ်းတၢင်ႇတီႈ မႃးတူင်ႉၼိုင် တေမီးႁဵင်ပၢႆ ယူႇၶႃႈယူဝ်ႉ” – ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ်တိတ်းတေႃႇတွင်ႈထၢမ် ၶွမ်ႊမသျိၼ်ႊၵၢၼ် လိူၵ်ႈတင်ႈ ၸႄႈတွၼ်ႈမူႇၸႄႊယူႇသေတႃႉ  ဢုပ်ႇလၢတ်ႈဝႃႈ – “ပႆႇၸၢင်ႈပိုတ်ႇလၢတ်ႈ ပဵၼ်တၢင်းၵၢၼ်” – ဝႃႈၼႆ။

ၸၢႆးၵျေႃႇတဵင်း တႅၼ်းၽွင်းသၽႃးၸႄႈမိူင်း မူႇၸေႊ လၢတ်ႈဝႃႈ- ၶဝ်တၢင်ႇဝႆႉယဝ်ႉႁႃႉ ပႆႇတၢင်ႇႁႃႉ ယူႇတီႈၶႃႈႁဝ်းပႆႇလႆႈႁူႉၸွမ်း။ ပွၵ်ႈၵမ်းသွင်မႃးတႄႉ ယူႇတီႈၶွမ်ႊမသျိၼ်ႊၵၢၼ်လိူၵ်ႈတင်ႈၼႆႉ တေလႆႈ ၸႅင်ႈလၢတ်ႈၵူၼ်းမိူင်းထႅင်ႈယူႇ။ မိူဝ်ႈလဵဝ် ႁဝ်းၶႃႈၵေႃႈပႆႇမီးသုၼ်ႇထၢမ်၊ တေပဵၼ်လႆႈယူႇ ၵွပ်ႈပိူဝ်ႈဝႃႈ ပေႃးဢဝ်ၼႂ်းမၢႆမီႈဝႃႈ ၽႂ်ထိုင်တီႈလႂ် ပေႃးယူႇလႆႈ 90 ဝၼ်း မၼ်းမီးသုၼ်ႇတွတ်ႈၶႅပ်း၊ သိုၵ်းမၢၼ်ႈၶဝ် မႃးၼႆႉမိူဝ်ႈ 31/07/2020 ပေႃးထိုင်ပၢင်လိူၵ်ႈတင်ႈမႃး မၼ်းမီး ပၢၵ်ႇဝၼ်းပၢႆယဝ်ႉ”  – ဝႃႈၼႆ။

ၼႂ်းၸိုင်ႈတႆးပွတ်းႁွင်ႇ ၼႆႉ ဢမ်ႇၵွမ်ႉၵႃႈ ၼႂ်းၸႄႈတွၼ်ႈမူႇၸႄႈ ပွတ်းထုင်ႉမၢဝ်းၵူၺ်း၊ သိုၵ်းလူင်ပွင် ၸိုင်ႈ မၢၼ်ႈ ဢၼ်တူင်ႉၼိုင်ႁွတ်ႈထိုင် ၼႂ်းၸႄႈတွၼ်ႈၵျွၵ်ႉမႄး၊ ၼႂ်းၸႄႈတွၼ်ႈလႃႈသဵဝ် ၸိူဝ်းၼႆႉ ၵေႃႈမီးၼမ်။

ဢၼ်မႃးတူင်ႉၼိုင်မႂ်ႇမႂ်ႇပွတ်းတၢင်ႉယၢၼ်းသမ်ႉ မီးတပ်ႉၸုမ်းလူင် (တပ်ႉမ) 22 ငဝ်ႈသိုၵ်းပၵ်းၽႃဢၢင်ႇ ယၢင်းၽိူၵ်ႇ၊ တပ်ႉငဝ်ႈငုၼ်းၵုမ်းၵမ်ၽႅၼ်ၵၢၼ်ယၼ်သိုၵ်း ၸၵၶ 12 ၵေႃႉၵရဵၵ်ႉ ၸႄႈမိူင်းယၢင်းၽိူၵ်ႇ ၼင်ႇၵဝ်ႇ – တပ်ႉၸိူဝ်းၼႆႉၵေႃႈ ယိုၼ်ႈယွတ်းတွတ်ႈၶႅပ်းၵၢင်ၸႂ်ဝႆႉ ၼႂ်းၸႄႈဝဵင်းတၢင်ႉယၢၼ်း။

တပ်ႉသိုၵ်းလူင်ပွင်ၸိုင်ႈမၢၼ်ႈ ဢၼ်ပၵ်းၼႂ်းမိူင်းတႆး မီးငဝ်ႈငုၼ်းတိူင်းသိုၵ်း 4 ဢၼ်။ တႂ်ႈငဝ်ႈငုၼ်းတိူင်း သိုၵ်း ယမၶ လႃႈသဵဝ်ႈ မီး 47 တပ်ႉၵွင်၊ တႂ်ႈငဝ်ႈငုၼ်းတိူင်းသိုၵ်း ရပၶ တူၼ်ႈတီး မီး 51 တပ်ႉၵွၼ်၊ တႂ်ႈ ငဝ်ႈ ငုၼ်းတိူင်းသိုၵ်း ယလၶ ၶူဝ်လမ် မီး 26 တပ်ႉၵွင်၊ တႂ်ႈ တႂ်ႈငဝ်ႈငုၼ်းတိူင်းသိုၵ်း သၢမ်ၸဵင်ႇၵဵင်းတုင် မီး 39 တပ်ႉၵွင် – ၸိူဝ်းၼႆႉ ပဵၼ်တပ်ႉဢၼ် ပၵ်းသဝ်း ယူႇထင် တႃႇသေႇ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

SHARE