သိုၵ်းလူင်ပွင်ၸိုင်ႈမၢၼ်ႈ ႁႂ်ႈသိုၵ်း RCSS/SSA ထွၼ်ဢွၵ်ႇပၼ်တပ်ႉ ႁိမ်းလႅၼ်လိၼ်ထႆး တပ်ႉ႞

သိုၵ်းလူင်ပွင်ၸိုင်ႈမၢၼ်ႈ ဢၼ်တူင်ႉၼိုင် ၼႂ်းၸႄႈတွၼ်ႈ တႃႈၶီႈလဵၵ်း – မိူင်းသၢတ်ႇ တေႃႇၼႃႈ ၸႄႈတွၼ်ႈၵဵင်းႁၢႆး မိူင်းထႆး ၼၼ်ႉ ႁႂ်ႈသိုၵ်း RCSS /SSA တၢင်းပွတ်းလွႆၵေႃႇဝၼ်း ထွၼ်တပ်ႉဢွၵ်ႇပၼ်လုၵ်ႈၼိုင်ႈ ၼႆလႄႈ သွင်ၾၢႆႇ ၶဵင်ႈၶႅင်ၵၢၼ်သိုၵ်းတေႃႇၵၼ်ဝႆႉ။

သိုၵ်းလူင်ပွင်ၸိုင်ႈမၢၼ်ႈ ၶလယ 221 ၊ ၶမယ 334 ၊ ၶမယ 571 ၊ ၶလယ 49 ၊ ၶမယ 527 လႄႈ ၶမယ 519 ၸိူဝ်းၼႆႉ တူင်ႉ ၼိုင်ယူႇဝႆႉ ၼႂ်းၸႄႈတွၼ်ႈတႃႈၶီႈလဵၵ်း ႁိမ်းလႅၼ်လိၼ်ထႆး တေႃႇၼႃႈ ၸႄႈတွၼ်ႈၵဵင်းႁၢႆးၼၼ်ႉ မိပ်ႇဢီး ႁႂ်ႈသိုၵ်း RCSS /SSA ၼႃႈလိၼ်သိုၵ်းမၢႆၼိုင်ႈ(ၵဵင်းတုင်) လွႆၵေႃႇဝၼ်း ထွႆထွၼ် ဢွၵ်ႇပၼ်တပ်ႉ ဢၼ်မီး ၼိူဝ်သၼ်လွႆလမ် တပ်ႉလႅၼ်ၼႃႈ လွႆၵေႃႇဝၼ်း။

“ၽွင်းႁူဝ်ပဝ်ႈလူင်ႁဝ်း ၵႂႃႇမီးတီႈၼေႇပျီႇတေႃႇၼၼ်ႉ ၶဝ်သမ်ႉ ဢဝ်ၻရူၼ်းမႃးမိၼ်၊ ႁဝ်းၶႃႈၵေႃႈ လၢၵ်ႈၵွင်ႈႁၢတ်ႇ ၼၼ်ႉၶႃႈၼႃႇ။ ၶဝ်ၵေႃႈ ယိုဝ်းၵွင်ႈလူင်တွပ်ႇၶိုၼ်းဢေႃႈ ဢမ်ႇထိုင်တီႈပဵၼ် ပၢင်တိုၵ်းၵၼ်ယႂ်ႇၼင်ႇၵဝ်ႇၶႃႈ။ ၶဝ်ႁႂ်ႈႁဝ်းၶႃႈ ထွၼ် ဢွၵ်ႇပၼ်တပ်ႉ ၼႆဢေႃႈ။ တႃႇယိုဝ်းၵေႃႈ တူဝ်ႈတၼ်းယဝ်ႉ ငႃၵၼ်ဝႆႉယူႇ 24 ၸူဝ်ႈမူင်းဢေႃႈ၊ ပေႃး ၵူၼ်းလူင် ၸႂ်ႉထွႆတႄႉဢမ်ႇႁူႉၶႃႈၼႃး” – ၽူႈယူႇၼႃႈသိုၵ်း ၸဝ်ႈၼိုင်ႈလၢတ်ႈ။

တၢင်းပွတ်းဢၼ်ၶဵင်ႈၶႅင်ၵၢၼ်သိုၵ်းၵၼ်ဝႆႉယူႇၼႆႉ တၢင်းဝၢၼ်ႈမႄႈၵျူၵ်ႉ၊ လွႆသၢမ်သုမ်၊ ပူဝ်ႇၼႃးၵူဝ်၊ ၶူဝ်ၽႅၼ်၊ ၼမ်ႉပုင်ႇ၊ ၼမ်ႉမေႃႇ၊ ဝၢၼ်ႈမႂ်ႇမႄႈဢေႃး လႄႈ ၸွမ်းၾင်ႇၼမ်ႉၶူဝ်ၽႅၼ် ပိုၼ်ႉတီႈ ဢၼ်မီးၼႂ်းၵႄႈ ၸႄႈတွၼ်ႈ တႃႈၶီႈလဵၵ်း – မိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း ၸိူဝ်းၼၼ်ႉ။

ဢၼ်ၶဵင်ႈၶႅင်ၵၼ်ၼႆႉ ပႃးတပ်ႉသိုၵ်းဝႃႉ UWSA ။ ပၼ်ႁႃ ဢၼ်ပဵၼ်ယူႇယၢမ်းလဵဝ် – ဝႃႉ UWSA ၊ သိုၵ်းလူင်ပွင် ၸိုင်ႈ မၢၼ်ႈ၊ တင်း သိုၵ်း RCSS/SSA ၼႆသေတႃႉ ၾၢႆႇသိုၵ်းဝႃႉ တင်း သိုၵ်းမၢၼ်ႈတႄႉ ထုင်ႉၼႆႉ ဢမ်ႇႁၼ်ၶဵင်ႈၶႅင် ၵၢၼ်သိုၵ်း တေႃႇၵၼ်။

ဢူးၺီရၢၼ်း ၽူႈၵွၼ်းလုမ်းဝႃႉ လႃႈသဵဝ်ႈ ၵေႃႈလၢတ်ႈဝႃႈ – “လွင်ႈၼႃႈလိၼ်တၢင်းၸၢၼ်းတႄႉဢမ်ႇလႆႈႁူႉၸွမ်း၊ လူဝ်ႇထၢမ်ဝႃႉတၢင်းၸၼ်းၵူၺ်းယဝ်ႉ” –  ဝႃႈၼႆ။ ၽူႈတွႆႇႁွၵ်ႈၶတ်းၸႂ်တိတ်းတေႃႇ ၽူႈၵွၼ်းလုမ်း ဝႃႉ UWSA ဝဵင်းတႃႈၶီႈလဵၵ်းၵေႃႈ ဢမ်ႇမီးၽႂ်ႁပ်ႉတွပ်ႇ။

ဢၼ်ၶဵင်ႈၶႅင်ၵၢၼ်သိုၵ်းတေႃႇၵၼ်ၼႆႉ ၸဵမ်မိူဝ်ႈ ႁူဝ်လိူၼ်ၵျူႊလၢႆႊ တေႃႇထိုင်ဝၼ်းမိူဝ်ႈၼႆႉ ဢမ်ႇဢုပ်ႇဢူဝ်းတူၵ်းလူင်း ၵၼ်လႆႈ၊ ၾၢႆႇသိုၵ်းဝႃႉ UWSA တင်း သိုၵ်းလူင်ပွင်ၸိုင်ႈမၢၼ်ႈ တႄႉ ႁႂ်ႈ RCSS/SSA ထွၼ်ဢွၵ်ႇတပ်ႉပိူင်လဵဝ်။  ၾၢႆႇငဝ်ႈငုၼ်း RCSS တႄႉ ဝႃႈ – “ပေႃးထွၼ်ၵေႃႈ ႁႂ်ႈထွၼ်ဢွၵ်ႇ တင်း သၢမ်ၾၢႆႇ ၽႂ်ယႃႇယူႇ တီႈၼၼ်ႈ” – ဝႃႈၼႆ။

ၵဵဝ်ႇၵပ်းလွင်ႈၶဵင်ႈၶႅင်ၵၢၼ်သိုၵ်းတေႃႇၵၼ်ၼႆႉ ၽူႈမီးပုၼ်ႈႈၽွၼ်း ၼႂ်း RCSS/SSA လၢႆၸဝ်ႈ ယိုၼ်ယၼ် ငဝ်းလၢႆး လွင်ႈပဵၼ်တႄႉ မီးတႄႉယူႇ။ ၽူႈၶၢၼ်ႇပၢၵ်ႇ ၸဝ်ႈသိုၵ်းဢုမ်ႈၶိူဝ်းတႄႉလၢတ်ႈဝႃႈ – “လွင်ႈၼႆႉႁဝ်းၶႃႈ လႆႈငိၼ်းၶၢဝ်ႇဝႆႉယူႇ၊ ယူႇတၢင်းတႂ်ႈတၢင်ႇလၢတ်ႈၶိုၼ်ႈမႃးပဵၼ်တၢင်းၵၢၼ်တႄႉပႆႇမီး” – ဝႃႈၼႆ။

မိူၼ်ၼႆၼင်ႇၵဝ်ႇ တၢင်းပွတ်းဢိူင်ႇႁူးသူၼ် ၾၢႆႇႁွင်ႇ ဝဵင်းၵျွၵ်ႉမႄး မိူင်းတႆးပွတ်းႁွင်ႇၼၼ်ႉၵေႃႈ မိူဝ်ႈဝၼ်းတီႈ 24/8/2020 ၼၼ်ႉ တပ်ႉသိုၵ်း လူင်ပွင်ၸိုင်ႈမၢၼ်ႈ တပ်ႉၵွင် 252 တင်း 253 ႁူမ်ႈၵၼ် ဢဵၼ်ႁႅင်း မွၵ်ႈ 200 ၵေႃႉၼႆႉ ၽိုတ်ႉဢိူမ်ႈသိုၵ်း RCSS/SSA ဝႆႉယူႇလႄႈ သွင်ၾၢႆႇၶဵင်ႈသိုၵ်း ငႃၵၼ်ဝႆႉယူႇ ဝႃႈၼႆ။

ၶွင်ႇသီႇဢဝ်ၶိုၼ်းၸိုင်ႈတႆး တပ်ႉသိုၵ်းၸိုင်ႈတႆး RCSS/SSA ၼႆႉ ပဵၼ်ၸုမ်းလူင်းလၢႆးမိုဝ်း လိၵ်ႈႁူမ်ႈမၢႆ ၵိုတ်းတိုၵ်း တူဝ်ႈမိူင်း NCA ဝႆႉသေ ပဵၼ်ၸုမ်းဢၼ် ၶႂ်ႈဢဝ်လၢႆးၵတ်းယဵၼ် ဢုပ်ႇဢူဝ်းၵႄႈလိတ်ႈပၼ်ႁႃၵၢၼ်မိူင်း။ ၵူၺ်းၵႃႈ ၾၢႆႇသိုၵ်းလူင်ပွင်ၸိုင်ႈမၢၼ်ႈ မွၵ်ႇလၢတ်ႈၶေႃႈၵႂၢမ်းပိုတ်ႇပၢင်ၵုမ်လူင် “ပၢင်လူင် ပီႁူဝ်ပၢၵ်ႇ 21 ၵမ်း 4” တႄႉ ၸုမ်းၸၢဝ်းၶိူဝ်း ယိပ်းၵွင်ႈၵၢင်ႇၼႆႉ ပဵၼ်ၸုမ်းၸိူဝ်းသၢၼ်ၶတ်းလူင်ပွင်ၸိုင်ႈ။ ႁဵတ်းၵၢၼ်ငမ်းယဵၼ်ၵေႃႈ “ၽႅၼ်ႁူဝ်ပႄႉ ၶၢႆၼိူဝ်ႉမႃ”ၵူၺ်းဝႃႈၼႆ။