ၽူႈယိင်း သႅၼ်းၶၢဝ်ႉၵႄႇ ၵေႃႉၼိုင်ႈ ထုၵ်ႇၵူၼ်းႁၢႆႉ ၶဝ်ႈယိုဝ်း လူမ်ႉတၢႆ ၼႃႈႁိူၼ်း ၵၢင်ဝဵင်းမူႇၸေႊ ၽွင်းမၼ်းၼၢင်းတိုၵ်ႉၽုၵ်ႇမွၵ်ႇသွမ်ႈမွၵ်ႇယူႇ ။

မိူဝ်ႈဝၼ်းတီႈ 25/08/2020 ယၢမ်းႁူဝ်ၶမ်ႈ (မိူင်းတႆး) ၼၼ်ႉ ၽူႈယိင်း သႅၼ်းဢႃႇယု 57 ပီၵေႃႉၼိုင်ႈ ၸိုဝ်ႈပႃႈယၼ်ႇယီႇမႅၼ်း၊ ၸၢဝ်းၶႄႇ (မိူင်းဝၼ်း) လႆႈထုၵ်ႇယိုဝ်းလူႉတၢႆထင်တီႈ ၽွင်းမၼ်းၼၢင်း တိုၵ်ႉသွမ်ႈမွၵ်ႇၽုၵ်ႇမွၵ်ႇ ယူႇႁိမ်းႁူဝ်ႉ ၼႃႈႁိူၼ်း၊ ပွၵ်ႉၶရိတ်ႉယၼ်ႇ ဝဵင်းမူႇၸေႊ ၸိုင်ႈတႆးပွတ်းႁွင်ႇ-ၼႆယဝ်ႉ။

ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီႈ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၵဵဝ်ႇၵပ်းလွင်ႈၼႆႉ ၾၢႆႇပလိၵ်ႈ/ၾၢႆႇသိုၵ်းၶဝ်တႄႉဝႃႈ မီးၵူၼ်းႁၢႆႉသွင်ၵေႃႉ ၶီႇရူတ်ႉၶိူင်ႈလတ်းၽၢၼ်ႇၼႃႈႁိူၼ်း ၼႃႈႁၢၼ်ႉ ၶၢႆၶူဝ်းၶွင်ၶဝ်သေ ယိုဝ်းသႂ်ႇ၊ မၢၵ်ႇၵွင်ႈတိူဝ်ႉမၼ်းၼၢင်း 3 ၵမ်း၊ တိူဝ်ႉတီႈႁူဝ်မႃႇၾၢႆႇသၢႆႉႁွႆးၼိုင်ႈ၊ တီႈပုမ်ၾၢႆႇသၢႆႉႁွႆးၼိုင်ႈ၊ တီႈပဵမ်ႉၾၢႆႇၶႂႃႁွႆးၼိုင်ႈ”  – ဝႃႈၼႆ။

ၵဵဝ်ႇၵပ်းလွင်ႈၵၢၼ်ပဵၼ်ၵၢၼ်တၢႆပွၵ်ႈၼႆႉ ဝၢႆးသေဢဝ်ၶၢပ်ႈတူဝ် သူင်ႇထိုင်တီႈႁူင်းယႃယဝ်ႉ ယူႇတီႈၾၢႆႇ မေႃယႃၶဝ်ၽႃႇတူၺ်း လႆႈႁူႉဝႃႈ တပ်းမၼ်းလူႉလႅဝ်မူတ်း-ၼႆယဝ်ႉ။

ပႃႈယၼ်ႇယီႇမႅၼ်းၶဝ်ၼႆႉ ၶဝ်ပိုတ်ႇႁၢၼ်ႉၶၢႆၶူဝ်းၵုၼ်ႇယွႆႈၵူႈလွင်ႈလွင်ႈ ၼႃႈႁိူၼ်းဝႆႉ။ လွင်ႈတၢင်းၶဝ်ယိုဝ်းၵၼ်ၼၼ်ႉ ယွၼ်ႉလွင်ႈသင်ၼၼ်ႉ ဢမ်ႇလႆႈႁူႉ၊ ဢၼ်ၸၢင်ႈလၢမ်းၼႆႉ ပေႃးပဵၼ်ၶႄႇမိူင်းဝၼ်း ၸၢင်ႈၵပ်းၵၢႆႇၸုမ်းယိပ်းၵွင်ႈၵၢင်ႇ ဢမ်ႇၼၼ် ၸုမ်းပျီႇတုၸိတ်ႉၸိူဝ်းၼႆႉ။

ၸၢႆးသၢမ်မိူင်းထီး ၼေႃႇၽူႈတႅၼ်းသၽႃးၵူၼ်းမိူင်း  မူႇၸေႊ လၢတ်ႈဝႃႈ- “လႆႈႁူႉၸွမ်းဝႃႈ မီးၵူၼ်း သွင်ၵေႃႉ ၶီႇရူတ်ႉၶိူင်ႈ သုပ်းသႂ်ႇၽႃႈတူမ်းပၢၵ်ႇ တူမ်းၼႃႈသေမႃးယိုဝ်း။ ၵေႃႉတၢႆၼႆႉ ပဵၼ်ၵူၼ်းၵႃႉၶၢႆ တီႈလိၼ်လႄႈ ၵႃႉၶၢႆလၢႆၸိူဝ်ႉလၢႆပိူင်၊ ၵေႃႉပဵၼ်ၽူဝ်မၼ်းၼၢင်းၵေႃႈ ယၢမ်ႈၵဵဝ်ႇၶွင်ႈၵၢၼ်ၸႂ်ႉတိုဝ်း ယႃႈမဝ်းၵမ်လႄႈ တူၵ်းၶွၵ်ႈဝႆႉ။ လၢမ်းတူၺ်းတႄႉ ၸၢင်ႈပဵၼ်ပၼ်ႁႃလွင်ႈငိုၼ်းသေ ထိုင်တီႈလႆႈ မႃးယိုဝ်းၵၼ်” ဝႃႈၼႆ။

တီႈဝဵင်းမူႇၸႄႈၼႆႉ ပူၼ်ႉမႃးမိူဝ်ႈဝၼ်းတီႈ 2/7/2020 ၼၼ်ႉၵေႃႈ ယၢမ်းၵၢင်ၶမ်ႈ မွၵ်ႈ 9 မူင်း၊ ၽူႈၸၢႆး ဢႃႇယု မွၵ်ႈ 25 ပီ၊ ထုၵ်ႇၵူၼ်းႁၢႆႉ 2 ၵေႃႉ ၶီႇရူတ်ႉၶိူင်ႈလမ်းယိုဝ်းတၢႆ တီႈႁိမ်းဝတ်ႉ/ ၵျွင်းႁူဝ်ၼႃး ပွၵ်ႉၵွင်းမူးတူင်ႈ ၸႄႈဝဵင်းမူႇၸေႊ ၼင်ႇၵဝ်ႇ။

ဝဵင်းမူႇၸေႊၼႆႉ ပဵၼ်ဝဵင်းဢၼ်တိတ်းၸပ်းလႅၼ်လိၼ်တႆး – ၶႄႇ ဝဵင်းၼိုင်ႈသေ ၵႆႉမီးလွင်ႈယိုဝ်းၵၼ်တၢႆ၊ ၸူၼ်ၵၼ်၊ လၵ်ႉၵၼ် ၸိူဝ်းၼႆႉ။ ယႃႈမဝ်းၵမ်ၵေႃႈ လိူင်ႇၽႄႈၼမ်။ သိုၵ်းလူင်ပွင်ၸိုင်ႈမၢၼ်ႈၵေႃႈ ၼွၵ်ႈသေ တပ်ႉဢၼ်ပၵ်းယူႇတႃႇသေႇ ယင်းမီး တပ်ႉမ 77  ၊ 88 ၸိူဝ်းၼႆႉ ၵႂႃႇမႃးတူင်ႉၼိုင်၊  ၸုမ်းယိပ်းၵွင်ႈၵၢင်ႇၵေႃႈၼမ်၊ ၸုမ်းပျီႇတူႉၸိတ်ႉၵေႃႈ ၼႂ်းၸႄႈတွၼ်ႈမူႇၸေႊ မီးဢမ်ႇယွမ်း 20 ၸုမ်း။