တေႃႇဢွင်ႇသၢၼ်းသူႉၵျီႇ မွပ်ႈယိုၼ်ႈဝႂ်“မိၵ်ႈသူးဢွၼ်ႁူဝ်ပွင်သၢင်ႈလွင်ႈငမ်းယဵၼ်”  ထိုင်ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈ RCSS/SSA ဢၼ်ဢွၼ်ႁူဝ် ႁဵတ်းသၢင်ႈလွင်ႈငမ်းယဵၼ်  ၵဵဝ်ႇၵပ်း ၶၵ်ႉၵၢၼ်ၵိုတ်းတိုၵ်းပတ်း ပိုၼ်ႉတူဝ်ႈမိူင်း NCA ။

ဝၼ်းတီႈ 13/8/2020 ပၢင်ၵုမ်လူင် ၽူႈၼမ်းသုင်သုတ်း JICM (ၵၢၼ်ၽေႃႇၼမ်ႉၼႄတူဝ် လိၵ်ႈႁူမ်ႈမၢႆၵိုတ်းတိုၵ်း) ပွၵ်ႈၵမ်း 9 ဢၼ်ၸတ်းႁဵတ်းတီႈၼေႇပျီႇတေႃႇၼၼ်ႉ ယူႇတီႈ သုၼ်ငမ်းယဵၼ် လႄႈမႄးလီ ၼႂ်းၸိူဝ်ႉၸၢတ်ႈ NRPC မွပ်ႈယိုၼ်ႈ သူး/ၶႅပ်းဝႂ် ယွင်ႈယေႃးထိုင် ၽူႈဢွၼ်ႁူဝ်တူင်ႉၼိုင် ႁဵတ်းသၢင်ႈ ၸွႆႈထႅမ် ၶၵ်ႉၵၢၼ်လွင်ႈငမ်းယဵၼ်၊ ၼႂ်းၼၼ်ႉ ၸွမ်သိုၵ်းလူင်ယွတ်ႈသိုၵ်း ႁူဝ်ပဝ်ႈလူင်ၶွင်ႇသီႇဢဝ်ၶိုၼ်းၸိုင်ႈတႆး RCSS/SSA ၵေႃႈလႆႈႁပ်ႉ။

ၸဝ်ႈၶိုၼ်းသႂ် ၸႂ်ယဵၼ် ၽူႈၵိူဝ်းၵုမ် RCSS/SSA ဢၼ်ဢွၵ်ႇၶၢဝ်းတၢင်း ၸွမ်းၸွမ်သိုၵ်းလူင် ယွတ်ႈသိုၵ်းသေ ႁွတ်ႈထိုင် ယူႇတီႈ ၼေႇပျီႇတေႃႇၼၼ်ႉလၢတ်ႈဝႃႈ – “ ၸႂ်ႈယဝ်ႉ ၵူၼ်းလူင် ၵူႈၵေႃႉ ဢၼ်ၶိုၼ်ႈႁွတ်ႈၼႂ်းပၢင်ၵုမ် JICM ၼၼ်ႉ လႆႈၵူႈ ၵေႃႉယဝ်ႉ။ ဢမ်ႇမီးၶပ်ႉမၢႆ ၶိုၵ်ႉတွၼ်း ယႂ်ႇသေ မွပ်ႈယိုၼ်ႈ။ သူးရၢင်းဝလ်းၼၼ်ႉ တေပဵၼ်ဢႅပ်ႇဢၼ်ၼိုင်ႈ သႂ်ႇဝႆႉႁၢင်ႈ ၽႅၼ်ႇမိူင်းႁူမ်ႈတုမ် ၵႅဝ်ႈမၢၼ်ႇသႂ်သႂ်။ ယဝ်ႉၵေႃႈ ၶႅပ်းဝႂ် တႅမ်ႈလိၵ်ႈမၢၼ်ႈဝႆႉ (ငြိမ်းချမ်းရေးဉီးဆောင်သူများဆုတံဆိပ်)၊ တေႃႇဢွင်ႇသၢၼ်းသူႉၵျီႇ လူင်းလၢႆးမိုဝ်း မွပ်ႈယိုၼ်ႈပၼ်ဝႆႉ ၸိူဝ်းၼၼ်ႉၵူၺ်း”  – ဝႃႈၼႆ။

တီႈႁွင်ႈၵၢၼ်ပိုၼ်ၽၢဝ်ႇ ၶွင် RCSS တႆးလွတ်ႈလႅဝ်းဢွၵ်ႇဝႆႉ ယူႇတီႈၾၢႆႇၸၢဝ်းၶိူဝ်း ၸုမ်းယိပ်းၵွင်ႈၵၢင်ႇ NCA-S EAO ၸိူဝ်းလႆႈႁပ်ႉသူးရၢင်းဝလ်းလႄႈ ဝႂ်ယုၵ်ႉယွင်ႈၼၼ်ႉသမ်ႉ ၸွမ်သိုၵ်းလူင် ယွတ်ႈသိုၵ်း RCSS၊ ၸွမ်းသိုၵ်းလူင် မူတူးသေး ၽူဝ်း KNU၊ ၼၢႆႇထေႃးမုၼ်ႇ NMSP၊ ပူးၸိၼ်ႇၵျူင်း CNF၊ ၸဝ်ႈသိုၵ်းလူင် ၶုၼ်ႇဢူၵ်ႉၵႃႇ PNLO၊ ၶၢႆႇၸူဝ်းၼၢႆႇဢွင်ႇ ALP၊ ၸွမ်သိုၵ်းလူင် ၸေႃးမူဝ်ႇသေး DKBA၊ ယႄးပေႃႇတၢၼ်ႇၶႄး ABSDF၊ ၸွမ်ႁၢၼ် ၻွၵ်ႊတိူဝ်ႊၼေႃႇၵပေႃႇထူး KNU/KNLA-PC၊ ၵျႃႇၶုၼ်ႇသႃႇ LDU လႄႈ ပတူဝ်ႇသေႃးၵွႆႇထူးဝိၼ်း KNU ၸိူဝ်းၼႆႉ။

တၢင်းၾၢႆႇလူင်ပွင်ၸိုင်ႈမၢၼ်ႈ သိုၵ်းမၢၼ်ႈ ၵေႃႈ ဢၼ်လႆႈႁပ်ႉ မီး ဢူးၵျေႃႇတိၼ်ႉသူၺ်ႇ၊ ၻွၵ်ႊတိူဝ်ႊ တိၼ်ႇမဵဝ်းဝိၼ်း၊ ဢူးထုၼ်းထုၼ်းဢူး၊ ဢူးမိၼ်းတူႇ၊ ၵႅမ်ၸွမ်ၸိၵ်းသိုၵ်းမၢၼ်ႈ ၸူဝ်းဝိၼ်း၊ ၸွမ်သိုၵ်းယႃႇပျေႉ၊ ၸွမ်သိုၵ်းမိၼ်းၼွင်ႇလႄႈ ၸွမ်းသိုၵ်းတိၼ်ႇမွင်ႇ ဝိၼ်း ၸိူဝ်းၼႆႉ။

ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း 10 ၸုမ်း ဢၼ်လူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ၼႆႉ တႄႇလူင်းလၢႆး မိုဝ်း မိူဝ်ႈပီ 2015 လိူၼ်ဢွၵ်ႊထူဝ်ႊပိူဝ်ႊ 15 ဝၼ်း။ ၼႂ်း 8 ၸုမ်းၼၼ်ႉ မိူၼ်ၼင်ႇ ၶွင်ႇသီႇဢဝ်ၶိုၼ်းၸိုင်ႈ တႆး/ တပ်ႉသိုၵ်းၸိုင်ႈတႆး (RCSS/SSA)၊ ၸုမ်းပူတ်း ပွႆႇၸိူဝ်ႉၸၢတ်ႈပဢူဝ်း (PNLO)၊ တႅဝ်း ႁူမ်ႈၸိူဝ်ႉၸၢတ်ႈ ၶျၢင်း (CNF)၊ တႅဝ်းႁူမ်ႈၻီႊမူဝ်ႊၶရႅတ်ႊတိၵ်ႊ လုၵ်ႈႁဵၼ်း မိူင်းမၢၼ်ႈပတ်းပိုၼ်ႉ (ABSDF)၊ ႁူမ်ႈ တုမ်ၸိူဝ်ႉၸၢတ်ႈယၢင်းၽိူၵ်ႇ (KNU)၊ တပ်ႉသိုၵ်းယၢင်းၵမ်ႉထႅမ်ၻီႊမူဝ်ႊၶရေႊၸီႊ (DKBA)၊ တပ်ႉသိုၵ်းပူတ်းပွႆႇၸိူဝ်ႉ ၸၢတ်ႈယၢင်း-ၶွင်ႇသီႇငမ်းယဵၼ် (KNLA-PC) လႄႈ ပႃႇတီႇပူတ်းပွႆႇၸိူဝ်ႉၸၢတ်ႈရၶႅင်ႇ (ALP)။ ဝၢႆးၼၼ်ႉ ႁူမ်ႈတုမ်ၸိူဝ်ႉၸၢတ်ႈလႃးႁူႇ LDU တင်း ပႃႇတီႇမိူင်း မွၼ်းမႂ်ႇ NMSP – လႆႈလူင်းလၢႆးမိုဝ်း NCA မိူဝ်ႈလိူၼ် ၾႅပ်ႊၿိဝ်ႊရီႊ ပီ 2018 ။